ء«وز اۋلەتىمنەن شىققان تۇڭعىش ساداقشىمىن»
يسپانيادان كەلگەن 68 جاستاعى ماريسول كارريون دجيمەنەستىڭ ايتۋىنشا, كۇيەۋى فەليكس گاللەگو گۋەررەرو ەكەۋى وسى تۋرنيرگە قاتىسىپ جاتقان ساداقشىلاردىڭ ىشىندەگى ەڭ جاسى ۇلكەندەرى. ءوزىنىڭ ساداق اتۋمەن شۇعىلدانىپ جۇرگەنىنە 10 جىلدان اسىپتى.
«يسپانيادا ء«داستۇرلى ساداق اتۋ قوعامى» دەپ اتالاتىن ۇيىم بار. ونىڭ جۇمىس ىستەپ كەلە جاتقانىنا 12 جىلداي بولدى. ءبىز زايىبىم ەكەۋمىز وسى قوعامنىڭ مۇشەلەرىمىز. دۇنيەجۇزىلىك كوشپەلىلەر ويىندارىنا ءبىرىنشى رەت قاتىسىپ جاتىرمىز», دەيدى ول.
ەرلى-زايىپتى فەليكس اعاي مەن ماريسول اپاي بۇعان دەيىن يسپانيادان بولەك, پورتۋگاليا, فرانتسيا, تاعى بىرقاتار ەلدە وتكەن جارىستارعا قاتىسىپ, جۇلدەلى ورىندارعا يە بولعان. اسىرەسە پورتۋگالياداعى حالىقارالىق تۋرنيردە العان 2-ورىنىن ەرەكشە ماقتان تۇتادى. ال قازاق ەلىنە ولار تۇڭعىش كەلىپ وتىر.
«ماعان بۇل ويىنداردىڭ ۇيىمداستىرىلۋى وتە ۇنادى. كوپ ەلدە بولدىق. سوندىقتان سالىستىرا الامىز. دۇنيەجۇزىلىك كوشپەلىلەر ويىندارى وليمپيا ويىندارى سەكىلدى جوعارى دەڭگەيدە ءوتىپ جاتىر. ءوز اتىمنان بىزگە قاجەت كەزدە قول ۇشىن سوزىپ, باعىت-باعدار بەرىپ, كومەكتەسىپ جۇرگەن ۆولونتەر جاستارعا العىس ايتقىم كەلەدى», دەدى ماريسول دجيمەنەس.
ەرلى-زايىپتىلار بۇل ويىنداردا ازىرگە جۇلدەلى ورىنعا ىلىككەن جوق. سەبەبىن سۇراعانىمىزدا: ء«بىز يسپانيادا نەگىزىنەن باسقا قاشىقتىقتا اتۋدان دايىندالامىز. بۇل جاقتىڭ تالابى وزگەشەلەۋ ەكەن. قارسىلاستارىمىز شەتىنەن «سەن تۇر, مەن اتايىن» ەكەن», دەپ جاۋاپ قاتتى.
V دۇنيەجۇزىلىك كوشپەلىلەر ويىندارىنىڭ ءبىر ەرەكشەلىگى – بۇعان تەك وتكەن تاريحىندا كوشپەلى عۇمىر كەشكەن ەلدەر عانا ەمەس, وتىرىقشى حالىقتاردىڭ دا وكىلدەرىنىڭ قاتىسىپ جاتقاندىعى. يسپانيادان كەلگەن كەيىپكەرلەرىمىزدىڭ دە اتا-بابالارى كوشپەلى بولماعان. ءتىپتى «كوشپەلى ءومىر ءسۇرۋ سالتى» دەگەن تۇسىنىك جوق ەكەنىن ايتادى.
«مەن ءوز اۋلەتىمنىڭ ىشىندە ءداستۇرلى ساداق اتۋ سپورتىمەن شۇعىلدانا باستاعان ءبىرىنشى اداممىن. ءبىزدىڭ ەلدە وليمپيادالىق ساداق اتۋ تۇرىمەن اينالىساتىندار كوپ. ال بۇگىنگىدەي ءداستۇرلى ساداق اتۋ سپورتى ەندى عانا تانىمال بولىپ كەلەدى», دەيدى م.دجيمەنەس.
