كوپتى تاڭداندىرعان كوشپەلىلەر الەمى

«قازانات» يپپودرومى ماڭىنداعى اۋماعى ات شاپتىرىم اۋىلدا سپورتتىق سايىس وتەتىن الاڭدار, شەبەرلەر قولىنان شىققان بۇيىمدار كورمەسى, «ونەر ورداسى» اتتى باس ساحنا, ۇلتتىق تاعامداردىڭ ءدامىن تاتۋعا ارنالعان فۋد-كورتتار مەن سەيىل-سەرۋەن قۇرۋعا قولايلى ايماقتار جاساقتالعان. وتكەن مەن بۇگىننىڭ بەينەسى ەرەكشە ۇيلەسىم تاپقان اۋىلدى ارالاي ءجۇرىپ ەلىمىزدىڭ  وشپەس وركەنيەتىنە ەرىكسىز تامساناسىڭ. ءبىز كەشكەن بۇل كۇيدى بار كەلۋشىلەر بويىنان وتكىزىپ جاتقانى انىق. سەبەبى جينالعاندار كيىز ۇيلەر الدىنداعى ساحنالىق كورىنىستەردى ىنتىزارلىقپەن تاماشالاپ, ءان-جىردى ىقىلاسپەن قوسىلا شىرقاپ جاتىر.

«حالقىمىز «مىڭ رەت ەستىگەننەن ءبىر رەت كورگەن ارتىق» دەپ ايتىپ جاتادى عوي. سول قاعيدامەن بۇگىن وتباسىمىزبەن ەتنواۋىلعا كەلدىك. كورەر قىزىق كوپ ەكەن. اۋىلدىڭ تياناقتى رەتپەن جاساقتالعانى كوڭىلىمنەن شىعىپ جاتىر. مىنا كيىز ۇيلەر ايماقتاردىڭ بار اسىلىن استانا تورىندە پاش ەتىپ تۇر. وبلىستاردان تابىلعان جادىگەرلەر زاماناۋي لەد-ەكرانداردا كورسەتىلىپ جاتىر. قازىردىڭ وزىندە ماڭعىستاۋ, الماتى وبلىسى, شىعىس قازاقستان مەن الماتى قالالارىنىڭ كيىز ۇيلەرىنە باس سۇقتىم. المالى شاھاردىڭ سيمۆولىنا اينالعان الما اعاشتارىن, سول المانى كورسەتۋدەگى ەستەتيكالىق شەشىمى قاتتى ۇنادى», دەيدى استانا قالاسىنىڭ تۇرعىنى ايگۇل يكرامجان.

ال باس ساحنادا بۇل كۇنى اقمولا وبلىسىنان كەلگەن 200-دەن اسا جاس دارىن مەن ونەر ۇجىمدارى ارقانىڭ ءان-كۇيىمەن قۇلاق قۇرىشىن قاندىرىپ جاتتى.

«بۇگىن كوكشەتاۋ قالاسى, اقمولا وبلىسىنىڭ بارلىق اۋدانى مەن قوسشى قالاسىنان جينالعان ءداستۇرلى انشىلەر, ەسترادا اندەرىن ورىنداۋشىلار, «ك.كۇمىسبەكوۆ» اتىنداعى ۇلتتىق اسپاپ وركەسترى مەن «گاككۋ» بي ءانسامبلى, «ۇلان عاسىر» كۆارتەتى دايىنداعان كەش ءوتىپ جاتىر. اقمولا وبلىسىنان اتاعى دارحان دالانى شارلاعان ونەر الىپتارى تۋعان. سونىڭ ءبىرى – ۇكىلى ىبىراي. سوندىقتان بۇگىنگى كونتسەرت شىمىلدىعىن ۇكىلى ىبىراي بابامىزدىڭ انىمەن تۇردىك. اقمولا وبلىسىنىڭ ءار اۋدانىنداعى مادەنيەت ۇيلەرىنەن باسى قوسىلعان 150 دومبىراشى ءبۇلدىرشىن كورسەتكەن ونەر حالىق ەڭسەسىن كوتەرىپ, رۋحتاندىرعانى ەرەكشە سەزىلدى», دەدى انشى, اكتەر, اقمولا وبلىسى تسەلينوگراد اۋدانىنداعى مادەنيەت ءۇيىنىڭ ءانشىسى باۋىرجان نۇرىمبەتوۆ.

