فوتو ءسىم
قر سىرتقى ىستەر ءمينيسترىنىڭ ورىنباسارى الىبەك قۋانتىروۆ «PepsiCo» كومپانياسىنىڭ وكىلدەرىمەن كەزدەسىپ امەريكالىق ترانسۇلتتىق كومپانياسى قازاقستاندا جۇزەگە اسىرىپ جاتقان چيپس ءوندىرۋ جوباسىنىڭ وزەكتى ماسەلەلەرىن تالقىلادى.
ءمينيستردىڭ ورىنباسارى بۇل جوبانىڭ ءوڭىردىڭ ەكونوميكالىق دامۋىنا, جۇمىس ورىندارىن اشۋعا جانە قازاقستاندىق شيكىزاتتى پايدالانۋ ارقىلى اگروونەركاسىپ كەشەنىن دامىتۋعا ىقپال ەتەتىن ماڭىزدى ىنتالاندىرۋ بولاتىنىن باسا ايتتى.
كومپانيا وكىلدەرى قازاقستان ۇكىمەتىنىڭ قولداۋىنا ريزاشىلىعىن ءبىلدىرىپ, بۇل جوبا «PepsiCo»-نىڭ وڭىردەگى ءىرى ينۆەستيتسيالارىنىڭ باستاماسى ەكەنىن, ءوز كەزەگىندە كومپانيا جەرگىلىكتى جەتكىزۋشىلەرمەن بەلسەندى جۇمىس ىستەۋگە نيەتتى جانە ىشكى نارىقتىڭ عانا ەمەس, سونىمەن قاتار ورتالىق ازيا ەلدەرىنىڭ سۇرانىسىن قاناعاتتاندىرۋ ءۇشىن ءوندىرىستى كەڭەيتۋدى جوسپارلاپ وتىرعانىن اتاپ ءوتتى.
كاسىپورىن الماتى وبلىسىندا ورنالاسىپ, الەمگە ايگىلى «Lay’s» برەندىمەن كارتوپ چيپستەرىن شىعاراتىن بولادى. امەريكالىق كومپانيا اتالعان جوباعا 160 ميلليون اقش دوللارى كولەمىندە ينۆەستيتسيا سالىپ, 350-گە جۋىق جۇمىس ورنىن اشۋدى جوسپارلاپ وتىر. كاسىپورىننىڭ قۋاتتىلىعى باستاپقى كەزەڭدە 14 مىڭ توننادان 16 مىڭ تونناعا دەيىن ءونىم شىعارا وتىرىپ, كەيىننەن 21 مىڭ تونناعا دەيىن وسەدى. وندىرىسكە قازاقستاندىق كارتوپ پايدالانىلاتىن بولادى.
كومپانيا كاسىپورىننىڭ ءبىرىنشى كەزەگىنىڭ قۇرىلىسىن 2026 جىلى اياقتاۋدى جوسپارلاپ وتىر.
