قولجەتىمدى تۇرعىن ۇيمەن قامتىلادى

شىعىس قازاقستان وبلىسى اكىمدىگى مەن تۇرعىن ءۇي قۇرىلىس جيناق بانكى شىعىس قازاقستان تۇرعىندارىن قولجەتىمدى تۇرعىن ۇيمەن قامتاماسىز ەتۋگە تىزە قوستى. جۋىردا وسكەمەن قالاسىندا وبلىس اكىمى دانيال احمەتوۆ, «قازاقستاننىڭ تۇرعىن ءۇي قۇرى­لىس جيناق بانكى» اق باسقارما توراعاسى ايباتىر جۇماعۇلوۆ جانە «ەرتىس» اكك» ۇك» اق باس­قارما توراعاسى ماناربەك ساپار­عاليەۆ شىعىس قازاقتان وبلىسىندا تۇرعىن ءۇي قۇرىلىسىن سالۋ بويىنشا ۇشجاقتى مەموراندۋمعا قول قويدى. تاراپتار وڭىردە تۇرعىن ءۇي قۇ­­­رىلىسىن سالۋعا, ينفرا­قۇرىلىمنىڭ دامۋىنا, سونداي-اق وبلىس تۇرعىندارىن ساپالى الەۋمەتتىك باسپانامەن قام­تاماسىز ەتۋگە مۇددەلى ەكەنىن ءبىلدىردى. ەكونوم-كلاستاعى ۇيلەردىڭ قۇرىلىسى قۇرىلىس سالۋشىنىڭ, وبلىستىق بيۋدجەت قارجىسىنىڭ ەسەبىنەن جانە مەملەكەتتىك-جەكەمەنشىك سەرىكتەستىك قاعيداتى بويىنشا قارجىلاندىرىلماق. اكىمدىك قۇرىلىسقا قاجەت جەر تەلىمىن بەرۋدى, ونى ينجەنەرلىك ينفراقۇرىلىمدارمەن قامتا­ماسىز ەتۋدى, جوبالىق-سمەتالىق قۇجاتتاردىڭ ازىرلەنۋىن جانە تۇزەتىلۋىن باقىلاۋدى ءوز موينى­نا الماق. تۇرعىن ءۇي قۇرى­لى­سىنا تاپسىرىس بەرۋشى ءجا­نە ۇيىم­داستىرۋشى رەتىندە «ەرتىس» الەۋمەتتىك-كاسىپكەرلىك كورپوراتسياسى» ۇلتتىق كومپانيا­سى» اق ىسكە كىرىسپەك. ال تۇرعىن ءۇي قۇرىلىس جيناق بانكى بولسا, تۇرعىن ءۇيدى ساتىپ الۋشىلار پۋلىن قۇرادى. ازا­ماتتاردىڭ تۇرعىن ءۇي قۇرىلىس جيناعى ەسەبىنەن تۇرعىزىلعان باسپانالاردى وتكىزەتىن بولادى. سونىمەن قاتار, قۇرىلىس سالۋشىلاردى قارجىلاندىرۋ ءۇشىن ەكىنشى دەڭگەيلى بانكتەرگە شارتتى دەپوزيتتەردى ورنالاستىرۋ ارقىلى, بانك قۇرىلىستى قارجىلاندىرۋعا نيەتتى. وسى­لايشا, قۇرىلىس كومپانيالارى تومەنگى مولشەرلەمەمەن كرەديتكە قول جەتكىزەدى. بۇل ايماقتاعى قۇرىلىس سالاسىنىڭ دامۋىنا سەرپىن بەرمەك. مالىمەت ءۇشىن. باعدارلاما جۇزەگە اسىرىلا باستاعاننان بەرى  شى­عىس قازاقستان وبلىسىن­دا, «قول­جەتىمدى تۇرعىن ءۇي-2020» باع­دار­­لاماسى اياسىندا, «حالىقتىڭ بارلىق ساناتىنا ارنالعان تۇرعىن ءۇي» باعىتى بويىنشا جالپى اۋدانى 110 مىڭ شارشى مەتر بولاتىن 1 810 پاتەرلى 25 تۇرعىن ءۇي قۇرىلىسىن سالۋ جانە ونى وتكىزۋ جونىندە ىنتىماقتاستىق تۋرالى كەلىسىمگە قول قويىلدى. بۇگىنگى كۇنى جالپى اۋدانى 59 مىڭ شارشى مەتر بولاتىن 949 پاتەرلى 15 تۇرعىن ءۇي پايدالانۋعا بەرىلدى. قول قويىلعان ىنتىماقتاستىق تۋرالى كەلىسىمگە سايكەس, اۋدانى 59 مىڭ شارشى مەتر بولاتىن 949 پاتەرلى 10 تۇر­عىن ءۇيدى پايدالانۋعا بەرۋ جوسپارلانىپ وتىر. بۇعان 5 378 ملن. تەڭگە جۇمسالماق. باعدارلاما قولعا الىنعالى بەرى شقو اكىمدىگىنە ساتىپ الىنعان پاتەرلەر ءۇشىن 4 306 ملن. تەڭگە اۋدارىلدى. 2015 جىلدىڭ العاشقى جارتى جىلدىعىندا 811 ملن. تەڭگە اۋدارۋ جوسپارلانىپ وتىر. «جاس وتباسىعا ارنالعان تۇر­عىن ءۇي» باعىتى بويىنشا جالپى اۋدانى 32,4 مىڭ شارشى مەتر بولاتىن 542 پاتەرلى 7 تۇرعىن ءۇي قۇرىلىسىن سالۋ جانە ونى وتكىزۋ جونىندەگى ىنتىماقتاستىق تۋرالى كەلىسىم جاسالدى. بىلتىر جالپى اۋدانى 6,4 مىڭ شارشى مەتر بولاتىن 107 پاتەرلى 2 تۇرعىن ءۇي پايدالانۋعا بەرىلدى. ەستەرىڭىزگە سالا كەتسەك, «قا­زاق­ستاننىڭ تۇرعىن ءۇي قۇ­­رىلىس جيناق بانكى» اق «بايتەرەك» ۇلتتىق باسقارۋشى حولدينگ» اق-تىڭ ەن­شىلەس كومپانياسى بولىپ تابىلادى. حولدينگتى قۇرۋداعى ماقسات – ەكونوميكانىڭ دامۋىنا جانە ونى ارتاراپتاندىرۋعا, كلاس­تەرلەردىڭ دامۋىنا جانە ەنشىلەس كومپانيا­لارىندا كور­پورا­تيۆتىك باسقارۋ جۇيەسىن جە­تىل­­دىرۋگە ىقپالداستىق جاساۋ. ميرا كاريموۆا.