سۋرەتتى تۇسىرگەن – يگور بۋرگاندينوۆ
سەرىكتەستىكتىڭ باس ديرەكتورى ديحان قامزابەك ۇلى ءسات بەسىمباي ۇلىن مەملەكەت باسشىسى قاسىم-جومارت توقاەۆتىڭ قولىنان العان ەڭ جوعارى ماراپاتىمەن قۇتتىقتاپ, «حالىق قاھارمانى» اتاعى كەزەكتى مارتە ءوز يەسىن تاپقانىن تىلگە تيەك ەتتى. كەزدەسۋ بارىسىندا قادىرمەندى قوناقتىڭ ەلىمىزدىڭ تاۋەلسىزدىك العاننان كەيىنگى ەڭ العاشقى قيىن جىلداردا, ەڭ جاۋاپتى لاۋازىمداردا قىزمەت ەتكەنى اڭگىمە ارقاۋىنا اينالدى. اياعىنان ءتاي-ءتاي باسقان جاس مەملەكەتتىڭ ۇلتتىق قاۋىپسىزدىك سالاسىن, ودان كەيىن قورعانىس سالاسىن باسقارۋ, ونى جاڭا دەڭگەيگە شىعارۋ تەك قابىلەتتى دە قارىمدى ادامنىڭ عانا قولىنان كەلەتىن. ءسات بەسىمباي ۇلى ەل باسشىلىعى جۇكتەگەن وسى تاپسىرمالاردىڭ ۇدەسىنەن شىعىپ, قولىنا قانداي قىزمەتتى ۇستاسا دا, ءاپ دەگەننەن ءۇيىرىپ اكەتىپ وتىردى.
ء«سىز قورعانىس ءمينيسترى بولىپ تاعايىندالعان كەزدە 1992-1993 جىلدارى باستالعان اۋىرتپالىق ءالى دە اسكەر سالاسىنا سالماعىن سالىپ تۇرعان ەدى. سونىڭ بارىنە قاراماي قيىننان قيىستىرىپ جول تاۋىپ, قورعانىس سالاسىنا بىرقاتار رەفورما جۇرگىزدىڭىز. ءسىزدىڭ ۇيىتقى بولۋىڭىزبەن ەلدىڭ ىشكى جالپى ءونىمىنىڭ 1 پايىزى قورعانىس سالاسىنا جۇمسالاتىن بولدى. سول جىلدارى ۋاقىت تالابىنا جاۋاپ بەرەتىن ەكىنشى اسكەري دوكترينا قابىلداندى. وسىنداي سۇبەلى ەڭبەكتەرىڭىزدىڭ ءبارى بۇگىنگىدەي ۇلكەن ماراپات يەسى اتانۋىڭىزعا سەپتىگىن تيگىزگەنىنە ءشۇبا جوق», دەدى ديحان قامزابەك ۇلى.
ءسات توقپاقباەۆ ءوز كەزەگىندە ەلىمىزدىڭ بارلىق سالاسىندا بولىپ جاتقان ەلەۋلى جاڭالىقتاردى قالت جىبەرمەي, حالىققا جەتكىزىپ وتىرعان «Egemen Qazaqstan» جانە «كازاحستانسكايا پراۆدا» گازەتتەرى رەداكتسياسىنا كەلۋى دە بەكەردەن ەمەس ەكەنىن جەتكىزدى. ء«باسپاسوز – ءاربىر مەملەكەت ءۇشىن اسكەري تەحنيكادان كەم تۇسپەيتىن قارۋ. جۋرناليستەر – سول مايدانداعى ساربازدار. سىزدەردىڭ جاساپ جاتقان ەڭبەكتەرىڭىز زور. ەلىمىزدىڭ قورعانىس جانە ۇلتتىق قاۋىپسىزدىك سالاسىنداعى بارلىق جاڭالىق پەن جەتىستىكتەردى ناسيحاتتاپ كەلەسىزدەر. بۇگىنگى الىپ جاتقان ماراپاتىما وراي قۋانىشىمدى سىزدەرمەن دە بولىسكەندى ءجون كورىپ, ارنايى كەلىپ وتىرمىن», دەدى حالىق قاھارمانى.
كەزدەسۋ سوڭىندا ءسات بەسىمباي ۇلى رەداكتسيا ۇجىمىمەن ەستەلىك سۋرەتكە ءتۇستى.
