اقكەمەردىڭ قىراتىندا اق-قىزىل كىرپىشپەن ادەمى ەتىپ قالانىپ, شاتىرلارى جارقىراپ الىستان كورىنەتىن جاڭا اۋىلداعى ءبىر ءۇيدىڭ قۇنى – 28,5 ملن تەڭگە. سالتاناتتى شاراعا ويىل اۋدانىنىڭ اكىمى اسقار قازىباەۆ, «ERG» كومپانياسىنىڭ وكىلى, اقتوبە فەرروقورىتپا زاۋىتىنىڭ ديرەكتورى ەرجان ابدۋلابەكوۆ, مەردىگەر مەكەمە باسشىلارى قاتىسىپ, باسپانا يەلەرىن جاڭا قونىستارىمەن قۇتتىقتادى. پاتەر كىلتىن تاپسىرۋ راسىمىنە جينالعان جاڭا قونىس يەلەرىنە «Sulpak» ەلەكترونيكا ساۋدا جەلىسىنىڭ اتىنان تۇرمىستىق تەحنيكا سەرتيفيكاتتارى تابىستالدى.
ايتا كەتۋ كەرەك, ساۋىردەگى تاسقىننان ويىل اۋدانىنىڭ ورتالىعى مەن ەكپەتال, كەمەر, بەستاماق, قاراتال اۋىلدارىندا 328 ءۇي زارداپ شەكتى. كوميسسيا قورىتىندىسىمەن ماتەريالدىق زالال كولەمى انىقتالىپ, قاتتى زارداپ شەكپەگەن 21 ءۇي قايتا جوندەۋدەن وتسە, تۇرعىنداردىڭ تاڭداۋىمەن ەكىنشى نارىقتاعى 135 ءۇي ساتىپ الىندى. ال تۇرۋعا مۇلدە جارامسىز, قۇلاپ قالعان ۇيلەردىڭ ورنىنا 172 جاڭا باسپانا سالىناتىن بولدى.
جازدا نەگىزگى جۇمىستار اياقتالعانىمەن, قىركۇيەك – قۇرىلىسشىلار ءۇشىن دە قاربالاسقا تولى. كۇن سۋىتىپ, جاڭبىر-لايساڭ باستالعانشا ءبىراز شارۋانى اياقتاۋ كەرەك. وسى ايدىڭ سوڭىنا دەيىن ءالى دە 13 باسپانانىڭ كىلتى يەلەرىنە تابىستالادى. «ERG» كومپانياسى سۋ تاسقىنىنان زارداپ شەككەن ايماقتارعا ءبىراز قاراجات ءبولدى. قيىن-قىستاۋ زاماندا قول قۋسىرىپ قاراپ وتىرماي, ءبىز دە ۇلەسىمىزدى قوسايىق دەپ شەشتىك. مىنە, بۇگىندە سىزدەردىڭ جاڭا باسپانانىڭ يەگەرى اتانعاندارىڭىزدى كورىپ, ءتيىستى جۇمىستىڭ ناتيجەسى دەپ باعامداپ وتىرمىز. شاڭىراقتارىڭىز ءاردايىم شاتتىققا تولى بولسىن», دەدى «ERG» كومپانياسىنىڭ وكىلى ەرجان ابدۋلابەكوۆ.
«اۋىل ازاماتتارىنا بۇگىنگى قۋانىشتى كۇنىمىز ۇزاعىنان بولسىن دەگىم كەلەدى. وسىدان بىرنەشە اي بۇرىن اۋىلىمىزدى سۋ الىپ, قينالعانىمىز ەسىمىزدە. مەملەكەت باسشىسى حالىققا ارنايى قولداۋ ءبىلدىرىپ, بىزگە ءوز جاردەمدەرىڭىزدى كورسەتىپ, قالا ءتيپتى ۇيلەر سالىپ بەرگەندەرىڭىزگە انالىق شەكسىز العىسىمدى بىلدىرەمىن», دەپ اقكەمەر اۋىلىنىڭ تۇرعىنى جۇماگۇل نۇرعاليەۆا قۋانىشىن ءبولىستى.
ويىل اۋدانىندا سۋ تاسقىنىنان كەيىنگى قالپىنا كەلتىرۋ جۇمىستارى قارقىندى ءجۇرىپ جاتىر. 172 تۇرعىن ءۇيدىڭ قۇرىلىسىنان بولەك, ينفراقۇرىلىم, سۋ تاسقىنىنان زارداپ شەككەن كاسىپكەرلىك نىساندارىنا وتەماقى تولەۋ جۇمىستارى دا ءتيىستى جوسپارمەن جۇرگىزىلدى. تۇرعىندار جاڭا قونىسقا تۇگەل ورنالاستىرىلعان سوڭ سۋ شايعان اۋىل جولدارىن جوندەۋ, بوگەتتەردى نىعايتۋ جانە اۋدان ورتالىعىنا كىرەبەرىستەگى كوپىردى قالپىنا كەلتىرۋ جۇمىسى باستالادى. وعان قاجەتتى قاراجات رەسپۋبليكالىق جانە جەرگىلىكتى بيۋدجەتتەن ءبولىندى.
اقتوبە وبلىسى