ەتنواۋىلعا تابان تىرەگەن قوناقتار, V دۇنيەجۇزىلىك كوشپەلىلەر ويىندارىنداعى سپورتتىق سايىستارعا قاتىسۋشىلار مەن شەتەلدىك تۋريستەردىڭ قازاقتىڭ ۇلتتىق قولونەرىنە دەگەن قىزىعۋشىلىعى جوعارى. ءار دۇڭگىرشەكتە ساۋدا دا قىز-قىز قايناپ جاتىر. اقمولا وبلىسىنىڭ تەمىردەن ءتۇيىن تۇيگەن, تەرى يلەگەن, ون ساۋساعىنان ونەر تامعان شەبەرلەرى دە ورتا تولتىرعان. كوكشەتاۋ قالاسىنداعى «Granat» شىعارماشىلىق مەكتەبىندە ءتالىم الىپ جاتقان وقۋشىلاردىڭ قولىنان شىققان بۇيىمدار كورمەگە ارنايى جەتكىزىلگەن. بالالاردى كوركەم سۋرەت ونەرىنىڭ قىر-سىرىنا باۋليتىن مەكتەپ قىش قۇمىرا مەن قازاقى ناقىشپەن كومكەرىلگەن جەيدە, شوپپەر, تاقيا, شاپاننىڭ سان الۋان ءتۇرىن ساۋداعا شىعارعان.

ء«بىزدىڭ شىعارماشىلىق مەكتەپ 2016 جىلدان بەرى وقۋشىلاردى قولونەر بۇيىمدارىن جاساۋعا باۋلىپ ءجۇر. استاناعا الىپ كەلگەن بۇيىمدارىمىزدى 10-16 جاس ارالىعىنداعى وقۋشىلار ازىرلەگەن. كيىمدەردەگى پرينتتەر كاسىبي سۋرەتشىلەردىڭ قىلقالامىنان تۋعان. شاكىرتتەرىمىز سۋرەتشىلەرمەن كوللاباراتسيا جاساي وتىرىپ, جۇرەك قالاۋىنداعى بۇيىمداردى ىستەيدى. تەحنيكالىق اشىلۋدان بەرى ەتنواۋىلدا قىزمەت كورسەتىپ تۇرمىز. شەتەلدىك تۋريستەر «World nomad games-ءتىڭ» لوگوتيپى بەينەلەنگەن دۇنيەلەردى كوپتەپ ساتىپ الىپ جاتىر», دەدى «Granat» شىعارماشىلىق مەكتەبىنىڭ نەگىزىن قالاۋشى انار ساتتىباەۆا.

«كوشپەلىلەر الەمى» اۋىلىنداعى ەتنوشاتىردا اتى قالىپتاسقان وتاندىق كادەسىي برەندتەرىمەن قاتار, وبلىس ىسكەرلەرىنىڭ بۇيىمدارى دا كوز تارتادى. ماڭعىستاۋ وبلىسى اقتاۋ قالاسىنان كەلگەن جەرگىلىكتى شەبەرلەر وداعىنىڭ مۇشەسى - باقىلى اجە كورمەگە كيىز ءۇيدىڭ ءىشىن جاساقتاۋعا ارنالعان باۋ-باسقۇر, شاشاق-قۇرلارىن الىپ كەلگەن. 15 جاسىنان باۋ توقىپ, كيىز باسۋدى مەڭگەرگەن اجە اۋەستەنەتىن ءىسىن بۇگىندە نەمەرەلەرىنە ۇيرەتۋدى قولعا العان.

