بەرەكە باسى – بىرلىك
شىعىس وڭىرىندە قازاقستان حالقى اسسامبلەياسىنىڭ مۇشەلەرى ماراپاتتالدى
بيىل ەلىمىزدە بىرقاتار ايتۋلى مەرەيتويلار وتەتىنى ءمالىم. ونىڭ ىشىندە ەلىمىزدى ەڭسەلى ەرتەڭىنە تۇراقتىلىق پەن تاعاتتىلىق تاربيەسى ارقىلى جەتەلەپ كەلە جاتقان قازاقستان حالقى اسسامبلەياسىنىڭ قۇرىلعانىنا 20 جىل تولادى. وسى ورايدا ءوڭىر باسشىسى دانيال احمەتوۆ وبلىستىق دوستىق ۇيىندە قازاقستان حالقى اسسامبلەياسىنىڭ مۇشەلەرىمەن, ەتنومادەني بىرلەستىكتەردىڭ جەتەكشىلەرىمەن جانە قحا جانىنداعى عىلىمي-ساراپتامالىق توپ مۇشەلەرىمەن كەزدەستى.
تاتۋلىق پەن تاعاتتىلىق – جاڭا تۇرپاتتى قازاقستاننىڭ نەگىزگى دامۋ باسىمدىقتارىنىڭ ءبىرى. ەلباسى نۇرسۇلتان نازارباەۆتىڭ جاھان جۇرتى مويىنداعان ەتنوسارالىق بىرلىك مودەلىن جۇزەگە اسىرۋدى قامتاماسىز ەتۋ ماقساتىندا ەلىمىزدە جۇيەلى جۇمىستار اتقارىلۋدا. شىعىس ءوڭىرىنىڭ الەۋمەتتىك-ەكونوميكالىق دامۋىندا دا ەتنومادەني بىرلەستىكتەردىڭ وزىندىك ۇلەسى بار. كەزدەسۋ بارىسىندا وڭىردەگى قحا حاتشىلىعىنىڭ مەڭگەرۋشىسى ەركىنبەك ايازباەۆ 2014 جىلى جۇزەگە اسىرىلعان جۇمىستار جونىندە ەسەپ بەرىپ, اعىمداعى جىلى اتقارىلاتىن جۇمىس جوسپارىمەن ءبولىستى. حاتشىلىق مەڭگەرۋشىسىنىڭ ايتۋىنشا, وڭىردەگى قحا مۇشەلەرى مەن دوستىق ۇيلەرى وتكىزەتىن شارالاردىڭ سانى مەن ساپاسى جىل سايىن ارتىپ كەلەدى.
– شىعىس قازاقستان – وبلىستىق جانە رەسپۋبليكالىق دەڭگەيدە كەڭ قولداۋ تاۋىپ وتىرعان ەتنوسارالىق سالاداعى جاڭا يدەيالاردىڭ باستاماشىسى بولىپ وتىرعان ءوڭىر. ماسەلەن, سالت-ءداستۇر, تاجىريبە الماسۋ, شىعارماشىلىق ۇجىمداردىڭ, حالىقتىق ونەرپازداردىڭ جارقىن قويىلىمدارى ارقىلى ءبىر ماقساتقا جۇمىلدىرعان «بەيبىتشىلىك پەن كەلىسىمنىڭ جول كارتاسى» مەگا-اكتسياسى بىزدە عانا ەمەس, بارلىق وبلىستاردىڭ قالالارى مەن اۋداندارىندا وتكىزىلىپ, ۇلكەن قولداۋعا يە بولدى. 2014 جىلى اكتسيا شەڭبەرىندە ەلىمىز بەن «التاي – ءبىزدىڭ ورتاق ءۇيىمىز» جوباسى اياسىندا رەسەي, قىتاي جانە موڭعوليا سياقتى جاقىن ورنالاسقان مەملەكەتتەردەگى 113 ەلدى مەكەندى قامتىعان 137 ءىس-شارا ءوتتى. بۇل شارالار 200 مىڭنان استام ادامدى قامتىدى. الەۋمەتتىك تۇرعىدان از قامتىلعان ادامدارعا ماتەريالدىق تۇرعىدان كومەك كورسەتىلىپ, ءدارى-دارمەك, ازىق-ت ۇلىك سەبەتىن ساتىپ الۋعا جانە كوز ورتالىعىندا تەكسەرۋدەن وتۋگە جالپى سوماسى 4 ملن. 440 مىڭ تەڭگە قارجى ءبولىندى, – دەدى ەركىنبەك ايازباەۆ.
