سۋرەت: اشىق دەرەككوزدەن
تاياۋدا عانا مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا شەكارا ماڭىنداعى كەدەن بەكەتتەرىنىڭ ماسەلەسىنە نازار اۋدارىپ, ولاردى دامىتۋ جونىندەگى جۇمىستى قىسقا مەرزىمدە اياقتاۋدى تاپسىرعان بولاتىن.
مىنە, وسى ماقساتتا قارجى ءمينيسترى ءمادي تاكيەۆ جەتىسۋ جانە الماتى وبلىستارىنا جۇمىس ساپارىمەن بارىپ, «نۇر جولى» جانە «قالجات» كەدەن بەكەتتەرىندەگى تىڭ وزگەرىستەردى باعامداپ قايتتى. وسى رەتتە مينيسترلىك ەلىمىزدىڭ وتكىزۋ بەكەتتەرىندە تسيفرلى سەرۆيستەردى جۇيەلى تۇردە ەنگىزۋدى مىقتاپ قولعا العانىن ايتا كەتەيىك.
ايتالىق, قازىر «كەدەن» اقپاراتتىق جۇيەسىن ازىرلەۋ جۇمىسى قارقىن الدى. بۇل – وتاندىق كەدەن سالاسىنداعى تسيفرلى شەشىم. اتالعان جۇيە «استانا-1», «ەكسپورتتىق-يمپورتتىق وپەراتسيالار جونىندەگى بىرىڭعاي تەرەزە», «تايس-2», «جبو» جۇيەلەرىن الماستىرادى.
وزىق جۇيە كەدەندىك وپەراتسيالاردىڭ بارلىق كەزەڭى مەن قاتىسۋشىلارىمەن ءوزارا ءىس-قيمىلدى قامتيدى, سونداي-اق رۇقسات بەرۋ قۇجاتتارىن اكەلۋ مەن الۋدان باستاپ, تاۋارلار شىعارىلعاننان كەيىنگى باقىلاۋدى قاراستىرادى.
«ەلىمىزدىڭ ترانزيتتىك الەۋەتىن دامىتۋ ماقساتىندا شەكاراداعى وتكىزۋ پۋنكتتەرىن تولىققاندى جاڭعىرتۋ جالعاسىن تابادى», دەگەن ءمادي توكەش ۇلى, كەدەن ءىسىن ىلگەرىلەتۋگە ارنالعان وزىق شەشىمدەردى ەنگىزۋدى ارتتىرا ءتۇسۋدى تاپسىردى.
بۇل ورايدا بيىل قازاقستان – قىتاي شەكاراسىندا ورنالاسقان «نۇر جولى» اۆتوموبيل وتكىزۋ بەكەتى ارقىلى 266,5 مىڭ كولىك وتكەنىن ايتا كەتۋ كەرەك. بىلتىرعى كەزەڭىمەن سالىستىرعاندا ءوسىم 2 ەسە ارتقان.
ال «قالجات» اۆتوموبيل وتكىزۋ پۋنكتى ارقىلى بيىلعى 8 ايدا 30 مىڭعا اۆتوكولىك ءوتىپتى. 2023 جىلمەن سالىستىرعاندا ءوسىم 24%-عا دەيىن ۇلعايدى.
تۇتاستاي العاندا, جاڭعىرتۋ جۇمىستارىنا سايكەس ەسكى ينفراقۇرىلىمدى بۇزىپ, جاڭا وتكىزۋ پۋنكتتەرىن سالۋ قاراستىرىلعان.
سونىمەن قاتار استانا قالاسىندا بولاتىن باس ديسپەتچەرلىك باسقارماعا كەدەن بەكەتتەرىن باقىلاۋدى تسيفرلاندىرۋ جانە ورتالىقتاندىرۋ بويىنشا جۇمىستار اتقارىلىپ كەلەدى. مۇندا سالالىق باقىلاۋ قىزمەتتەرى, ونىڭ ىشىندە شەكارا قىزمەتى دە ورنالاستىرىلادى.
اتالعان وزگەرىستەر وتكىزۋ بەكەتتەرىنىڭ ينفراقۇرىلىمىن جاقسارتىپ, دامىتا تۇسەدى. شەكارادان جايلى ءوتىپ, مەملەكەتتىك باقىلاۋ تۇرلەرىن ساپالى جۇرگىزۋ ءۇشىن بارلىق جاعداي جاسالادى. كولىكتەردى قابىلداۋ 6 ەسە ۇلعايتىلىپ, تاۋارلاردى وتكىزۋدىڭ بارلىق تسيكلىن اۆتوماتتاندىرۋ ارقىلى شەكارادان اسۋ ۋاقىتى 30 مينۋتقا دەيىن ازايا تۇسەدى.