«ايەلىم – الەمنىڭ 12 دۇركىن چەمپيونى»
V دۇنيەجۇزىلىك كوشپەلىلەر ويىندارى بارىسىندا ءبىز اڭگىمەلەسكەن تاعى ءبىر ەرلى-زايىپتى جۇپ – ماجارستاننان كەلگەن ساداقشىلار توماس ھۋنەي مەن ەموكە دوموكوس. ولار – بۋداپەشت قالاسىنىڭ تۇرعىندارى. ت.ھۋنەي ءوزىنىڭ ءداستۇرلى ساداق اتۋمەن شۇعىلدانىپ كەلە جاتقانىنا 14 جىل بولعانىن ايتادى.
ء«بىز ايەلىم ەكەۋمىز دە وسى سپورت تۇرىمەن كوپتەن اينالىسىپ كەلەمىز ءارى مۇنى قاتتى جاقسى كورەمىز. جارىستارعا دا ۇنەمى بىرگە بارامىز. وسى جىلدار ىشىندە الەمنىڭ تۇكپىر-تۇكپىرىندە وتكەن تالاي تۋرنيردە باق سىنادىق. ال قازاقستانعا ءبىرىنشى رەت تابان تىرەدىك. ماعان سىزدەردىڭ ەلدەرىڭىز دە, استانالارىڭىز دا ۇنادى. جارىستىڭ ءوزى وتە جوعارى دەڭگەيدە ۇيىمداستىرىلىپ جاتىر. تىڭعىلىقتى دايىندىق بولعانى بايقالادى. ال جەرگىلىكتى تۇرعىندار – مۇلدەم بولەك تاقىرىپ. ءبىز مۇندا تەك ك ۇلىپ جۇرەتىن كوڭىلدى ادامداردى عانا كورىپ جاتىرمىز», دەپ اعىنان جارىلدى ول.
توماس ھۋنەي – ءداستۇرلى ساداق اتۋدان الەمنىڭ 3 دۇركىن چەمپيونى. سوڭعى رەت وڭتۇستىك كورەيانىڭ ينچحون قالاسىندا وتكەن بىرىنشىلىكتە توپ جارعان. ال ونىڭ جۇبايى ەموكە دوموكوس ايەلدەر اراسىندا الەمنىڭ 12 دۇركىن چەمپيونى! سونداي-اق ول وسى ويىنداردا دا 11 قىركۇيەك كۇنى وتكەن «جامبى» ستيلىندەگى ءداستۇرلى ساداق اتۋدان كۇمىس مەدالدى موينىنا تاقتى.
ءبىز ماجار حالقى ەۋروپانىڭ قاق تورىندە وتىرعان ۇلت بولسا دا, بۇرىنعى كوشپەلىلەردىڭ ۇرپاعى ەكەنىن جاقسى بىلەمىز. ەرلى-زايىپتىدان اتا-بابالارىنان دارىعان قانداي دا ءبىر كوشپەلىلىك قاسيەت تۋرالى سۇرادىق. «مەن – ماجارمىن. بويىمدا كوشپەلىلىكتىڭ قانى بار ەكەنىن سەزەمىن. ءتىپتى مەنىڭ ارعى تەگىم – قىپشاق. قازاق-ماجار – ءبىر تۋعان», دەدى ت.ھۋنەي.
قازىرگى تاڭدا ماجارلىق ساداقشىلار الەمدەگى الدىڭعى قاتارلى قۇرامالاردىڭ ءبىرى سانالادى. بۇعان ءتۇرلى تۋرنيردە وسى ەل وكىل-دەرىنىڭ ۇنەمى توپ جارىپ جۇرگەنى جاقسى دالەل. مىسالى, استاناداعى دۇنيەجۇزىلىك كوشپەلىلەر ويىندارىنا كەلگەن ساداقشىنىڭ ءبىرى لاسلو كوتسكا – الەمنىڭ بىرنەشە دۇركىن جەڭىمپازى. ول وسى ءتۋرنيردىڭ وزىندە 10-11 قىركۇيەك كۇندەرى ءداستۇرلى ساداق اتۋدان ءبىر التىن, ءبىر كۇمىس مەدال ەنشىلەپ ۇلگەردى.