ە.ايازباەۆ قحا حاتشىلىعى اتىنان ۇلتارالىق كەلىسىمدى دامىتۋعا ۇلەس قوسقان بارلىق قوعام وكىلدەرىنە ريزاشىلىعىن ءبىلدىرىپ, بيىلعى اسسامبلەيا جىلىندا ەلىمىزدە تۇراقتىلىق پەن تاتۋلىقتىڭ تاعى دا سالتانات قۇراتىنىن, وعان بارشا وتانداستارمەن بىرگە شىعىسقازاقستاندىقتاردىڭ دا بەلسەنە قاتىساتىنىنا سەنىم بىلدىرەتىنىن جەتكىزدى.
بۇدان كەيىن ءسوز العان قحا جانىنداعى عىلىمي-ساراپتامالىق توپتىڭ جەتەكشىسى ليۋتسيا ابدۋللينا اسسامبلەيانىڭ سوڭعى جىلدارى ءىرى قوعامدىق ينستيتۋتقا اينالعانىن ايتتى.
– عىلىمي-ساراپتامالىق توپ مۇشەلەرى بارلىق ءبىلىم مەكەمەلەرىن ءبىر جوباعا جۇمىلدىرىپ, جاستارمەن جۇمىس ىستەۋگە, يننوۆاتسيالىق شەشىمدەردى ەنگىزۋگە ۇلكەن ءمان بەرەدى. ۋنيۆەرسيتەتتەگى اسسامبلەيا كافەدراسىندا, «نازارباەۆتانۋ» جانە «التايتانۋ» ورتالىقتارىندا عىلىمي جوبالار, ساراپتامالار جۇرگىزىلدى. وڭىردەگى جوعارى وقۋ ورىندارىنىڭ عالىمدارى مەن وقىتۋشىلارى دا اتالعان سالادا ءوز ۇسىنىستارى مەن يدەيالارىن بولىسۋدە. مەملەكەتتىڭ قارىشتى دامۋىنداعى ساتتىلىكتەر ەڭ الدىمەن جالپىحالىقتىق بىرلىكپەن, بارشا ۇلىستاردىڭ ءتىلى مەن دىلىنە, سالتى مەن داستۇرىنە دەگەن قۇرمەتپەن بەكىتىلەدى. اسسامبلەيا قۇرىلىمى ارقىلى ازاماتتاردىڭ اراسىندا سەنىم مەن كەلىسىم, ءوزارا تۇسىنىستىك اۋراسى قالىپتاستى. كەز كەلگەن قازاقستاندىق ۇلتى مەن ناسىلىنە, ءدىني نانىمىنا قاراماستان كونستيتۋتسيا اياسىندا بەكىتىلگەن جانە كەپىلدىك بەرىلگەن ازاماتتىق قۇقىقتارى مەن ەركىندىگىن پايدالانا الادى, – دەدى ول.
سونداي-اق, ليۋتسيا يلداروۆنا ەلدەگى تۇراقتىلىقتى قامتاماسىز ەتۋدىڭ نەگىزگى كىلتى كەيبىر ەلەكتروندى اقپارات قۇرالدارى ارقىلى تارالاتىن بوگدە يدەولوگيالىق اعىمدارعا توسقاۋىل قويۋدا جاتقانىن جەتكىزدى. ونىڭ ايتۋىنشا, قازاقستاندا اتالعان ماسەلەنىڭ اۋا جايىلماۋىنا قوعامدىق بىرلەستىكتەردىڭ جۇمىسىن ءبىر ارناعا توعىستىرۋ ارقىلى قول جەتكىزۋگە بولادى. بۇل رەتتە وبلىستاعى تۇلەۋ مەكتەبىندە مەملەكەتتىك ءتىلدى ۇيرەتۋ, ءتۇرلى ۇلت وكىلدەرىنىڭ ءتىلى مەن مادەنيەتىن, تاريحىن وقىتۋ جولعا قويىلعان.