«جاستىق شاقتان العان ۇلگىمىز جادىمىزدا جاتتالىپ قالعان. مەملەكەتتىك قىزمەتتە جۇرگەندە دە قولونەردەن قول ۇزبەدىك. الا جىپتەن ادىپتەلگەن باۋلارعا ءوز وڭىرىمىزدە سۇرانىس جوعارى. ال وسىنداعى ماڭعىستاۋ وبلىسىنىڭ ءۇش كيىز ءۇيى ءبىزدىڭ بۇيىمدارمەن اسەمدەلدى. كورمەگە قويىلعان بۇيىمداردى ۇيدە ىستەيمىز, بۇگىندە نەمەرەلەرىم مونشاعىن وتكىزىپ قولعابىس جاسايدى», دەدى باقىلى بوپانايوۆا.

ەلوردادا ءوتىپ جاتقان كوشپەلىلەر ويىندارىنىڭ سپورتتىق سايىستارىندا 89 ەلدەن كەلگەن قاتىسۋشىلار باق سىناپ ءجۇر. دەمەك, كەمىندە شارتاراپتىڭ 89 مەملەكەتىنە كوشپەلىلەر ويىنىنىڭ ءدۇبىرى ەستىلىپ جاتىر. ەتنواۋىلدى ارالاي ءجۇرىپ تۇركيانىڭ بەدەلدى تەلە-راديو كەشەنىنەن كەلگەن ارىپتەستەرىمىزدى كەزىكتىردىك. قىزۋ جۇمىس اراسىندا «TRT» ءتىلشىسى ەسكەندەر مامەتوۆتەن قانداي اقپارات تاراتىپ جاتقانىن سۇرادىق.

ء«بىز تۇركيادان ارنايى كەلدىك. استاناداعى كوشپەلىلەر ويىندارى قاتتى ۇناپ جاتىر. قازىر سپورتتىق جارىستار مەن ەتنواۋىلداعى فولكلورلىق قويىلىمدار تۋرالى رەپورتاج, حالىق ويىندارى تۋرالى حابار دايىنداپ جاتىرمىز», دەيدى ەسكەندەر مامەتوۆ.

كوڭىلدى قۋانتقانى - ەتنواۋىلدا توپ-توپ شەتەلدىك تۋريستەر ءجۇر. ءبىز تىلدەسكەن ۇندىستاندىق يندەجيت سينح مىرزا قازاقستاندا ءوتىپ جاتقان كوشپەلىلەر ويىندارىنا امەريكالىق دوستارىمەن بىرگە كەلىپتى.

«دۇنيەجۇزىلىك كوشپەلىلەر ويىندارى - عاجايىپ ءىس-شارا. استاناعا الەمنىڭ تۇكپىر-تۇكپىرىنەن مىڭداعان ادام كەلسە ەكەن دەيمىن, ويتكەنى قازىر ەلدىڭ باي مادەنيەتى جاقسى تانىستىرىلىپ جاتىر. قازاقتاردىڭ ءوز مادەنيەتىن ماقتان تۇتاتىنىن كورىپ جاتىرمىز. سپورتتىق ويىندار مەن مادەني ءىس-شارالاردىڭ ءبىر ۋاقىتتا, جاقىن ماڭدا ءوتىپ جاتقانى سىزدەردىڭ مادەنيەتتەرىڭىزبەن جاقىنىراق تانىسۋعا جاقسى مۇمكىندىك بەرىپ جاتىر. ينتەللەكتۋالدى, كۇشتىك ويىندار وتە قىزىق ءوتىپ جاتىر. كەلەسىدە وتەتىن كوشپەلىلەر ويىندارىنا تاعى كەلەمىز», دەدى ءۇندىستاننان كەلگەن تۋريست.

استانانى دۇبىرگە بولەپ جاتقان كوشپەلىلەر ويىندارى مەن «كوشپەلىلەر الەمى» اتالاتىن ەتنواۋىلداعى توي-دۋمان 13 قىركۇيەككە دەيىن وتەدى. ەتنواۋىل جۇمىسى 11:00-دەن باستالىپ, 21: 00-دە اياقتالادى.