كەلىسىمشارت اسكەريلەرىنىڭ سانى ارتىپ كەلەدى

قازاقستاندا قارۋلى كۇشتەردى كەلىسىمشارت بويىنشا جاساقتاۋ جۇيەسى 2002 جىلدان باستاپ كەزەڭ-كەزەڭمەن ەنگىزىلگەن بولاتىن. قازىرگى ۋاقىتتا قارۋلى كۇشتەرىمىزدەگى اسكەري قىزمەتشىلەردىڭ 74 پايىزى كەلىسىمشارت بويىنشا قىزمەت ەتۋدە. مۇنىڭ مولشەرى جىل سايىن 4-5 مىڭ ادامعا ۇلعايىپ كەلەدى. كەلىسىمشارت بويىنشا قىزمەتكە قابىلداناتىن اسكەري قىزمەتشىلەر مەملەكەت تاراپىنان قوماقتى الەۋمەتتىك قولداۋ كورەدى. كەلىسىمشارت بويىنشا اسكەري قىزمەتشى مەن ونىڭ وتباسى مۇشەلەرى تۇرعىن ۇيمەن قامتاماسىز ەتىلەدى نەمەسە ونى جالداعانى ءۇشىن وتەماقى الادى. جەكەشەلەندىرۋ قۇقىعى بارلاردان باسقاسى اسكەري قىزمەتتەن بوساعان جاعدايدا قىزمەتتىك تۇرعىن ءۇيدى قايتارادى. سونىمەن قاتار, تەگىن مەديتسينالىق قىزمەت كورسەتۋ كوزدەلگەن. جيىرما جىلدان ارتىق ەڭبەك ءسىڭىرىپ, قىزمەتتەن بوساتىلعاندار اسكەري-مەديتسينالىق مەكەمەلەردە تەگىن ەمدەلۋىن جالعاستىرادى, ال جيىرما بەس جىلدان اسا قىزمەت ەتكەندەر ساناتوريلىك-كۋرورتتىق ەمدەلۋمەن قامتاماسىز ەتىلەدى. تۇرعىن ءۇي بەرىلۋى مەن تەگىن مەديتسينالىق قىزمەت كورسەتۋدەن باسقا, كەلىسىمشارت بويىنشا اسكەري قىزمەتشى مەن ونىڭ وتباسى مۇشەلەرى باسقا ورىنعا كوشكەن جاعدايدا اۋە, تەمىرجول, سۋ جولى جانە اۆتوموبيل كولىكتەرى قىزمەتتەرىن تەگىن پايدالانا الادى, بالالارىنا بالاباقشادان كەزەكتەن تىس ورىن بەرىلەدى. كەلىسىمشارت بويىنشا قىزمەت – سانالى تۇردە جانە كاسىبي نەگىزدە ەرىكتى وتان قورعاۋشى بولۋ مۇمكىندىگى. بۇگىنگى تاڭدا قازاقستان ارمياسى ارالاس جاساقتاۋ قاعيداتىن ۇستانىپ كەلەدى. «ەگەمەن-اقپارات».