جيىندا ءسوز العان قحا مۇشەلەرى اسسامبلەيانىڭ قۇرىلۋى مەن نىعايۋىنا اتسالىسقان ۇيىمداردىڭ قاتارىندا شىعىسقازاقستاندىقتاردىڭ ەسىمدەرى ەرەكشە اتالاتىنىن, اتالعان قۇرىلىم ەتنومادەني ورتالىقتاردىڭ جۇمىسىن جۇيەلەۋگە ىقپال ەتكەنىن اتاپ ءوتتى. ماسەلەن, د.سەرىكباەۆ اتىنداعى شقمتۋ ساياساتتانۋ جانە فيلوسوفيا كافەدراسىنىڭ پروفەسسورى ليديا ستولياروۆا كوپتەگەن رەسپۋبليكالىق قۇجاتتاردىڭ نەگىزىندە شىعىس ءوڭىرى عالىمدارىنىڭ ناقتى ۇسىنىستارى مەن ەڭبەگى بار ەكەنىن اتاپ ءوتىپ, تەك وبلىس كولەمىندە عانا ەمەس, الەمنىڭ بىرنەشە مەملەكەتتەرىنەن كەلگەن وكىلدەردىڭ قاتىسۋىمەن 14 عىلىمي-تاجىريبەلىك كونفەرەنتسيا وتكەنىن جەتكىزدى.
كەزدەسۋدى قورىتىندىلاعان وبلىس اكىمى دانيال احمەتوۆ ەلباسىنىڭ باسشىلىعىمەن قازاقستان حالقى اسسامبلەياسىنىڭ ەلىمىزدەگى بەيبىتشىلىكتى ساقتاۋدا بارلىق بيلىك ورگاندارى مەن قوعامدىق ينستيتۋتتاردى, ۇلت پەن ۇلىس وكىلدەرىن ءبىر ماقساتقا بىرىكتىرىپ, بىرەگەي ۇلتارالىق ساياساتتى جۇرگىزۋگە مۇرىندىق بولىپ وتىرعانىن اتاپ ءوتتى.
– قازاقستاندا بارلىق ەتنوستاردىڭ ءداستۇرى مەن ءتىلىن, مادەنيەتىن دامىتۋعا وتە قولايلى جاعداي جاسالعان. اسسامبلەيا قىزمەتىنىڭ ارقاسىندا مەملەكەتىمىزدىڭ ەتنوسارالىق ماسەلەلەردى ءتيىمدى شەشۋىنە مۇمكىندىك تۋدى. وسى ارقىلى ەلىمىزدىڭ حالىقارالىق قاۋىمداستىقتاعى ابىرويى كۇن ساناپ ءوسىپ كەلەدى. قىرعىزستانداعى, ۋكرايناداعى جاعدايلار ەلدىڭ الەۋمەتتىك-ەكونوميكالىق دامۋىنىڭ تۇراقتىلىعىنا نۇقسان كەلتىرگەنىن كورىپ وتىرمىز. ۋكراينا كەڭەستىك كەزەڭدە ەكونوميكاسى جاعىنان ۇلگى الاتىن ەل بولاتىن. الايدا, بۇگىنگى تاڭداعى كەلىسپەۋشىلىكتەر ەلدى ەكىگە ءبولدى. بىزدە ۋكرايناداعىداي كەمە قۇرىلىسى مەن ەۋروپالىق ەلدەرگە شىعاتىن مۇمكىندىك جوق. الايدا, بىزدە پرەزيدەنتىمىزدىڭ جۇرگىزىپ وتىرعان كەمەل ساياساتى بار. قازىرگى كەزدە حالقىنىڭ سانى جاعىنان ءۇش ەسەگە از بولعانىمەن قازاقستاننىڭ ىشكى جالپى ءونىمى ۋكراينادان جوعارى بولىپ وتىر. مۇنىڭ بارلىعى مەملەكەتتەگى ەتنوسارالىق تۇراقتىلىقتىڭ ناتيجەسى. قانشاما مەكتەپتەر, اۋرۋحانالار, جولدار سالىندى. ءالى دە سالىنادى. ءبىز وسى ءتيىمدى ساياساتتى ءارى قاراي جالعاستىرا الساق, ءوزىمىز ءومىر ءسۇرىپ وتىرعان ەلدى, قالانى تاعى دا دامىتا تۇسەتىن بولامىز. وسى جەردە ءونىپ-ءوسىپ وتىرعان حالىق بولعاندىقتان, ءبىر-ءبىرىمىزدىڭ ءداستۇرىمىز بەن تىلىمىزگە دەگەن قۇرمەتىمىز جوعارى بولۋى كەرەك. بۇل ءۇردىس ۇرپاقتان ۇرپاققا الماسۋى قاجەت, – دەدى ءوڭىر باسشىسى دانيال احمەتوۆ.
