ولجاس بەكتەنوۆ مەملەكەت ينۆەستيتسيالىق تارتىمدىلىقتى ارتتىرۋ, ەلىمىزدىڭ ونەركاسىپتىك الەۋەتىن اشۋ, ينفراقۇرىلىمدىق ماسەلەلەردى شەشۋ جانە ەكونوميكانىڭ ناقتى سەكتورىن دامىتۋ بويىنشا اۋقىمدى جۇمىس اتقارىپ جاتقانىن اتاپ ءوتتى. ءىرى بيزنەس ەلىمىزدىڭ تەحنولوگيالىق جانە يننوۆاتسيالىق دامۋىندا ماڭىزدى ءرول اتقارادى. شاعىن جانە ورتا كاسىپكەرلىكتى دامىتۋعا مۇمكىندىك بەرەدى. تالقىلاۋ بارىسىندا ەنەرگەتيكا, وڭدەۋ ونەركاسىبى, مۇناي-گاز سەكتورى, تاۋ-كەن مەتاللۋرگيا كەشەنى, اگروونەركاسىپ كەشەنى, كولىك جانە قارجى, دەنساۋلىق ساقتاۋ, ءىت, تۋريزم سالالارىنىڭ وكىلدەرى ءوز ۇسىنىسىن ءبىلدىردى. مەتالداردى تەرەڭ وڭدەۋ, مۇناي-گاز حيمياسى جانە باسقا دا باسىم سالالارداعى جاڭا جوبالارعا باسا نازار اۋدارا وتىرىپ, وتاندىق تاۋار وندىرۋشىلەردى قولداۋ ماسەلەلەرى كوتەرىلدى.
ەلىشىلىك قۇندىلىقتى دامىتۋعا ەرەكشە كوڭىل ءبولىندى. ۇكىمەت «اتامەكەن» ۇكپ-مەن بىرلەسىپ, تاۋارلارداعى, جۇمىستار مەن كورسەتىلەتىن قىزمەتتەردەگى وتاندىق قامتۋ ۇلەسىن ايقىنداۋ بويىنشا جاڭا ءادىسنامانى ازىرلەپ جاتىر. ۇكىمەت باسشىسى جاڭا تەتىك اناعۇرلىم ءادىل بولاتىنىن ءارى وتاندىق كاسىپورىنداردىڭ دامۋىنا ەلەۋلى سەرپىن بەرەتىنىن ايتتى. ءتيىستى قۇرىلىمدارعا جۇرگىزىلىپ جاتقان جۇمىستى جەدەلدەتۋ تاپسىرىلدى. جاساندى ينتەللەكت جۇيەلەرىن قولدانۋدى كەڭەيتۋ جانە تسيفرلىق تەحنولوگيالاردى دامىتۋ ماسەلەلەرى قارالدى. ەكولوگيالىق تازا, ەنەرگيا ۇنەمدەيتىن جانە تومەن كومىرتەكتى جوبالاردى ىسكە اسىرۋعا باعىتتالعان تۋريزم, تۇرعىن ءۇي-كوممۋنالدىق شارۋاشىلىق, «جاسىل» قارجىلاندىرۋ سالاسىن دامىتۋدىڭ ماڭىزدى ەكەنى ايتىلدى.
تالقىلاۋ بارىسىندا ەلىمىزدى تۇراقتى ەنەرگيامەن قامتاماسىز ەتۋ ماسەلەسىنە نازار اۋدارىلدى. بيزنەس وكىلدەرى مەملەكەت باسشىسىنىڭ اتوم ەنەرگەتيكاسىن دامىتۋ جونىندەگى باستاماسىن قولداپ, ەنەرگيا تاپشىلىعى جاعدايىندا ونەركاسىپتى ودان ءارى دامىتۋ جانە جاڭا نىسانداردى ىسكە قوسۋ ءۇشىن تۇراقتى ءارى سەنىمدى ەنەرگيانىڭ جاڭا كوزى قاجەت ەكەنىن اتاپ كورسەتتى. وسىلايشا, بيىل 6 قازانداعى اتوم ەلەكتر ستانساسىن سالۋ جونىندەگى رەفەرەندۋمدا وڭ شەشىم قابىلدانعان جاعدايدا ەلىمىزدە اعىمداعى جانە كەلەشەگى بار وندىرىستەردىڭ ەنەرگەتيكاعا دەگەن قاجەتتىلىكتەرىن جابۋعا, جاڭا جۇمىس ورىندارىن اشۋعا مۇمكىندىك بولادى.
كەزدەسۋدى قورىتىندىلاي كەلە, پرەمەر-مينيستر پرەزيدەنت العا قويعان مىندەتتەرگە قول جەتكىزۋ ءۇشىن بيزنەستى ەكونوميكانىڭ ناقتى سەكتورىن دامىتۋعا بەلسەندى تارتۋ قاجەت ەكەنىن اتاپ ءوتتى.
«مەملەكەت باسشىسى ەلىمىزدى جان-جاقتى جاڭعىرتۋدى بەلسەندى جۇرگىزىپ جاتىر. ەكونوميكاداعى ءوسىم ازاماتتارىمىزدىڭ تۇرمىس ساپاسىن جاقسارتۋعا تىكەلەي اسەر ەتۋى كەرەك. سونىمەن قاتار ءىرى بيزنەس الەۋمەتتىك جاۋاپكەرشىلىكتى كورسەتۋى قاجەت. پرەزيدەنت كەلەسى جىلدى «جۇمىسشى ماماندىقتارى جىلى» دەپ جاريالاعانىن بىلەسىزدەر. بىزدە ءىرى كاسىپكەرلەر كوللەدجدەرگە قامقورلىق جاساپ, ماماندار دايارلاۋعا ءتيىستى بازا قۇراتىن ءساتتى ۇلگىلەر بار. بۇل مودەل سونىمەن قاتار بيزنەسكە بولاشاق كادرلاردى دايارلاۋعا مۇمكىندىك بەرەدى. «جۇمىسشى ماماندىقتارى جىلى» اياسىندا مۇنداي تاجىريبەنى جانداندىرۋ قاجەت», دەدى و.بەكتەنوۆ.
سونىمەن قاتار اۋىلدا كاسىپكەرلىكتى دامىتۋ جانە اۋىل تۇرعىندارىن جىل بويى جۇمىسپەن قامتۋ قاجەتتىگى اتاپ ءوتىلدى. ۇكىمەت باسشىسى ءتيىستى مينيسترلىكتەرگە بيزنەس وكىلدەرى تاراپىنان ايتىلعان, «جاسىل جوبالاردى» نەسيەلەۋدەن تۇسەتىن كىرىسكە تومەندەتىلگەن سالىق مولشەرلەمەسىن ەنگىزۋ, وتاندىق تۇقىم شارۋاشىلىعىن دامىتۋ بويىنشا ديقانداردى ىنتالاندىرۋ شارالارىن جەتىلدىرۋ, وتاندىق انالوگتار بولعان جاعدايدا يمپورتتىق تاۋارلار مەن قىزمەتتەردى ساتىپ الۋدى ازايتۋ مۇمكىندىگىن قاراستىرۋ سىندى ۇسىنىستاردى زەردەلەۋدى تاپسىردى.
