شاراينا
گرەكيادا مەرزىمىنەن بۇرىن وتكەن پارلامەنت سايلاۋى بويىنشا داۋىس ساناۋ اياقتالىپ كەلەدى. وندا باستى وپپوزيتسيالىق راديكالدى سولشىل كۇشتەر كواليتسياسى (سيريزا) جەڭىسكە جەتكەن بولاتىن.
وعان قارسىلاستارىنان ايتارلىقتاي ۇزاپ كەتۋدىڭ ءساتى ءتۇستى. دەگەنمەن, ءبىر ماسەلە ءتۇيىندى كۇيىندە قالىپ تۇر. ول – سيريزا دەربەس تۇردە گرەكيا ۇكىمەتىن قۇرىپ, ءوز زاڭ جوبالارىن نەگىزگى زاڭ شىعارۋشى ورگان ارقىلى وتكىزە الا ما دەگەن ماسەلە. افينا جاڭالىقتار اگەنتتىگى ول بيۋللەتەندەردى 100 پايىز ساناپ شىققاننان كەيىن عانا بەلگىلى بولادى دەگەندى ايتۋدا. ۇكىمەت قۇرۋ ءۇشىن سيريزا پارلامەنتتە باسىم ورىنعا يە بولۋى كەرەك, ياعني 300 مانداتتىڭ 151-ءى بۇلارعا تيەسىلى بولۋى ءتيىس.
قازا بولعانىن راستادى
راديكالدى «يسلام مەملەكەتى» توبىنىڭ سودىرلارى ينتەرنەت ارقىلى حابار تاراتاتىن ءوز راديوستانسالارىندا كەپىلگە الىنعان ەكى جاپونيالىقتىڭ ءبىرىنىڭ ولتىرىلگەنىن راستادى.
جاپونيا ازاماتىنىڭ ولتىرىلگەنى تۋرالى اڭگىمە نەبارى 38 سەكۋند قانا جۇرگەن. بىراق وسىنداي قاتاڭ جازالاۋدىڭ سەبەپتەرى دە, بولعان وقيعانىڭ ەگجەي-تەگجەيى دە ايتىلماعان كورىنەدى. «يسلام مەملەكەتى» ءوز ايتقانىن ورىندادى. ۇيىم سودىرلارى بەلگىلەنگەن مەرزىمنىڭ ءوتىپ كەتۋىنە بايلانىستى تۇتقىندى و دۇنيەگە اتتاندىردى, دەلىنگەن راديو ارقىلى تاراتىلعان حاباردا. بۇعان دەيىن ولار 200 ميلليون دوللار تولەماقى تولەمەگەن جاعدايدا جاپونيالىق كەپىلدەردىڭ ولتىرىلەتىنىن حابارلاعان بولاتىن.
نيۋ-يورك كۇشتى داۋىلعا دايىندالۋدا
اقش-تىڭ سولتۇستىك-شىعىسىنا وتە كۇشتى قارلى بوران جاقىنداپ كەلەدى. اۋا رايىن بولجاۋشىلار تاياۋداعى ەكى كۇننىڭ ىشىندە كەيبىر اۋدانداردا 1,5 مەترگە دەيىن قار تۇسەتىندىگىن ايتۋدا.
نيۋ-يورك قالاسىنىڭ مەرى بيلل دە بلازيو داۋىلدىڭ قالا تاريحىنداعى ەڭ كۇشتى داۋىل بولىپ شىعۋى مۇمكىن ەكەنىن ايتىپ, ەسكەرتۋ جاساۋدا. قالا باسشىسى جەرگىلىكتى تۇرعىنداردى ساق بولۋعا, جەكە اۆتوكولىكتى پايدالانباۋعا شاقىرىپ, اسا قاجەت بولماسا, كوشەلەرگە شىقپاۋعا كەڭەس بەرۋدە. داۋىل نيۋ-يورك, نيۋ-دجەرسي, كوننەكتيكۋت, پەنسيلۆانيا, ماسساچۋسەتس جانە مەن شتاتتارىن قامتيدى دەپ كۇتىلۋدە. مەتەورولوگتاردىڭ بولجامىنشا, تسيكلوننىڭ بەتى تەك 27 قاڭتار كۇنى كەشكىسىن عانا قايتپاق.
ەگيپەتتە تاعى دا قاقتىعىس
ەگيپەتتە «25 قاڭتارداعى رەۆوليۋتسيانىڭ» ءتورت جىلدىعىندا 15 ادام قازا تاۋىپ, 40-قا تارتا ادام زارداپ شەكتى. بۇل تۋرالى ەگيپەت اراب رەسپۋبليكاسىنىڭ دەنساۋلىق ساقتاۋ مينيسترلىگى حابارلاعان.