اسسامبلەيانىڭ العاشقى جيىنى ماراپاتتاۋ سالتاناتىمەن اياقتالدى. اتاپ ايتقاندا, قحا مۇشەسى ۆلاديمير اكۋلوۆ, «باشقۇل» اۋداندىق تاتار مادەني ورتالىعى» قوعامدىق بىرلەستىگىنىڭ توراعاسى رينات حاميتوۆ جانە بەسقاراعاي اۋداندىق ءماسليحاتىنىڭ دەپۋتاتى, قحا دەپۋتاتتىق توبىنىڭ مۇشەسى ۆياچەسلاۆ حارچەنكو «بىرلىك» التىن مەدالىمەن ماراپاتتالدى. سونىمەن بىرگە, بەلورۋس ەتنومادەني بىرلەستىگىنىڭ توراعاسى گالينا جامپەيىسوۆا مەن قحا عىلىمي-ساراپتامالىق توبىنىڭ مۇشەسى الەكسەي الەكسەەنكو قازاقستان حالقى اسسامبلەياسىنىڭ العىس حاتىنا يە بولدى.
دۋمان اناش,
«ەگەمەن قازاقستان».
وسكەمەن.
قازاق جەرىنە ۇزاتىلعانىما ەش وكىنبەيمىن
مەنىڭ قازاقستانعا كەلىن بولىپ ءتۇسۋىم قىزىق. بالا كەزىمىزدە اتا-اجەلەرىمنەن بۇل ەل تۋرالى, قازاقتاردىڭ مەيماندوس, اقجارقىن قاسيەتتەرى جايلى ەستىپ جۇرەتىنمىن. بىردە كاۆكازعا قوناققا كەلگەن اعايىنداردىڭ تويىندا ءبىر جاس جىگىت مەنىمەن ارنايى تانىسىپ, اڭگىمەمىز جاراسىپ كەتتى. ءسىرا, مەنى ۇناتقان بولۋ كەرەك, ارادا ءبىراز ۋاقىت وتكەننەن كەيىن تۇرمىسقا شىعۋعا قولقا سالدى. مەن دە ىشتەي قارسى ەمەسپىن. سالا دەگەن ەسىمىنە, ءتۇر-تۇلعاسىنا كوڭىل تويادى. بولاشاق جۇبايىم «قازاقستاننانمىن» دەگەنىنە ءىشىم جىلىپ سالا بەرسە دە, تۋعان-تۋىستارىمدى, كىندىك قانىم تامعان اتامەكەنىمدى قيا الماي ءجۇردىم. قىزدىڭ جاتجۇرتتىققا جارالعانىن مويىنداعان كۇيى اكە-شەشەمنىڭ اق باتاسىن العاننان كەيىن قول ۇستاسىپ كەتە باردىق.
قاپ تاۋىنىڭ ارعى جاعىنان قازاق جەرىنە ۇزاتىلعانىما, تاعدىرىمنىڭ بۇل جازۋىنا ەش وكىنبەيمىن. كەرىسىنشە, وتە ريزامىن! تىنىشتىقتىڭ تال بەسىگىندە تەربەتىلگەن ەلدە وتباسىن قۇرىپ, تامىر جايدىق. سۇلتان, حاسان ەسىمدى ۇلدارىم دۇنيەگە كەلدى. اتا, اجە اتاندىق. بۇدان اسقان ارمان جوق شىعار. ومىردە ءوز ورنىڭدى تاۋىپ, ەلگە, قوعامعا پايدا كەلتىرگەننىڭ ءوزى زور باقىت ەمەس پە؟! ءبىزدىڭ وتباسى مۇشەلەرى تۇگەلىمەن ىشكى ىستەر سالاسىندا ءمىنسىز قىزمەت ەتىپ, اۋلەت ابىرويىن اسىردى. اكە جولىن جالعاستىرعان جۇبايىم قازىر زەينەتتە. وتاعاسىنان ۇلگى-ونەگە العان ۇلدارىمىزدى جاستايىنان ەلدى, جەردى سۇيۋگە, ۇلكەندى قادىرلەۋگە تاربيەلەدىك. تاۋەلسىز مەملەكەتىمىزدىڭ ودان ءارى دامىپ, كوركەيۋىنە وزىندىك ۇلەس قوسىپ جۇرگەنىمىزدى اركەز مارتەبە سانايمىز. نەمەرەلەرىم دە جاس قۇراقتاي جەلكىلدەپ ءوسىپ كەلەدى. ولارعا دا قازاقستاندىق پاتريوتيزم قاسيەتتەرى ءتان. “ەلىم!” دەپ كەلگەن ءار ادامدى جاتسىنباي قۇشاق جايا قارسى الاتىن قازاق ەلى وسىلايشا ماگومەدوۆتەر اۋلەتىنىڭ وتانىنا اينالدى. جۇرەگىمىز دە, تىلەگىمىز دە قازاقستاندىقتارمەن ءبىر.
