سارىاعاشتاعى “بىرلىك” تاجىريبە شارۋاشىلىعىنىڭ 300 گەكتار كۇزدىك بيدايىنا وراق ءتۇستى. استىقتى گوللاندىق “New Holland” كومبايندارى ورىپ جاتىر. “وڭتۇستىك” الەۋمەتتىك كاسىپكەرلىك كورپوراتسياسى جەرگىلىكتى سەرۆيستىك دايىنداۋ ورتالىقتارى ارقىلى ديقاندارعا وسىلايشا قىزمەت ەتۋدە. كورپوراتسيانىڭ قولداۋىمەن شارۋاشىلىقتار 3,5 مىڭ گەكتارعا ءداندى داقىلدار ەككەن. بىلتىر ءداندى داقىلداردان 21,2 تسەنتنەردەن ءونىم الىنسا, بيىل دا وسى مەجە باعدارعا الىنىپ وتىر.
باقتيار تايجان, وڭتۇستىك قازاقستان وبلىسى.
ەلشىنىڭ قىزىلجارعا ساپارى. گەرمانيانىڭ قازاقستانداعى ەلشىسى راينەر شلەگەتەر مەن ەلشىلىكتىڭ ەكونوميكا جانە ءباسپاسوز ماسەلەلەرى جونىندەگى اتتاشەسى يان-ديتەر گوسينك جۇمىس ساپارىمەن قىزىلجار وڭىرىندە بولدى. ولاردى وبلىس اكىمى سەرىك ءبىلالوۆ قابىلداپ, ءوڭىردىڭ الەۋمەتتىك-ەكونوميكالىق دامۋ باعدارىمەن تانىستىردى. بيىلعى گەرمانيانىڭ قازاقستانداعى جىلى اياسىندا اتقارىلىپ جاتقان شارالارعا توقتالدى. ءوزارا كەلىسىلگەن ۋاعدالاستىق بويىنشا پەتروپاۆل مەن گەرمانيانىڭ ءبىر قالاسىمەن باۋىرلاستىق قارىم-قاتىناس ورناتىلاتىن بولدى. ەلشى ءوز سوزىندە قىزىلجار وڭىرىنە ءبىرىنشى كەلىپ تۇرعانىنا قاراماستان, ۇلكەن اسەر العانىن مالىمدەدى. جانە ول وبلىس ورتالىعىنىڭ كورنەكتى جەرلەرىمەن تانىسىپ, گەرمانيانىڭ قازاقستانداعى جىلىنا وراي ۇيىمداستىرىلعان “قازىرگى زامانعى گەرمانيا” اتتى كورمەنىڭ اشىلۋ سالتاناتىنا قاتىستى.
ءومىر ەسقالي, سولتۇستىك قازاقستان وبلىسى.
جوبانى جۇيەلەۋ جالعاسادى. وتكەن سارسەنبىدە وبلىس اكىمى بولاتبەك قۋاندىقوۆتىڭ توراعالىق ەتۋىمەن “سىرداريا وزەنىنىڭ ارناسىن رەتتەۋ جانە سولتۇستىك ارال تەڭىزىن ساقتاۋ” جوباسىنىڭ ەكىنشى كەزەڭىندە اتقارىلۋى ءتيىس جۇمىستاردى كەشەندى زەرتتەۋ ءۇشىن قۇرىلعان جۇمىس توبىنىڭ كەڭەيتىلگەن ءماجىلىسى ءوتتى. بۇگىندە ساراتس جوباسىنىڭ ەكىنشى كەزەڭىنە ەنگەن نىسانداردى تەرەڭ زەردەلەپ, ءتيىمدى ۇسىنىستار بەرۋ ءۇشىن قۇرىلعان جۇمىس توبى جەتەكشىلەرى ماسەلەنىڭ ءمان-جايىن جان-جاقتى بايان ەتتى. جۇمىس توبى جوبانىڭ عىلىمي-تەحنيكالىق, ەكولوگيالىق تۇرعىدان تيىمدىلىگىنە تالداۋ جاساپ, سۋ بالانسىن رەتتەۋدىڭ, بالىق شارۋاشىلىعىن دامىتۋدىڭ, سۋدى ۇنەمدەۋ تەحنولوگياسىن ەنگىزۋدىڭ جولدارىن قاراستىرىپ جاتىر. قارجىلىق ماسەلەلەر رەسپۋبليكالىق دەڭگەيدە شەشىمىن تاپپاق.
ەركىن ءابىل, قىزىلوردا.
بازار تازالىعى باقىلاۋعا الىندى. قازىر حالىق ازىق-ت ۇلىكتى نەگىزىنەن بازاردان الادى. ال بازارلاردىڭ تازالىعى كوڭىلگە قونىمدى ما؟ اسىرەسە, ءتۇرلى جۇقپالى اۋرۋلار اسقىناتىن قازىرگى كەزدە بازارلار جانىندا تەز بۇزىلاتىن تاعامدار ساتىلادى. بۇل سانيتارلىق تالاپقا ساي كەلە مە؟ مىنە, وسى ماسەلە وتكەن اپتادا وبلىس اكىمى ب.رىسقاليەۆ وتكىزگەن ارنايى كەڭەستە قوزعالدى. ءوڭىر باسشىسى بازارلارداعى ازىق-ت ۇلىك ساپاسىن سانيتارلىق-ەپيدەميولوگيالىق قىزمەتتىڭ دارىگەرلەرى ۇدايى باقىلاۋ قاجەتتىگىن العا تارتتى. ءتىپتى بازاردا ساۋدا جاساۋشىلاردىڭ سانيتارلىق تەكسەرۋدەن وتپەگەندەرى بارى ايتىلدى. ولار جۇقپالى اۋرۋلاردى تاراتۋشىلار بولىپ جۇرمەي مە ەكەن؟
جولداسبەك شوپەعۇل, اتىراۋ وبلىسى.
جاس ساياساتكەرلەر قاتارى تولىقتى. “نۇر وتان” حالىقتىق-دەموكراتيالىق پارتياسى باسشىلىعى مەن جاستار اراسىنداعى جۇمىس جانداندىرىلىپ, جاۋاپكەرشىلىكتى كۇشەيتۋ باعىتىنداعى ماقساتتى جۇمىستار جۇزەگە اسىرىلۋدا. سونىڭ ءبىرى – پارتيانىڭ تالدىقورعان قالالىق فيليالى جانىنداعى “جاس ساياساتكەر” ساياسي مەكتەبى بيىلعى جىلى تىڭداۋشىلارىن سەگىزىنشى مارتە قانات قاقتىرىپ, ولار ەل ومىرىنە بەلسەنە قاتىساتىن جاستار قاتارىن تولىقتىردى. جاس ساياساتكەرلەرگە ۇلى وتان سوعىسىنىڭ ارداگەرلەرى اق باتاسىن بەرسە, ارنايى سەرتيفيكاتقا يە بولعان 36 تۇلەك وزدەرىنىڭ ەگەمەن ەلىمىزدىڭ ەرتەڭىنە جاستىق جالىنىن ارناپ, جاقسى ىستەردىڭ باستاماشىسى بولاتىندىقتارىنا سەندىردى. سونداي-اق, ساياسي مەكتەپ ءبىتىرۋشى ەرداۋلەت مۇحامەتقاجيەۆ, اسەم وسكەنباەۆا ۇستازدارىنا العىس ايتىپ, ارىپتەستەرىنىڭ الداعى ومىرىنە ساتتىلىك تىلەدى.
كۇمىسجان بايجان, الماتى وبلىسى.
27 تۇلەك — “التىن بەلگى” يەگەرى. شىعىس قازاقستاندا ءبىلىم ساپاسى جىل سايىن ارتىپ كەلەدى. وعان دالەل, بيىل كەندىالتايلىقتار بىرىڭعاي ۇلتتىق تەستىلەۋدە ەلىمىز بويىنشا ءۇشىنشى ورىنعا يە بولدى. زايسان اۋدانى جىل سايىن ۇلتتىق تەستىلەۋدە ساپالى ءبىلىمنىڭ دەڭگەيىن كورسەتەدى. بيىل ۇمىتكەر 37 وقۋشىنىڭ 27-ءسى “التىن بەلگىگە” يە بولدى. لومونوسوۆ مەكتەبىنىڭ – 8, اۋەزوۆ مەكتەبىنىڭ – 3, قاراتال مەن امانگەلدى وقۋ ورىندارىنىڭ 6 جانە 3 تۇلەگى اتا-انالارىن قۋانىشقا كەنەلتتى. سونداي-اق, جارسۋ, اباي, سارىتەرەك, مۇكاراما, مۇستافينا مەكتەپتەرىنىڭ شاكىرتتەرى دە “التىن بەلگىنى” قورعاپ شىقتى. گ.قاليولدانوۆا, گ.سايرانوۆا – 123, ج.بولاتحان ۇلى, ءا.يبراەۆا, ە.ەلجاسوۆا 122 باللدان جينادى.
وڭداسىن ەلۋباي, شىعىس قازاقستان وبلىسى.
ديرەكتوردىڭ وقۋشىعا سىيلىعى. قولىڭنان كەلىپ جاتسا, وعان مۇمكىندىگىڭ بولىپ جاتسا, ۇزدىك مەكتەپ وقۋشىسىن دا لايىقتى تۇردە ماراپاتتاعانعا نە جەتسىن! وسىنداي قاعيدانى باسشىلىققا العان قالاداعى №11 ورتا مەكتەپ ديرەكتورى ن.فەسەنكونىڭ وقۋ جىلىنىڭ قورىتىندىسىمەن ۇزدىك وقۋشىنى اقشالاي سىيلىقپەن ماراپاتتاپ كەلە جاتقانىنا بىرەر جىل بولدى. بيىل ونداي سىيلىققا عىلىمي جوبالاردىڭ رەسپۋبليكالىق, حالىقارالىق سايىستارىنىڭ جەڭىمپازى, 11-سىنىپ وقۋشىسى ديلبار اتاەۆا يە بولدى. ال العاشقى ماراپات سىيدىڭ ناتيجەسىن ۋاقىت كورسەتەتىندىگى ءسوزسىز.
داۋلەت سەيسەن ۇلى, سەمەي.