وسى اتالعان ۆەدومستۆونىڭ ءمالىمەتتەرىنە قاراعاندا, 9 ادام كايردىڭ شەت جاعىندا بولعان قاندى قاقتىعىستا قازا تاپقان. قازا بولعانداردىڭ قاتارىندا اسكەري قىزمەتشى مەن ءبىر بالا بار كورىنەدى. ونىڭ سىرتىندا پرەزيدەنت ابدەل فاتتاح اس-ءسيسيدىڭ جاقتاستارى مەن قارسىلاستارى اراسىندا دا قاقتىعىس ورىن العان. مۇندا وسىنىڭ الدىندا قازا تاپقان سوتسياليستىك پارتيانىڭ بەلسەندىسى شايما اس-سابباگتىڭ جاقىندارى مەن ارىپتەستەرى جينالعان. ولار ەرەۋىلشىلەرگە قارسى قارۋ قولداندى دەپ پوليتسيانى ايىپتاۋدا.
قورىققانعا قوس كورىنەر
ءۇندىستاندا پوليتسيا اقش پرەزيدەنتى باراك وبامانىڭ ساپارىنا بايلانىستى قاۋىپسىزدىك شارالارىن كۇشەيتە وتىرىپ, ەكى رەسەيلىك ستۋدەنتتى ۇستاعان.
وقيعا وريسسا شتاتىنداعى نيالي دەرەۆنياسىندا ورىن العان. ۇلكەن ريۋكزاكتارى بار ەكى جاس جىگىتتىڭ جول بويىندا اۆتوكولىك كۇتىپ تۇرعاندارىن كورگەن جەرگىلىكتى تۇرعىندار پوليتسيا شاقىرعان. ءسويتىپ, ولاردى ۇستاپ, پۋري قالاسىنداعى پوليتسيا ۋچاسكەسىنە جەتكىزگەن. جەرگىلىكتى پوليتسيا باستىعىنىڭ حابارلاۋىنشا, ەكى جىگىتتىڭ يجەۆ مەملەكەتتىك تەحنولوگيالىق ينستيتۋتىنىڭ ستۋدەنتتەرى ەكەنى, ءتيىستى قۇجاتتارىنىڭ جانە ءۇش ايلىق تۋريستىك ۆيزالارىنىڭ, سول سياقتى شەتەلدىك پاسپورتتارى مەن اۆيابيلەتتەرىنىڭ بار ەكەنى انىقتالعان. ولار, ءتىپتى, وبامانىڭ ساپارى تۋرالى مۇلدە بىلمەيتىن بولىپ شىققان.
ساراپشىلار سانكتسيانى قولدامايدى
جاقىندا عانا اياقتالعان داۆوس ەكونوميكالىق فورۋمىنا قاتىسقان بىرقاتار ساراپشىلار رەسەي مەن ەۋروپا وداعىنىڭ ءبىر-بىرىنە قارسى ەنگىزگەن سانكتسيالارىنا قارسى شىقتى.
ولاردىڭ ايتۋلارىنا قاراعاندا, سانكتسيالار ەكونوميكانىڭ جانە قاراپايىم ادامداردىڭ ومىرىنە كەرى اسەرىن تيگىزەتىن ءتيىمسىز قۇرال بولىپ تابىلادى. سانكتسيالار ولار باعىتتالعانداردان گورى وزگەلەرگە قاتتىراق تيەدى, دەپ مالىمدەگەن Horasis ۇيىمىنىڭ پرەزيدەنتى فرانك-يۋرگەن ريحتەر. ءبىز ءوزىمىزدىڭ ينۆەستيتسيالىق قىزمەتىمىزدەن باس تارتپاۋعا ءتيىسپىز, ويتكەنى, رەسەي باتىستى قاجەت ەتەدى, ال باتىس بولسا رەسەيگە ودان بەتەر مۇقتاج, دەپ اتاپ كورسەتكەن ول باق-قا بەرگەن سۇحباتىندا.
التى ادام قار كوشكىنىنەن قازا تاپتى
ءالپى تاۋلارىندا قار كوشكىنىنەن كەيىن التى فرانتسۋزدىق تاۋ شاڭعىشىلارىنىڭ دەنەلەرى تابىلعان. ولاردىڭ تورتەۋى – ەركەك, ەكەۋى ايەل كورىنەدى. بۇل تۋرالى گاپ قالاسىنىڭ پرەفەكتۋراسى حابارلاعان.
وقيعا وتكەن سەنبى كۇنى فرانتسۋزدىڭ جوعارعى ءالپى دەپارتامەنتىنە قارايتىن كەيرا تاۋلى اۋدانىندا ورىن العان. التى تاجىريبەلى تاۋ شاڭعىشىلارىنان تۇراتىن توپ تاڭەرتەڭ تاۋ باسىنا شىعىپ, ءتۇس قايتا بازاعا ورالۋعا ءتيىس بولعان. بىراق ولار سول كۇيى حابار-وشارسىز كەتكەن. وسىدان كەيىن جوعالعان ادامداردى ىزدەستىرۋگە تىكۇشاق جىبەرىلگەن. ايتا كەتۋ كەرەك, تاۋ شاڭعىسى ماۋسىمى باستالعالى بەرى فرانتسۋزدىق الپىدە قار كوشكىنى سالدارىنان 11 ادام قازا تاۋىپ وتىر.
ينتەرنەت ماتەريالدارى نەگىزىندە ازىرلەندى.
