كەرەكۋدىڭ استىعى استا-توك

پاۆلودار – ەلىمىزدەگى استىقتى وبلىستاردىڭ ءبىرى. سوعان قاراماستان كەيىنگى ەكى جىل قاتارىنان جەرگى­لىكتى قامبالارعا قۇيىلاتىن ءداندى داقىل ادەتتەگىدەن ازايىپ كەتكەن ەدى. كورسەتكىشتىڭ بۇلاي قۇلدىراۋىنا كوكتەمگى ىلعالدىڭ ازدىعى مەن جازداعى قۇرعاقشىلىق سەبەپ بولعان ەدى. ال بيىلعى جاعداي قۋانتارلىقتاي. كوكتەمگى ىلعالدىڭ مول بولعانى سونشالىق, جازدىڭ ىستىق بولعانىنا قاراماستان ەگىن جاقسى جەتىلدى. ەگىس القاپتارىندا ءداندى داقىلدار بىتىك شىعىپ, ەندىگى جەردە جەر-انانىڭ ىرىزدىعىن شاشپاي-توكپەي جيناپ الۋ مىندەتى تۇر.

وڭىرلىك اۋىل شارۋاشىلىعى باسقارماسىنىڭ ءبولىم باسشىسى ەسەنتاي ءمۇرسالىموۆتىڭ دەرەگىنشە, بيىل وبلىستاعى ەگىس القاپتارىنىڭ جال­پى اۋماعى 1 ملن 406,2 مىڭ گەكتار­دى قۇرادى. بۇل وتكەن جىلمەن سالىس­تىرعاندا 165,5 مىڭ گەكتارعا كوپ.

«استىقتى ءداندى داقىلدار جالپى ەگىستىڭ 928,5 مىڭ گەكتارىن الىپ جاتىر. مايلى داقىلدار – 374,4 مىڭ, كارتوپ – 24,8 مىڭ, مال ازىعى – 70,8 مىڭ, كوكونىس جانە باقشا داقىلدارى – 7,8 مىڭ گەكتار. داقىل تۇرلەرىنىڭ قايسىسى بولسىن, اۋماعى جاعىنان كوپ. اسىرەسە مايلى داقىلداردىڭ كولەمى بىردەن 47 پايىزعا ارتىپ وتىر. وبلىس بو­يىنشا قازىر استىقتىڭ ونىمدىلىگى گەك­تار باسىنا 11,7 تسەنتنەردەن اينالىپ تۇر. بۇل وتكەن جىلمەن سالىستىرعان­دا شامامەن 3 ەسە ارتىق. بىل­تىر­عى قۇرعاقشىلىقتا كەتكەن ەسەنى ديقاندار بيىلعى ناۋقاندا قايتارادى دەگەن سەنىم­دەمىز», دەيدى باسقارما وكىلى.

شارۋالار ەگىس القاپتارىن­داعى استىقتى جانە بۇرشاقتى ءداندى داقىلداردىڭ 312,2 مىڭ گەكتارىن نەمەسە 33,6 پايىزىن ورىپ ۇلگەرگەن. كارتوپ گەكتارىنان 317 تسەنتنەردەن جينالىپ, رەكوردتىق كورسەتكىشكە جاقىنداپ كەلەدى. قازىردىڭ وزىندە كارتوپ وسىرۋشىلەر 282,6 مىڭ توننا تۇينەكتى جيناپ, قاپ­تاۋ­عا كىرىستى. جەرگىلىكتى كار­توپتىڭ كوبى سۋارىلاتىن بول­عاندىقتان ۇزاق ساقتاۋعا ءتيىم­سىز, ەگىس دالاسىنان بىردەن ءىرى جەتكىزۋشىلەر الىپ كەتەدى. ال ەرتىستىڭ توپىراعىنا ابدەن جەرسىنگەن, قىستا ساقتاۋعا جارايتىن تۇقىمدارى كەپتىرىلىپ, قويمالارعا جونەلتىلەدى. ءسابىز, قىرىققابات, پياز سياقتى كو­كونىس تۇرلەرى دە قويمالاردا قىس بويى ساقتالىپ, وبلىستىق تۇراق­تاندىرۋ قورى ارقىلى اۋدان-قالالارداعى الەۋمەتتىك دۇكەندەرگە جىل بويى سۇرانىسقا ساي بوساتىلىپ تۇرادى. ال نەگىزىندە, پاۆلودار وبلىسى ءوڭىر تۇرعىندارىنىڭ سۇرانىسىنان 10 ەسە كوپ كارتوپ وسىرەدى.

