سۋرەت: ru.freepik.com
بيىل اقپان ايىندا ۇلتتىق بانك توراعاسى تيمۋر سۇلەيمەنوۆ جىل سوڭىنا دەيىن بىرىڭعاي QR-كود تولەم جۇيەسى ىسكە قوسىلاتىنىن ايتقان ەدى. ءتىپتى باس بانك ەكىنشى دەڭگەيلى بانكتەردى وسى جۇيەگە قوسىلۋعا مىندەتتەۋى مۇمكىن دەپ ەسكەرتكەن-تۇعىن. بانكتەر باس تارتقان جاعدايدا ۇلتتىق بانك شارا قولدانباق. سەبەبى بۇل جۇيە – ەكونوميكالىق قاۋىپسىزدىكتىڭ قۇرامداس بولىگى. وزگەرىسكە نارىقتىق ۇدەرىس تۇرتكى بولىپ وتىر. ءساتتى جۇزەگە اسىرىلعان جاعدايدا, بانكتەردەگى تولەم جۇرگىزۋ ەداۋىر جەڭىلدەمەك.
جايلى باستاما جاقسى جاڭالىق بولعانىمەن, دايىندىعى ءبىرشاما ۋاقىتقا سوزىلدى. ەندى ۇلتتىق بانك مۇنى 2025 جىلدىڭ ءبىرىنشى جارتىسىنا جوسپارلاپ وتىر. بۇل تۋرالى ۇلتتىق تولەم كورپوراتسياسىنىڭ توراعاسى بينۇر جالەنوۆ ايتتى.
«بيىل بانكارالىق اۋدارىمدار مۇمكىندىگىن تەلەفون ءنومىرى بويىنشا, ال كەلەسى جىلدىڭ ءبىرىنشى جارتىسىندا بىرىڭعاي QR ارقىلى قوسامىز دەگەن جوسپار بار. وسى باعىتتا جۇمىس ءجۇرىپ جاتىر», دەدى ول.
كەشە استانادا وتكەن «جاڭا الەمدەگى حالىقارالىق قارجى جۇيەسى» كونفەرەنتسياسىندا وسى تۋرالى تولىق مالىمەت سۇرادىق. سوندا QR-كودتى پايدالانۋ كەزىندە كوميسسيا بولمايتىنىن, سونداي-اق جۇيەنىڭ جىل سوڭىنا دەيىن نەگە دايىن بولماعانىن ءتۇسىندىردى.
– ءبىز جۇيەنى بيىل ىسكە قوسامىز دەپ ايتقان ەدىك. قازىر جۇيە بار, تەك بانكتەردى قوسۋ ۇدەرىسى ءجۇرىپ جاتىر. ءار بانكتىڭ ءوز بەكلوگى, وزىندىك دامۋ جولى بارىن ەستەن شىعارماعان ءجون. وسى ارەكەتتەردىڭ بارلىعىن جەدەلدەتۋگە جۇمىس ىستەپ جاتىرمىز. بيىل تەلەفون نومىرلەرى بويىنشا اۋدارما قىزمەتى ىسكە قوسىلادى جانە QR-كودتى سىناقتان وتكىزبەكپىز. قازىر تاريف ماسەلەسى تالقىلانىپ جاتىر. بۇل قولدانىستاعى شەشىمدەرگە قاراعاندا تيىمدىرەك بولادى. بىراق ولاردىڭ شوتتارى اراسىندا تۇتىنۋشىلارعا كوميسسيا بولمايدى. بىرىڭعاي QR-كودتى ءوزىمىزدىڭ ازىرلەۋشىلەر جاساپ جاتىر, – دەدى ب. جالەنوۆ.
سونىمەن قاتار ول ءبارىن الدىمەن تەكسەرىستەن وتكىزۋدىڭ ماڭىزىنا ەرەكشە توقتالدى. سەبەبى بۇل حالىقتىڭ اقشاسى دەيدى. ەگەر قانداي دا ءبىر قاتەلىك بولسا, ادامدار اقشاسىن جوعالتۋى مۇمكىن. سول ءۇشىن دە ساپاعا باسا ءمان بەرۋ كەرەك.