ءبىزدىڭ وتباسى مەملەكەت باسشىسىنىڭ باستاماسىمەن ءبىرىنشى رەت وتكىزىلگەن “مەرەيلى وتباسى” ۇلتتىق بايقاۋىنا قاتىسىپ, وبلىستا ءبىرىنشى ورىندى جەڭىپ الدى. استانا قالاسىندا ۇيىمداستىرىلعان اقتىق بايقاۋعا قاتىسۋ مۇمكىندىگىنە يە بولدىق. وتباسى مارتەبەسىن ناسيحاتتاۋعا باعىتتالعان ۇلكەن ءىس-شارادا نۇرسۇلتان ابىش ۇلىمەن تىلدەسۋدىڭ ءساتى تۇسكەنىن قالاي عانا ۇمىتارمىز! پرەزيدەنتىمىزدىڭ ءسوزى ءبارىمىزدى تولعاندىردى. مەملەكەت باسشىسى اتىنان تارتۋ ەتىلگەن جەڭىل كولىك ءمىنىپ قايتتىق. ەلىمىزدىڭ تۇكپىر-تۇكپىرىنەن كەلگەن ونەگەلى وتباسىلاردىڭ باسىن بىرىكتىرگەن فەستيۆال بەرەكە, بىرلىكتىڭ سيمۆولى رەتىندە ەستە قالدى. وتباسىنىڭ قوعامداعى الاتىن زور ءرولىن ايعاقتاپ بەردى.
ءوز باسىم بەيبىتشىلىكتى باعالاي بىلەتىن, اۋىزبىرلىگى جاراسقان ەلدە تۇرىپ جاتقانىما وتە قۋانىشتىمىن. كيەلى دە قاسيەتتى جەرگە كەلىن بولىپ تۇسكەنىمدى باسىما قونعان باق قۇسى دەپ ويلايمىن. تۇڭعىش پرەزيدەنتىمىز كوپ ۇلتتىڭ باسىن بىرىكتىرىپ, بارلىق ازاماتتارعا تەڭ مۇمكىندىك جاساپ, سونىڭ ارقاسىندا ەلىمىزدە تۇراقتىلىق, تىنىشتىق ورناعانىن باسا ايتقىم كەلەدى. وركەنيەتتى ەلدەر قاتارىنا قوسىلۋ ۇمتىلىسىمىزدى جارقىن بولاشاققا باستايتىن باسپالداق دەپ ەسەپتەيمىن.
ءبىر كەزدەرى باقىت قۇسىنىڭ قاناتىنا ىلەسىپ كەلگەن قازاقستان قازىر تۋعان ءۇيىمىز سانالادى. قازاق جەرىندە ۇرپاق ساباقتاستىعىن جالعاستىرىپ كەلەمىز. بار تىلەۋىم – ەلىمنىڭ اماندىعى!
ماككا ماگومەدوۆا.
سولتۇستىك قازاقستان وبلىسى,
قىزىلجار اۋدانى.