دەي تۇرعانمەن, بيىل كەرە­كۋلىك كارتوپ وسىرۋشىلەردى اتال­عان داقىلدىڭ ءتۇرلى اۋرۋى مازا­لاپ تۇرعانعا ۇقسايدى. «AndasAgro» جشس باسشىسى زەينوللا سالمەنباەۆ ەگىس دالاسىنان جينا­لىپ جاتقان كار­توپتىڭ ساپاسىنا قاتىستى ءبىراز ماسەلە بار ەكەنىن جاسىرمادى. ايتۋىنشا, ساتىپ الۋشىلار كارتوپتىڭ ءتۇرلى اۋرۋىن سىلتاۋ ەتىپ, باعاسىن تۇسىرۋگە تىرىسادى. سوعان وراي الداعى ۋاقىتتا فەرمەرلەر ءۇشىن كارتوپ بويىنشا ءتيىمدى باعا قا­لىپ­تاس­پايتىنى انىق دەيدى ول.

باسقارماداعىلار ەگىن جيناۋ جۇمىستارى بولجامدى مەر­زى­مىنەن كەشىگۋى مۇمكىن ەكەنىن دە ەسكەرتتى.

«بيىلعى وراق ناۋقانى باس­تاپقىدا قىركۇيەك ايىنىڭ سوڭىندا اياقتالادى دەپ بولجاعان ەدىك. الايدا قىركۇيەك ايىنىڭ باسى مەن ورتاسى جاڭبىرلى بولىپ, جيىن-تەرىن جۇمىستارى تۇرىپ قالدى. كەيبىر استىقتى اۋدانداردا جاڭبىرلى كۇندەر ءالى دە جالعاسىپ جاتىر. ماسەلەن, ەرتىس اۋدانىندا قازىرگە دەيىن بارلىق استىقتىڭ – 33,2 پايىزى, جەلەزيندە – 27,1, تەرەڭكولدە – 37,3, اقتوعايدا 30 پايىزى عانا ورىلعان. ەندىگى مەجە – قازان ايىنىڭ العاشقى ونكۇندىگى دەپ وتىرمىز. استىقتىڭ نەگىزگى كولەمىن بەرەتىن ءىرى شارۋا­شىلىقتار سول ۋاقىتتا بار­لىق جۇمىستى اياقتايدى, ال ءبىرلى-جارىم ۇساق شارۋاشى­لىق­تاردا وراق ناۋقانى ءبىراز سوزىلۋى مۇمكىن. بۇگىنگە دەيىن ءداندى جانە بۇرشاقتى داقىلدار بويىنشا 364,3 مىڭ توننا استىق جينالدى. بۇل كورسەتكىش الداعى كۇندەرى ەسەلەنىپ ءوسۋى كەرەك. سەبەبى وڭىردە كۇن اشىلىپ, ديقاندارعا جايلى بولىپ تۇر», دەيدى ەسەنتاي ءمۇرسالىموۆ.

اتاپ وتەرلىگى, بيىل جول كارتاسى بويىنشا عىلىمي نەگىز­دە 94 100 توننا مينەرالدىق تىڭايت­قىش فەرمەرلەرگە بەرىلۋى كەرەك ەدى. اتالعان كولەمنىڭ 62 پا­يىزى نەمەسە 54,5 مىڭ تونناسى بو­يىنشا كەلىسىمشارتتار جاسالىپ, جونەلتىلگەن. سونداي-اق كۇزگى جيىن-تەرىن جۇمىستارىن وتكىزۋگە 30,7 مىڭ توننا ارزان­داتىلعان ديزەل وتىنى بولىن­گەن. «Lf trade» جشس جانە «تك پارناس» جشس جانار-جاعار­ماي­دى جەتكىزۋشى وپەراتور رە­تىندە تاڭداپ الىنعان.

وپەراتورلىق قىزمەت قۇنىن قوسقاندا 1 توننا ارزانداتىلعان ديزەل وتىنىنىڭ قۇنى 282 مىڭ تەڭگە نەمەسە ءليترى 237 تەڭگە تۇرادى. بۇل باعا نارىقتاعىدان 58 تەڭ­گەگە ارزان. شارۋالار اتال­عان كولەمنىڭ 14 مىڭ تونناسىنا تولەم جۇرگىزىپ, ازىرشە 12,4 مىڭ تونناسىن تاسىپ جەتكىزگەن.

پاۆلودار وبلىسى