وقىتۋشىلار مەن ستۋدەنتتەرگە ارناپ سالىنعان جاتاقحانا تولىقتاي جيھازبەن, تۇرمىستىق تەحنيكامەن قامتاماسىز ەتىلگەن.
جاڭا عيماراتتىڭ اشىلۋىندا وبلىس اكىمى ع.نۇرمۇحامبەتوۆ پەتروپاۆلدا بۇدان باسقا دا 1,2 مىڭ ورىنعا ارنالعان تاعى ءبىر جاتاقحانانىڭ قۇرىلىسى اياقتالۋعا جاقىن ەكەنىن جەتكىزدى. بۇل نىسان پايدالانۋعا بەرىلگەننەن كەيىن ۋنيۆەرسيتەت ستۋدەنتتەرى ءجۇز پايىز جاتاقحانامەن قامتىلادى. سونداي-اق عىلىم جانە جوعارى ءبىلىم ءمينيسترى ساياسات نۇربەك قازىر م.قوزىباەۆ ۋنيۆەرسيتەتىن حالىقارالىق زەرتتەۋ ۋنيۆەرسيتەتىنە اينالدىرۋ ماقساتى تۇرعانىن ايتتى.
«بۇل ۋنيۆەرسيتەت اكادەميالىق شەبەرلىك ورتالىق باعدارلاماسىنا تاڭداپ الىندى. ەندى جىل سايىن وقۋ ورىننىڭ الەۋەتىن كوتەرۋ مەن عىلىمي زەرتتەۋ جۇمىستارىنا بايلانىستى قوسىمشا قارجى الىپ وتىرادى», دەدى ول.
م.قوزىباەۆ اتىنداعى سولتۇستىك قازاقستان ۋنيۆەرسيتەتى 2022 جىلدان بەرى مەملەكەت باسشىسىنىڭ تاپسىرماسىمەن اقش-تىڭ اريزونا ۋنيۆەرسيتەتىمەن ىنتىماقتاستىق بايلانىس ورناتقان. بۇگىنگى تاڭدا ەكى جوعارى وقۋ ورنى اراسىندا ورتاق 16 جوبا ىسكە اسىپ وتىر. وسى باعىتتاعى قوسديپلومدىق باعدارلاما ءىت, بيوتەحنولوگيا جانە ينكليۋزيۆتىك ءبىلىم ۇردىسىندە وقىتىلادى. وقۋ باعدارلاماسى امەريكا, قازاقستان جانە باسقا دا شەتەل عالىمدارىنىڭ قاتىسۋىمەن اعىلشىن تىلىندە جۇرگىزىلەدى. 2025 جىلى اريزونا ۋنيۆەرسيتەتىنە ءۇشىنشى كۋرستىڭ 40 ستۋدەنتى اتتانىپ, سوندا ءبىلىم الادى. بۇعان كەتەتىن بارلىق شىعىندى م.قوزىباەۆ ۋنيۆەرسيتەتى كوتەرەدى. قازىرگى كۇنى قوس ەلدىڭ بىرلەسكەن باعدارلاماسىمەن 1 033 ستۋدەنت وقيدى. ولاردىڭ ءبارى ەلىمىزدىڭ ءار وڭىرىنەن كەلگەن. الداعى ءۇش جىلدا تاعى دا «بيزنەس جانە مەنەدجمەنت», «جالپى مەديتسينا», «سۋ رەسۋرستارى» بويىنشا وقۋ باعدارلاماسى ىسكە اسادى. وندا 1 500 ستۋدەنت ءبىلىم الادى دەپ جوسپارلانىپ وتىر.
سونىمەن قاتار اشىلۋ سالتاناتىندا اريزونا ۋنيۆەرسيتەتىنىڭ ۆيتسە-پرەزيدەنتى دجەنني لي دە ءسوز الىپ, م.قوزىباەۆ ۋنيۆەرسيتەتىن ارالاپ كورگەنىن تىلگە تيەك ەتتى.
ء«بىز ۋنيۆەرسيتەتتىڭ بارلىق كورپۋسىن ارالاپ كوردىك. شىنىمدى ايتسام, وقۋ ورنى ۇلكەن پروگرەسكە قول جەتكىزگەن ەكەن. اسىرەسە عىلىمي زەرتتەۋ ورتالىقتارى مەن اۋديتوريالاردىڭ ءبارى تالاپقا ساي جاسالعان. بەينەلەپ ايتقاندا, جايناپ تۇر. بيىل ءبىز دۋالدى وقۋ باعدارلاماسىمەن ءۇشىنشى جىل ستۋدەنتتەردى قابىلدايمىز. ەندى وسى جوبانىڭ تابىستى بولۋىنا كۇش سالامىز», دەدى ول.
قازىر م.قوزىباەۆ اتىنداعى سولتۇستىك قازاقستان ۋنيۆەرسيتەتىندە التى مىڭداي ستۋدەنت وقيدى. ونىڭ ىشىندە 1 200-دەن اسا ستۋدەنت جاتاقحانادا تۇرادى. اتالعان جوعارى وقۋ ورنى قازىر اريزونا ۋنيۆەرسيتەتىمەن عانا ەمەس, قىتايدىڭ سولتۇستىك-باتىس اۋىلشارۋاشىلىق جانە ورمان شارۋاشىلىعى ۋنيۆەرسيتەتىمەن دە بىرلەسىپ, ءۇش جاقتى سۋ رەسۋرستارىنىڭ ورتالىعىن اشۋدى كوزدەپ وتىر. بۇل تۋرالى مەموراندۋمعا بيىلعى ءساۋىر ايىندا ەلوردادا قول قويىلعان.
پەتروپاۆل