ەڭبەگىمىز جاندى دەگەن وسى
«بىرلىك بولماي, تىرلىك بولماس» دەگەن اتام قازاق. بەرەكەنى كوزدەگەن ەل مەرەكەلى تىرلىك جاساۋدان جالىقپاعان. بيىل قازاقستان حالقى اسسامبلەياسىنىڭ جىلى اتاپ وتىلەدى. «بەرەكە باستاۋى – بىرلىك, ەل ءىشى – تاتۋ تىرلىك» قاعيداسىن ۇستانعان ەل ءۇشىن بۇل مەيرامنىڭ ورنى ەرەكشە. ال جىل سايىن اتاۋلى مەرەكەدە 1 مامىر – قازاقستان حالقىنىڭ بىرلىگى كۇنىندە ەل اۋماعىندا تۇرىپ جاتقان 130-دان استام ۇلت پەن ۇلىس وكىلدەرى كيەلى قارا شاڭىراقتا تاتۋ-ءتاتتى, بەرەكە مەن بىرلىكتە, بەيبىتشىلىك پەن ىنتىماقتا ءومىر ءسۇرىپ جاتقاندىعىن كەڭ كولەمدە اتاپ وتەدى. تاراز قالاسىنداعى №6 قالالىق ەمحاناسىندا قازاق, ورىس, وزبەك, قىرعىز, تاتار, دۇنگەن, كۇرد, ماري ۇلتتارىنان قۇرالعان مەديتسينا قىزمەتكەرلەرى ءبىر ۇجىمدا بىرنەشە جىلدان بەرى تاتۋ-ءتاتتى, ىنتىماقتى ەڭبەك ەتۋدە. جاقىندا وسى ەمحانادان تەكسەرىلىپ, بويىنداعى سىر بەرىپ جۇرگەن اقاۋىنىڭ سەبەبىن ءبىلىپ, ونى وسى جاڭا تەحنولوگيالارمەن جابدىقتالعان زاماناۋي مەكەمەدە ەمدەپ, دەرتىنىڭ الدىن العان قالا تۇرعىنى فيرۋزا كوشاروۆا شاعىم-ۇسىنىس كىتابىندا بىلاي دەپ جازىپتى: «مەن وسى ەمحانادا 15 جىلدان بەرى ەسەپتە تۇرامىن. اۋرۋىمىز سىر بەرىپ, دەرتىمىز دەندەسە, بىردەن وسى جەردەن تابىلامىز. قاي كەزدە كەلسەك تە, جىلى شىراي تىنىتىپ, ك ۇلىپ قارسى الىپ, اۋرۋىمىزعا شيپا تابۋعا تىرىساتىن ەمحانا ۇجىمى – ءبىزدىڭ ءوز ءۇيىمىز بولىپ كەتكەن. مەن – دۇنگەن ۇلتىنىڭ وكىلىمىن. وتباسىمىزبەن ەڭبەكقورمىز. وعان ساي دەنساۋلىعىمىز بولۋى قاجەت. وسى ەمحانا ءبىزدىڭ بارلىق قاجەتتىلىگىمىزدى ورىنداپ, دەنىمىزدىڭ ساۋ بولۋىنا بىردەن-ءبىر ىقپال ەتىپ كەلە جاتىر». ال ۆالەنتينا يۆانوۆا دەگەن قالا تۇرعىنى وسى ەمحانانىڭ دارىگەرلەرى پاتيما قوسجانوۆا, فەرۋزا قويلانوۆاعا العىستارىن جەتكىزە وتىرىپ, شىن نيەتتەرىمەن ولاردىڭ ادامگەرشىلىك قاسيەتتەرىنە باس يەتىندەرىن ايتادى. جالپى, دارىگەرلەرگە شىن پەيىلىمەن ريزاشىلىقتارىن ءبىلدىرىپ جاتاتىندار از ەمەس. وسىنداي جىلى سوزدەردى ەستىگەندە, العىسىنان ۇرىسى كوپ جۇمىسىمىزدان راحات تاپقانداي, ريزا بولىپ قالامىز. «ەڭبەگىمىز جاندى دەگەن وسى بولار», دەپ قويامىز. بارلىق ۇلتتاردىڭ اراسىنداعى دوستىقتى نىعايتىپ, ىنتىماعىن جاراستىراتىن ايتۋلى جىلدا بىرلىگىمىز جاراسىپ, ەلىمىز تىنىش بولىپ, تاتۋلىقتا, بەيبىت ومىردە كۇن كەشەيىك, ەندەشە! دۇيسەكۇل كەرىمباەۆا, №6 قالالىق ەمحانانىڭ باس دارىگەرى. تاراز.
