شەتەلدىك تۋريستەر سانىنىڭ كوبەيۋىنە ىقپال ەتكەن نەگىزگى فاكتورلار – دۇنيەجۇزىلىك كوشپەلىلەر ويىنىنىڭ ءوتۋى مەن تانىمال ءانشى ديماش قۇدايبەرگەننىڭ كونتسەرتى. اتالعان ءىس-شارالارعا 89 مەملەكەتتىڭ ازاماتتارى قاتىستى.
تۋريزم جانە سپورت ۆيتسە-ءمينيسترى ەرجان ەركىنباەۆ: «شەتەلدىك قوناقتار نەگىزىنەن قىتاي, رەسەي, ءۇندىستان, گەرمانيا سىندى مەملەكەتتەردەن كەلدى. مىسالى, قىتايدان 8 مىڭنان استام, ءۇندىستاننان 6 مىڭنان استام, گەرمانيادان 4 مىڭنان استام تۋريست تىركەلگەن. البەتتە, بۇل دەرەك ەلىمىزگە تۋريستىك باعىت رەتىندە قىزىعۋشىلىقتىڭ ارتىپ كەلە جاتقانىن كورسەتەدى», دەپ اتاپ ءوتتى.
ۆيتسە-ءمينيستردىڭ ايتۋىنشا, تۋريستەردىڭ ەداۋىر بولىگى گەرمانيا, وزبەكستان, تۇركيا, قىرعىزستان, اقش جانە وڭتۇستىك كورەيادان كەلگەن.
EQonaq جۇيەسى استانادا 12,4 مىڭعا جۋىق شەتەلدىك تۋريست تىركەدى. ولاردىڭ تۇرۋعا, كولىككە, تاماقتانۋعا جانە ويىن-ساۋىققا جۇمساعان جالپى شىعىندارى 15,5 ملن اقش دوللارىن نەمەسە 7,5 ملرد تەڭگەنى قۇراعان. الىس شەتەلدەن كەلگەن تۋريستەردىڭ ورتاشا شىعىنى 1 500 دوللار شاماسىندا. دەمەك, دۇنيەجۇزىلىك كوشپەلىلەر ويىندارىنا كەلۋشىلەر ەل ەكونوميكاسىنا قوسىمشا 625 مىڭ اقش دوللار قوسقان.
ايتا كەتۋ كەرەك, ەلوردانىڭ تانىمال تۋريستىك نىساندارىنا دا 7-13 قىركۇيەك ارالىعىندا كەلۋشىلەر سانى ارتقان. ۇلتتىق مۋزەي 14 مىڭنان استام ادامدى قابىلداپ, «استانا-بايتەرەك» مونۋمەنتىنە 15 مىڭعا جۋىق تۋريست كوتەرىلىپ, «نۇر-الەم» پاۆيلونىن 10 مىڭعا جۋىق ادام تاماشالاعان.
حالىقارالىق دەڭگەيدەگى مادەني-سپورتتىق ءىس-شارا بولىپ تابىلاتىن دۇنيەجۇزىلىك كوشپەلىلەر ويىندارى ەلىمىزدىڭ تۋريستىك ءيميدجىن نىعايتۋ ءۇشىن ەلەۋلى ۇلەس قوستى. كوشپەلىلەر ويىنىن ۇيىمداستىرۋ كوميتەتىنىڭ مالىمەتىنشە, ەتنواۋىل مەن ويىنداردىڭ ءوزىن كورۋگە 250 مىڭنان استام ادام كەلگەن.
