وسى سىننان كەيىن قىرعىز تاراپى «ويىن ەرەجەسى ورەسكەل بۇزىلدى» دەپ, ءتىپتى فينالدىق تارتىس كەزىندە «ەرەجەنىڭ ءبىر ەمەس, 14 مارتە بۇزىلعانىن» مالىمدەدى. سودان كەيىن 1 قاراشادا قىرعىزستاندا وتەتىن «بىرلىك» تۋرنيرىنە كوكپاردان سايىسقا شاقىردى. ۇلتتىق قۇرامانىڭ اعا باپكەرى نۇرداۋلەت مومىنوۆ ەرەجە بۇزعان ويىنشىنىڭ الاڭنان قۋىلىپ, «قارا نارعا» كەتكەنىن ايتتى. بىراق قالاي بولعاندا دا كوكبورىدەن عانا ەمەس, كوكپاردان دا چەمپيوندىق اتاقتى قانجىعالاۋعا كەلگەن كورشىلەر رەنىشى ءالى باسىلار ەمەس.
«ەكى جىل بۇرىن تۇركيانىڭ يزنيك قالاسىندا IV دۇنيەجۇزىلىك كوشپەلىلەر ويىندارى ءوتتى. كوكپار مەن كوكبورىدەن قىرعىز باۋىرلارىمىز تۇركياعا اتتاردى اپارۋعا ۇشاقتى بىرگە جالدايمىز دەپ ءبىزدى سەندىردى. جول جۇرەتىن كۇن تاياعاندا ءتۇرلى سىلتاۋ ايتىپ, اقىرى بىزدەن بۇرىن جەتىپ, تۇرىك تاراپى ۇسىنعان اتتاردىڭ اراسىنان تاڭداپ-تاڭداپ, بەلدى جۇيرىكتەردى وزدەرىنە ءبولىپ الىپتى. ال بىزگە كوكپارعا ەمەس مىنۋگە جارامايتىن اتتاردى ۇسىندى. بىراق ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆتىڭ تىكەلەي قولداۋ كومەگىمەن تۇركيانىڭ باسقا ايماعىنان اتتاردى الدىرىپ سايىسقا قاتىستىق. قىرعىز قۇراماسىن كوكپاردان جەڭىپ, جىگىتتەر چەمپيون اتاندى.
2016 جىلى ءىى دۇنيەجۇزىلىك كوشپەلىلەر ويىندارى قىرعىزستاندا وتكەندە كوكپاردان ۇلتتىق قۇرامانىڭ كاپيتاندىق مىندەتىن ارقالاپ الاڭعا جىگىتتەردى ءوزىم باستاپ شىقتىم. ويىننىڭ باستالعانىنا 4 مينۋت وتكەندە ءبىزدىڭ كوكپارشى ابۋعالي ءابدىجاپپاروۆ تاقىمىنا سەركەنى باسىپ, دودانىڭ اراسىنان شىعۋعا ۇمتىلعاندا سونادايدان قۇيىنداتىپ كەلگەن قىرعىز ويىنشىسى ماناس نيازوۆ بار ەكپىنىمەن قاساقانا قاقتى. قۇلاپ, اتتىڭ استىندا قالعان ابۋعالي اۋرۋحاناعا ءتۇستى. سوندا ءبىزدىڭ قۇراما مۇشەلەرىنىڭ كەيبىرى جەكە ومىرىنە قاۋىپ تونەتىن بولسا, باس تارتايىق دەدى. قۇرامانىڭ كاپيتانى رەتىندە بارلىعىنا رۋح بەرىپ, سوڭىنا دەيىن بارىمىزدى سالا تارتىستىق. راس, جەڭىلىپ, كۇمىس مەدال بۇيىردى. بىراق ولاردىڭ وسىنداي ادام ومىرىنە قاتەر توندىرگەن ارەكەتى ءۇشىن ءبىز ماراپاتتاۋدا مەدالدى شەشىپ, تۇعىردان ءتۇسىپ كەتپەدىك, قىرعىزستاننىڭ مەملەكەتتىك ءانۇرانىنا قۇرمەتىمىزدى تانىتتىق», دەگەن ن.مومىنوۆ كورشىلەردىڭ قارىمتا تارتىسقا شاقىرۋى ورىنسىز ەكەنىن جەتكىزدى.
