وسىعان وراي ەلىمىزدىڭ قارۋلى كۇشتەرى جىل باسىنان بەرى بىرقاتار حالىقارالىق وقۋ-جاتتىعۋ جيىنىنا قاتىسىپ كەلەدى. سونىڭ ءبىرى – 10 قىركۇيەكتە باستالعان قازاقستان مەن وزبەكستان اسكەري-اۋە كۇشتەرى اسكەري قىزمەتشىلەرىنىڭ «اشىق اسپان-2024» حالىقارالىق جەدەل-تاكتيكالىق كوماندالىق-شتابتىق وقۋ-جاتتىعۋى. بۇل جيىن بۇگىن, ياعني 14 قىركۇيەكتە اياقتالادى.
وقۋ-جاتتىعۋ دوستاس ەلدەر اسكەري باسقارۋ ورگاندارىنىڭ ۇيلەسىمدىلىگىن ارتتىرۋعا, اۋە شابۋىلىنا قارسى قورعانىس كۇش-قۇرالىن بىرلەسىپ قولدانۋ ماسەلەلەرىن پىسىقتاۋعا, جاۋىنگەرلىك كەزەكشىلىك اتقارۋدىڭ ەرەكشە جاعدايلارىندا كومانديرلەردىڭ اسكەري بولىمدەردى باسقارۋداعى پراكتيكالىق داعدىلارىن شىڭداۋعا باعىتتالعان.
ءىس-شاراعا مايدان تىكۇشاقتارى, ارميا جانە اسكەري-كولىك اۆياتسياسىنىڭ ۇشاقتارى, سونداي-اق اۋە شابۋىلىنا قارسى قورعانىس اسكەرلەرىنىڭ كۇش-قۇرالدارى قاتىسىپ جاتىر. وقۋ-جاتتىعۋ بارىسىندا اسكەري-اۋە كۇشتەرىنىڭ ۇشقىشتارى قىرعىزستان مەن تاجىكستاننىڭ اۋە كەڭىستىگىندە دە ۇشۋ جاتتىعۋلارىن ورىندادى.
«اشىق اسپان-2024» جەدەل-ستراتەگيالىق كوماندالىق-شتابتىق وقۋ-جاتتىعۋى قازاقستان قارۋلى كۇشتەرى اۋە قورعانىسى كۇشتەرىنىڭ باس قولباسشىسى, اۆياتسيا گەنەرال-لەيتەنانتى داۋرەن قوسانوۆتىڭ باسشىلىعىمەن ءوتىپ جاتىر.
– بۇل – ءبىزدىڭ ەلىمىزدە جىل سايىن تۇراقتى تۇردە وتەتىن ماڭىزدى ءىس-شارا. دوستاس ەلدەردىڭ اسكەري قىزمەتشىلەرىنە اۋە شابۋىلىنا قارسى قورعانىس, جاۋىنگەرلىك ەسەپتوپتاردى ۇيلەستىرۋ جونىندەگى بىرلەسكەن مىندەتتەردى ورىنداۋ كەزىندە تاجىريبە جيناقتاۋعا, ەكى ەلدىڭ قورعانىس قابىلەتىن ارتتىرۋعا مۇمكىندىك بەرەدى, – دەپ اتاپ ءوتتى د.قوسانوۆ.
وقۋ-جاتتىعۋ بارىسىندا مەملەكەتتىك شەكارا نەمەسە اۋە كەڭىستىگىن پايدالانۋ قاعيدالارى بۇزىلعان جاعدايلاردا اۋە قورعانىسى كۇشتەرىنىڭ كوماندالىق پۋنكتتەرىمەن جانە شەكتەسىپ جاتقان مەملەكەتتەردىڭ (قىرعىزستان, تاجىكستان, وزبەكستان) باسقارۋ پۋنكتتەرىمەن ءوزارا ءىس-قيمىل جاساۋ ءتارتىبى پىسىقتالدى. سونىمەن قاتار تاۋەلسىز مەملەكەتتەر دوستاستىعىنىڭ بىرىككەن اۋە شابۋىلىنا قارسى قورعانىس جۇيەسىنىڭ جاۋدىڭ اۋەدەن جاسالعان شابۋىلىن تويتارۋعا باعىتتالعان ءىس-قيمىل دايىندىعى تەكسەرىلدى.
تاياۋ كۇندەرى ەلىمىزدىڭ اۋماعىندا ۇيىمداستىرىلعان تاعى ءبىر اسكەري جيىن – «شەكسىز باۋىرلاستىق-III» وقۋ-جاتتىعۋى. تۇركىستان وبلىسى اۋماعىندا بايراعى جەلبىرەگەن ءىس-شاراعا ازەربايجان, قاتار, پاكىستان, تۇركيا, وزبەكستان جانە قازاقستاننىڭ ارنايى ماقساتتاعى بولىمشەلەرى قاتىسىپ, جاۋىنگەرلىك مىندەتتەرىن پىسىقتادى. تاۋداعى «وردا» پوليگونىنىڭ وقۋ-جاتتىعۋ ورىندارىندا ارنايى جاساقتار تاكتيكالىق اتىس, مەرگەندىك سايىس, پاراشيۋتتەن سەكىرۋ جانە تاۋ دايىندىعى بويىنشا تاجىريبەلىك جاتتىعۋلاردى ورىندادى. ءاربىر اسكەري قىزمەتشى – جارالانعان ادامعا مەديتسينالىق كومەك كورسەتۋ تاسىلدەرىن مەڭگەرگەن, بايلانىس قۇرالدارىن قولدانا الادى جانە كەز كەلگەن قارۋدى قولدانۋدىڭ شەبەرى. سونىمەن قاتار بۇل جيىندا اسكەري قىزمەتشىلەر شەتەلدىك ارىپتەستەرى قولداناتىن تاكتيكالىق ادىستەردى مەڭگەرۋگە مۇمكىندىك الدى.
وقۋ-جاتتىعۋعا قاتىسۋشىلاردىڭ الدىنا شارتتى تۇردەگى ەلدى مەكەنگە شوعىرلانعان زاڭسىز قارۋلى توپتىڭ جولىن جاۋىپ, كوزىن جويۋ مىندەتى قويىلدى. ونى ورىنداۋ كەزىندە شىنايى ۇرىس جاعدايىنا بارىنشا جاقىن جاعدايدا ءوزارا ۇيلەسىمدى دە ءتيىمدى ارەكەت ەتۋ قابىلەتى تەكسەرىلدى.
اسكەري قىزمەتشىلەردىڭ پىكىرىنشە, مۇنداي ءىس-شارالار كونتينگەنتتەردىڭ جاۋىنگەرلىك دەڭگەيىن ارتتىرۋعا ىقپال ەتەدى جانە وڭىردە بەيبىتشىلىك پەن قاۋىپسىزدىكتى قامتاماسىز ەتۋ ماقساتىندا بىرلەسىپ ءىس-قيمىل جاساۋعا مۇمكىندىك بەرەدى.
