فوتو: ۇكىمەت
كەزدەسۋدە كولىك جانە لوگيستيكا, اوك, ەنەرگەتيكا, تۋريزم, اۆياتسيا ونەركاسىبى سالالارىنداعى ءوزارا ءىس-قيمىل, سونداي-اق مادەني-گۋمانيتارلىق بايلانىستاردى نىعايتۋ ماسەلەلەرى قارالعان.
ايتا كەتەيىك, گرۋزيا – قازاقستاننىڭ وڭتۇستىك كاۆكازداعى ماڭىزدى ءارى سەنىمدى سەرىكتەسى. بيىل ءبىرىنشى توقساندا گرۋزين ينۆەستورلارى قازاقستان ەكونوميكاسىنا $88,5 ملن ينۆەستيتسيا قۇيدى, جالپى 10 جىل ىشىندە ينۆەستيتسيا كولەمى $500 ملن-نان اسقان.
تاراپتار ترانزيتتىك-كولىك سەكتورىنداعى پەرسپەكتيۆالارعا نازار اۋداردى. ەكى ەلدىڭ اۋماعى ارقىلى ەۋروپادان قىتايعا جانە وڭتۇستىك-شىعىس ازياعا اپاراتىن ەڭ قىسقا جولدار – ءىرى ترانسكونتينەنتتىك كولىك دالىزدەرى وتەدى.
«قازاقستان مەن گرۋزيا – ترانسكاسپي حالىقارالىق كولىك باعىتىن دامىتۋ اياسىندا بەلسەندى ىنتىماقتاستىقتا. اتالعان باعىت بويىنشا جۇكتەردى اۋىستىرىپ تيەۋ وتكەن جىلى 65%-عا, بيىلعى 8 ايدا 69%-عا ءوسىپ, 2,9 ملن تونناعا جەتتى. مەملەكەت باسشىسى ورتا ءدالىزدى دامىتۋعا ۇلكەن كوڭىل ءبولىپ وتىر, ءبىز بۇل باعىت بويىنشا تاسىمال كولەمىن 10 ملن تونناعا دەيىن جەتكىزۋدى كوزدەپ وتىرمىز. ول ءۇشىن ۇكىمەت ترانزيت جاعدايىن جاقسارتۋ بويىنشا دايەكتى شارالار قابىلداۋدا», دەدى ولجاس بەكتەنوۆ.
قر پرەمەر-ءمينيسترى باسەكەگە قابىلەتتى تاريفتىك شارتتاردى بەلگىلەۋ, جەتكىزۋ مەرزىمدەرىن قىسقارتۋ جانە تحكب بويىنشا, ونىڭ ىشىندە باكۋ – تبيليسي – كارس جەلىسى ارقىلى تاسىمالداۋ كولەمىن ۇلعايتۋ جونىندەگى بىرلەسكەن جۇمىستى جالعاستىرۋدىڭ ماڭىزدى ەكەنىن باسا ايتتى. سونىمەن قاتار كولىك ءدالىزىن بەلسەندى تۇردە تسيفرلاندىرۋ قاجەتتىگى انىقتالدى, بۇل اتالعان باعىتتىڭ حالىقارالىق تاسىمالداۋشىلار ءۇشىن تارتىمدىلىعىن ارتتىرادى.
ءوز كەزەگىندە لەۆان داۆيتاشۆيلي قازاقستانمەن ىنتىماقتاستىقتى نىعايتۋعا قىزىعۋشىلىق تانىتىپ, بۇل رەتتە ەكىجاقتى قاتىناستاردى دامىتۋعا جاڭا سەرپىن بەرۋگە ارنالعان ۇكىمەتارالىق كوميسسيانىڭ ەرەكشە ءرولىن اتاپ ءوتتى.
كەزدەسۋگە قاتىسۋشىلار ساۋدا-ەكونوميكالىق ارىپتەستىكتىڭ قارقىندى دامۋىن قامتاماسىز ەتۋ ءۇشىن كوپجوسپارلى جۇمىستى جالعاستىرۋ نيەتىن راستادى.
