ناۋقاس ىشىندەگى ىسىگى وتىز كيلودان اسقانشا قالاي جۇرە بەرگەن دەسەڭىز, كەيىنگى ۋاقىتتا قارنى بىردەن وسە باستاعان, ءىشى شانشىپ اۋىرىپ, تاماق ىشكەننەن كەيىن تەز تويىپ قالعانداي بولىپ, ارقاسى ىلعي اۋىرىپ, السىزدىك پەن تەز شارشاپ قالاتىنىن بايقاعان دا, قازورعزي ماماندارىنا جۇگىنگەن.
ناۋقاستىڭ ايتۋىنشا, دەرتى 2023 جىلدىڭ جەلتوقسان ايىندا باستالىپ, بيىل شىلدە ايىنان بەرى ءىشى شار ۇرلەگەندەي ۇلكەيە باستاعان. دارىگەرلەر تەكسەرگەن كەزدە ناۋقاستىڭ قۇرساق قۋىسى مەن جامباس جاعىندا كيستوزدى ءتۇزىلىس (كت) بەلگىلەرى تابىلادى. ءىش قۋىسىنىڭ كومپيۋتەرلىك توموگرافياسى جامباس قۋىسىنان شىققان ۇلكەن كيستوزدى-قاتتى قۇرساق ماسساسىنىڭ سۋرەتىن كورسەتىپ, وعان قوسا CA 125 ونكوماركەرى دە جوعارىلاعانى انىقتالدى.
مەديتسيناداعى سيرەك كەزدەسەتىن وسى جاعدايعا قاتىستى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ونكوگينەكولوگيا ورتالىعىنىڭ مەڭگەرۋشىسى ەرلان كوكەباسوۆ: «2024 جىلعى 13 تامىزدا ونكوگينەكولوگيالىق ورتالىقتىