مەكتەپ وقۋشىسى ۇلى اعارتۋشىنىڭ ءومىرى مەن ەڭبەكتەرىن ءبىر جەرگە جيناقتاپ, پايدالانۋشىلارعا قولجەتىمدى ەتكەن.
«عالامتوردا احمەت بايتۇرسىن ۇلى تۋرالى اقپاراتتار كوپ بولعانىمەن, ولار ءارتۇرلى دەرەككوزدە شاشىراڭقى كۇيدە كەزدەسەدى. مەن بارلىق مالىمەتتى ءبىر جەرگە جيناقتاپ, ىڭعايلى پلاتفورمادا ۇسىنۋدى ءجون كوردىم. ناتيجەسىندە, ءبىر رەسۋرسقا بىرىكتىرىلگەن ءموبيلدى قوسىمشانى «Play Market» ينتەرنەت دۇكەنىنە جۇكتەدىم», دەيدى دانيال.
ءموبيلدى قوسىمشاعا ۇلت ۇستازىنىڭ ءومىربايانى, شىعارمالارى, ناقىل سوزدەرى, ولەڭدەرى مەن عىلىمي ەڭبەكتەرى ەنگەن. ودان وزگە عالىمنىڭ شىعارماشىلىعى بويىنشا تەست ۇيىمداستىرىلعان, بۇل پايدالانۋشىلارعا حح عاسىر باسىنداعى ۇلت زيالىلارىنا قاتىستى بىلىمدەرىن تەكسەرۋگە مۇمكىندىك بەرەدى. سۋرەتتەر, بەينەجازبالار مەن سىرتقى سىلتەمەلەر دە قوسىمشانىڭ مازمۇنىن بايىتا تۇسەدى. كوپ ۋاقىت وتپەسە دە, دانيالدىڭ قوسىمشاسىن «Play Market» پلاتفورماسىنان مىڭعا جۋىق ادام جۇكتەپ ۇلگەرىپتى. ول الداعى ۋاقىتتا ۇلت قايراتكەرلەرىنە ارنالعان باسقا دا قوسىمشالار ازىرلەۋدى جوسپارلاپ وتىر. «ماقساتىم – قازاق تىلىندەگى ءموبيلدى قوسىمشالاردى كوبەيتىپ, انا تىلىمىزدە تسيفرلىق ونىمدەر جاساۋدىڭ ماڭىزدىلىعىن ارتتىرۋ», دەيدى تالاپتى وقۋشى.
دانيال ۇلت قايراتكەرلەرىنىڭ ەڭبەكتەرى تۋرالى قوسىمشا مالىمەتتەر ىزدەۋگە وقۋشىلاردىڭ كوپ ۋاقىتى جۇمسالاتىنىن ۇستازى ەربول مەدەۋوۆكە ايتقان. مەكتەپ مۇعالىمى زەيىندى وقۋشىنىڭ احمەت بايتۇرسىن ۇلىنىڭ ەڭبەكتەرى مەن ءومىربايانىن حرونولوگيالىق تارتىپپەن جيناقتاۋ باستاماسىن قۇپتاپ, كومەك كورسەتكەن. ۇستازدار دارىندى وقۋشىنىڭ تىڭ باستاماسى ەلىمىزدەگى ورتا ءبىلىم سالاسىنداعى قازاق تىلىندەگى تسيفرلىق كونتەنتتىڭ دامۋىنا ۇلەس قوساتىنىنا سەنىمدى.
اقتوبە وبلىسى
