جەتىسۋدا مادەنيەت ءۇيىنسىز وتىرعان اۋىلدار بار. سونىڭ ءبىرى – قوعالى اۋىلى. تالاي جىلدان بەرى قاڭىراپ قالعان مادەني وردا بيىل ەسىگىن قايتا اشتى. وسى ءبىر مەرەيلى ساتتە كەربۇلاق اۋدانىنىڭ اكىمى قانات ەسبولاتوۆ ءسوز الىپ, حالىقتى قۇتتىقتادى.
«مادەنيەت – ۇلتتىڭ مايەگى, رۋحاني قاينار كوزى عانا ەمەس, ومىرىمىزدەگى نەگىزگى سالانىڭ ءبىرى. ءبىز بۇل سالانى جاڭعىرتۋ ارقىلى ەلدىڭ رۋحىن, وتكەنى مەن بۇگىنىن جاڭعىرتامىز, ۇلى مۇرالاردى قالىپتاپ, تىڭ دۇنيەلەردى ۇرپاققا ميراس ەتەمىز. جاس ورەندەر ساپالى ءبىلىم, سانالى تاربيە الىپ قانا قويماي, مادەني, ادەبي تۇرعىدا دا تانىم كوكجيەگىن كەڭەيتۋگە ءتيىس. كەشەگى بابالارداي تاريحتا اتىن, سوڭىندا ءىزىن قالدىرۋى كەرەك. ول ءۇشىن دە الەۋمەتتى مادەني قولداۋ اۋاداي قاجەت. ال بۇگىن كۇردەلى جوندەۋدەن كەيىن اسەم كەلبەتىمەن وزدەرىڭىزگە پايدالانۋعا بەرىلگەلى تۇرعان مادەنيەت ءۇيى – بارشامىزدىڭ يگىلىگىمىز», دەدى ق.ەسبولاتوۆ.
اكىم لەبىزىنەن كەيىن اۋداندىق ءماسليحات توراعاسى قايرات بەكەەۆ, اۋداندىق ارداگەرلەر كەڭەسىنىڭ توراعاسى بوكەن رىسبەكوۆ, مادەنيەت سالاسىنىڭ ارداگەرى ليۋدميلا پينچينا ءسوز الىپ, ىستىق ىقىلاستارىن ءبىلدىردى. رۋحاني, مادەني تۇرعىدا ۇزىك-ۇزىك تولعامدارىن جەتكىزىپ, سوڭىرا مادەنيەت ءۇيىنىڭ لەنتاسىن سالتاناتتى تۇردە قيدى. ءوز كەزەگىندە كوپشىلىك جاڭعىرعان مادەنيەت ۇيىنە ەنىپ, جەرگىلىكتى ونەرپازداردىڭ كونتسەرتىن تاماشالادى.
«بۇل – ەرەكشە كۇن. مادەنيەت ءۇيى ەل يگىلىگىنە بەرىلدى. وسىناۋ رۋحاني مەكەمە ىشىندە كىتاپحانا جەلىسى جۇمىس ىستەيدى. وندا 39 مىڭ كىتاپ قورى بار. جاڭا اشىلعان مادەنيەت ۇيىندە, سونىڭ ىشىندە كوپتەگەن يگى شارا وتەتىن بولادى, سول ءۇشىن قۋانىشتىمىن», دەدى 35 جىلعا جۋىق اۋىل كىتاپحاناسىنىڭ تىزگىنىن ۇستاپ كەلە جاتقان رايحان بايتاەۆا.
قوعالى اۋىلىنىڭ تۇرعىنى كەنجەگۇل نۇرسۇلتانوۆا: «بۇگىن – مەنىڭ ءومىرىمنىڭ ساۋلەلى ساتتەرىنىڭ ءبىرى. قوعالى اۋىلىنداعى قۋانىشتى وقيعا. مادەنيەت ءۇيىنىڭ ارحيتەكتۋرالىق ارلەنۋى اۋىل اجارىن اشادى. وسى مادەنيەت مەكەمەسىن پايدالانۋعا بەرگەنىنە وبلىس, اۋدان, اۋىل اكىمىنە, قۇرىلىسشىلارعا شەكسىز العىسىمدى بىلدىرەمىن», دەيدى.
اۋدان اكىمىنىڭ ايتۋىنشا, مادەنيەت ءۇيىنىڭ قۇرىلىسى 2020 جىلى باستالعانىمەن, شەگىنە جەتپەي جۇمىس توقتاعان. باستاپقى مەردىگەرمەن كەلىسىمشارت ۇزىلگەن. وسى مادەنيەت ءۇيىنىڭ كۇردەلى جوندەۋ جۇمىسى بويىنشا «جەتىسۋكازسترويسەرۆيس» جشس-مەن 62 ميلليون 125 مىڭ تەڭگەگە كەلىسىمشارت جاسالىپ, مادەنيەت ءۇيى زامانعا ساي جاڭعىرىپ وتىر. بيىل شالعايداعى 12 اۋىلعا قاجەتتى مادەني نىساندار بلوكتى-ءمودۋلدى كونسترۋكتسيادان سالىنا باستادى.
ايتا كەتەيىك, جالپى تۇرعىندارىنىڭ سانى 1 مىڭ ادامنان اسپايتىن 12 اۋىلعا بلوكتى-ءمودۋلدى كلۋبتار ورناتۋعا وبلىستىق بيۋدجەتتەن 1,7 ملرد تەڭگە قاراستىرىلعان. وتكەن جىلى تاجىريبە رەتىندە ەڭ العاش ەسكەلدى اۋدانىنىڭ قوڭىر اۋىلىندا بمك (كلۋب) تۇرعىزىلسا, بيىل وعان قوسا الاكول, ەسكەلدى, قاراتال, كوكسۋ, كەربۇلاق اۋداندارىنىڭ اۋىلدارىندا جاڭا ۇلگىدەگى بلوكتى-ءمودۋلدى مادەني نىسانداردىڭ قۇرىلىس جۇمىسى ءجۇرىپ جاتىر.
سولاردىڭ ءبىرى كەربۇلاق اۋدانى شۇبار اۋىلىندا ورناتىلۋدا. قازىرگى تاڭدا نىسانداعى قۇرىلىس جۇمىستارىنىڭ شامامەن 40 % اياقتالعان.
«مەتالل كونسترۋكتسيالارىن قۇرىپ بىتىرگەن سوڭ سەندۆيچ پانەلمەن قاپتايمىز. سودان سوڭ سىرتقى جۇمىسىنا كىرىسەمىز. كلۋبتىڭ 120 ورىندىق كورەرمەن زالى, 11 بولمەسى بولادى. قۇرىلىس جۇمىستارىنىڭ كەستەسىنە ساي الدا ەكى اي ۋاقىتىمىز بار, بەلگىلەنگەن مەرزىمدە اياقتاۋدى جوسپارلاپ وتىرمىز», دەيدى مەردىگەر «اقتوبە ەكورت» جشس پرورابى بىرلىك قانتباەۆ.
ەلدى مەكەندە مادەنيەت وشاعىنىڭ سالىناتىنىنا اۋىل تۇرعىندارى قۋانىپ ءجۇر.
«اۋىلىمىزدا وسىنداي جاڭا نىسان سالىنىپ جاتقانىنا ريزامىز. بالاباقشا, مەكتەبىمىز بار. ەندى مادەنيەت وشاعى اشىلسا, جاستاردىڭ بوس ۋاقىتىن پايدالى وتكىزۋىنە جاقسى مۇمكىندىك تۋادى. ءوزىمىز دە ءبىر مەزگىل كونتسەرت كورسەك, مەرەكە وتكىزسەك, سىرتتان كەلەتىن ارتىستەردىڭ ويىنىن تاماشالاساق, اۋىل تۇرعىندارىنا دا رۋحاني دەمالاتىن ورىن بولار ەدى», دەيدى اۋىلدىق انالار كەڭەسىنىڭ توراعاسى نۇكەتاي كۇزەنباەۆا.
جالپى, جەتىسۋ وبلىسىندا 200-دەن استام مادەنيەت نىسانى حالىققا قىزمەت كورسەتەدى. وبلىس قۇرىلعالى بەرى 7 جاڭا مادەنيەت نىسانى اشىلدى, سونىڭ 5-ەۋى – مادەنيەت ءۇيى, 1 مۋزەي, 1 كىتاپحانا.
جەتىسۋ وبلىسى
