سۋرەتتى تۇسىرگەن – اۆتور
«كاتونقاراعاي, زايسان جانە كەندىرلى وڭىرلەرىنىڭ دە تۋريستىك الەۋەتىن دۇرىس پايدالانۋ قاجەت. وسىنداي دەمالىس ايماقتارىندا ساپاسى جوعارى جول ينفراقۇرىلىمى بار اۋە بەكەتتەرى مەن اۋەجايلار سالۋ كەرەك», دەدى پرەزيدەنت قاسىم-جومارت توقاەۆ. بۇل ءسوزدى ەستىگەن كاتونقاراعاي, زايسان, تارباعاتاي تۇرعىندارى ءبىر-بىرىنەن ءسۇيىنشى سۇراسىپ, قۇتتى بولسىن ايتىسىپ كەتكەن. مىناۋ قاربالاسقان زاماندا اۋداندارعا ۇشاقتىڭ ۇشۋى كوپشىلىكتىڭ قولىن ەداۋىر ۇزارتادى. ەڭ باستىسى, تابيعاتى اسەم وڭىرلەرگە باراتىن تۋريستەردىڭ سانى ەسەلەنەدى. بەرەل قورىق-مۋزەيىنىڭ ديرەكتورى الماس سارباسوۆتىڭ ايتۋىنشا, ەندى لەك-لەگىمەن كەلەتىن تۋريستەردى قابىلداپ, ساپالى قىزمەت كورسەتىلۋگە ءتيىس.
– ءبىزدىڭ مۋزەيگە ماۋسىمىندا 11 مىڭداي تۋريست كەلىپ, تاماشالايتىن. ەندى اۋەجاي سالىنىپ, ۇلكەن اۋە كەمەلەرى قاتىنايتىن بولسا, بۇل سان ەسەلەنەدى. سوندىقتان مۋزەيلەر مەن تۋريستىك ورتالىقتار قىزمەت كورسەتۋدى جەتىلدىرۋى كەرەك. تۋريستىك وپەراتورلار دا جاۋاپكەرشىلىكتى سەزىنەدى. تۋريستەر ۇشاقپەن كەلگەندىكتەن, ولارعا مۇندا قاتىناپ تۇرۋى ءۇشىن كولىك قاجەت. دەمەك جەرگىلىكتى جۇرت ولارعا قىزمەت كورسەتەدى. قاراپايىم تىلمەن ايتساق, تىرشىلىك قايناي تۇسەدى, – دەيدى بەرەل قورىق-مۋزەيىنىڭ باسشىسى الماس سارباسوۆ.
ءيا, اۋەجاي اشىلىپ, جولدار جوندەلسە, تۋريزم مەن كاسىپكەرلىك ءسوزسىز داميدى. جەرگىلىكتى تۇرعىندارعا تەك ەرىنبەي ەڭبەك ەتۋ كەرەك. ولارعا مەملەكەت تاراپىنان بەرىلەتىن ءتۇرلى جەڭىلدىكتەردىڭ بارى دا راس. دەر كەزىندە پايدالانا بىلسە, بولعانى.
– اۋەجاي سالىنادى دەگەندى پرەزيدەنت اۋزىنان ەستىپ, قۋانىشىمىز اۋەلەپ كەتتى. ول دەگەن اۋدانىمىزدىڭ دامۋىنا ۇلكەن سەرپىن بەرەدى. اۋدان اشىلعاندا قالاي قۋانساق, بۇگىن سولاي قۋانىپ جاتىرمىز, – دەيدى كاتونقاراعايدىڭ تۇرعىنى, ارداگەر سپورتشى قابدول ماميەۆ.
ءدال وسىلاي تارباعاتاي تۇرعىندارى دا الاقايلاپ ءجۇر. زايسان اۋدانىندا اشىلاتىن اۋەجايعا ولار نەگە مالاقايلارىن اسپانعا اتتى دەيمىز عوي. سويتسەك, كورشىلەس اۋداننىڭ اۋەجايىنا تارباعاتاي اۋدانىنىڭ ورتالىعى اقجاردان 30-40 مينۋتتا جەتىپ بارۋعا بولادى ەكەن.
– مەملەكەت باسشىسىنىڭ جولداۋىن تىڭداپ وتىرىپ, زايسان اۋدانىندا اۋەجايدىڭ بوي كوتەرەتىنىن ايتقاندا, توبەمىز كوككە جەتكەندەي بولدى. سەبەبى بىزگە جاقىن. مىنا تۇرعان جەر. قالالىق جەردە دە اۋەجايعا جارتى ساعات, كەيدە ءبىر ساعات ءجۇرىپ بارادى. ال بىزگە جارتى-اق ساعاتتىق جەرگە ۇشاق قونادى. بۇل جاڭالىقتى بۇعان دەيىن ەستىسەك تە, ارعى جاعىمىزدا كۇمان بولعان. پرەزيدەنت ايتقان سوڭ انىق كوزىمىز جەتتى. سەنىم ءبىلدىرىپ وتىرعانىمىز, قاسىم-جومارت توقاەۆ كۇرشىمگە كوپىر سالىنسىن دەدى مە, انە, جەلتوقساندا اشىلادى. ەلدىڭ ەلۋ جىلدان بەرى شەشىلمەي كەلە جاتقان ماسەلەسىن ءبىر-اق ساتتە شەشكەن مەملەكەت باسشىسىنا مىڭ العىس, – دەيدى تارباعاتاي اۋدانىنىڭ تۇرعىنى گۇلنۇر بولاتوۆا.
الەۋمەتتىڭ اۋەلگى ارمانى – اۋەجاي جولداۋدا ايتىلدى. حالىق قۋاندى. ەندىگى ماسەلە – قۇرىلىسى قاشان باستالادى؟ بۇل سۇراقتى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان جۇمادىلوۆكە قويدىق.
– ەكى اۋەجاي بويىنشا ناقتى تاپسىرما بەرىلدى. جۇمىستار 2025 جىلدىڭ كوكتەمىنە قاراي باستالادى. ۇشۋ الاڭدارىنىڭ ۇزىندىعى 2100 مەتر بولادى. جوبالاۋ جۇمىستارى باستالماس بۇرىن توپوگرافيالىق اەروتۇسىرىلىم جاسالادى. ايتا كەتەيىن, زەرتتەۋ ناتيجەسىندە كاتونقاراعاي اۋلىنىڭ وزىندە ۇشاقتاردىڭ ۇشىپ-قونۋى قولايسىز بولسا, سولداتوۆ اۋلىنىڭ تۇسىنداعى جازىقتى قاراستىرامىز. ال زايسان اۋدانى بويىنشا ءساتباي اۋلىنداعى ەسكى اسكەري اۋەجايدىڭ ورنىن قاراستىردىق. ول تارباعاتاي اۋدانى تۇرعىندارىنا دا جاقىن بولماق. مارقاكول اۋدانىنا دا ءتيىمدى. سونىمەن قاتار اۋەجايدىڭ جۇمىس ىستەۋ كەستەسى, مامانداردى جۇمىسقا تارتۋ ماسەلەسى دە قۇزىرلى ورگانداردىڭ نازارىندا بولادى, – دەيدى ن.ءجۇمادىلوۆ.
ايتقانداي, ومبى – مايقاپشاعاي تاسجولىنىڭ قۇرىلىسى اياقتالۋعا جاقىن. دەمەك شەكارادان شىققان جۇكتى تىكەلەي ۇشاقپەن باسقا قالالارعا تۋرا ءارى جەدەل جەتكىزۋگە بولادى. ءيا, بۇل – جەكەلەگەن اۋداندارعا عانا ەمەس, جالپى شىعىس قازاقستانعا قاتىناۋدىڭ وڭتايلى جولى.
شىعىس قازاقستان وبلىسى
