قارت تورعايدىڭ توسىنەن تۇلەپ ۇشقان تۇعىرلى تالانتقا ونەردىڭ قاي ءتۇرى دە جات بولعان ەمەس. بالا كۇنىنەن ونەرگە عاشىق بولىپ وسكەن ورەن العاش وقىرماندارعا شىمشىما ءازىلى بار سىقاق ولەڭدەرىمەن, مۇڭلى اسەم اندەرىمەن تانىلدى. اسىرەسە اۆتوردىڭ ساتيرا جانرىندا جازىلعان «باستاۋ», «الاڭعاسار», «كورشىلەر» «جەتپىس جەتىنىڭ جىگىتتەرى» اتتى جيناقتارى سىنشىلار تاراپىنان جوعارى باعالاندى. قوناعاڭ جۋرناليستيكا سالاسىندا دا ايشىقتى ءىز قالدىردى. العاشقى ەڭبەك جولىن اۋداندىق گازەتتەن باستاعان قالامگەر وبلىستىق «تورعاي تاڭى», ودان كەيىن سول كەزدەگى «لەنينشىل جاس» (قازىرگى «جاس الاش») گازەتىنىڭ مەنشىكتى ءتىلشىسى بولىپ, قوعامداعى سان الۋان وزەكتى ماسەلەنى باتىل كوتەردى. كەيىن قالالىق «ارقالىق تاڭى» گازەتى مەن تورعاي وبلىستىق تەلەراديو كومپانياسىن باسقاردى.
ەل تالانتىنا سۇيسىنگەن اسىل ازاماتتىڭ تاعى ءبىر قىرى – سۋىرىپسالما اقىندىعى. ول سوناۋ 80-جىلداردىڭ باسىنان حالقىمىزدىڭ عاجايىپ مۇراسى – ايتىس ونەرىنىڭ قايتا جاندانۋىنا قوماقتى ۇلەس قوستى. قونىسباي اعا باسىنا ۇكى تاققان بوركىسىمەن ساحناعا شىعا كەلگەندە كوز الدىمىزعا قازاق سال-سەرىلەرىنىڭ بەينەسىن ەلەستەتەتىن. ايتىستا «تورعايدىڭ توپجارعانى» نۇرحان احمەتبەكوۆتى ءپىر تۇتتى. اسىرەسە ارقالى اقىننىڭ كوكەن شاكەەەۆ, كوكباي وماروۆ, اسەلحان قالىبەكوۆا, ءاسيا بەركەنوۆا, قاتيمولدا بەردىعاليەۆ, شىنبولات دىلدەباەۆ, ەرىك اسقاروۆ سەكىلدى اقتاڭگەرلەرمەن ايتىسى ءتول ونەرىمىزدىڭ ۇزدىك ۇلگىلەرىنە اينالدى.
سونداي-اق قونىسباي ءابىل استانا – باس شاھار بولعان جىلداردان باستاپ, ەلوردادا مەملەكەتتىك ءتىلدى دامىتۋ ءىسىنىڭ نەگىزىن قالاپ, انا ءتىلىمىزدى وركەندەتۋ جولىندا بەل شەشىپ ەڭبەك ەتتى.
اقىندى ەسكە الۋ كەشى وزگەشە فورماتتا ءوتتى. بۇل جولى ساحنادا قالامگەردىڭ تۋىندىلارى عانا سويلەدى. تەك قانا قوناعاڭنىڭ جاقىن سەرىگى, كورنەكتى اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەت دوسى تۋرالى جىلى ەستەلىگىمەن ءبولىستى.
«ادام ءومىرى مازمۇنى بولەك كىتاپ سەكىلدى. اركىمنىڭ دە جۇرەك كىتابى بار. قونىسباي اۋزىن اشسا جۇرەگى كورىنەتىن جىگىت ەدى. جانىنىڭ كەڭدىگى بىردە سايىن دالاعا, ەندى بىردە اسقار تاۋعا ۇقساۋشى ەدى. ونىڭ ساتيراسى دا, ليريكالىق جىرلارى دا كەرەمەت. قاي شىعارماسى بولماسىن, ءومىردىڭ وزىنەن ويىپ الىنعانداي وقىرمانعا اسەر ەتەدى. سان قىرلى تالانت يەسى بولاتىن. كەز كەلگەن مۋزىكالىق اسپاپتا شەبەر وينايتىن. تۋعان جەرى – تورعايدى ەرەكشە جاقسى كوردى. استاناعا قونىس اۋدارعاننان كەيىن مەملەكەتتىك ءتىلدىڭ مەرەيىن كوتەرۋگە بار كۇشىن جۇمسادى. شىندىعىن ايتقاندا, قوقاڭنىڭ قالاعا سىڭىرگەن ەڭبەگى ەرەكشە. سوندىقتان ەلوردانىڭ ءبىر كوشەسىنە قونىسبايدىڭ ەسىمى بەرىلسە, ارتىق ەمەس», دەدى ول.
كەش بارىسىندا اقىننىڭ ءوزى شىعارعان اندەرى مەن سوزىنە جازىلعان شىعارمالارىن قازاقستاننىڭ ەڭبەك سىڭىرگەن قايراتكەرلەرى نۇرلان ونەرباەۆ, ايگۇل قوسانوۆا, كلارا تولەنباەۆا جانە پەريزات تۇراروۆا, شاحريزات سەيداحمەت, وزگەرىس شەرىكباي سەكىلدى دارىندى ونەرپازدار ناقىشىنا كەلتىرىپ ورىندادى. سونداي-اق ارقالىق قالاسىنداعى قونىسباي اعانىڭ ءىزىن جالعاعان اقىندار مەكتەبىنىنىڭ وكىلدەرى – ايبەك قاليەۆ, توبا وتەپباي, باتىرلان ساعىنتاەۆ ۇستاز رۋحىنا ارناپ جىر توكتى. ال جاستار تەاترى مەن ءا.مامەتوۆ اتىنداعى مەملەكەتتىك دراما جانە كومەديا تەاترىنىڭ اكتەرلەرى قالامگەر شىعارمالارىنان شاعىن كورىنىس قويىپ, كورەرمەندەردى جىلى اسەرگە بولەدى.
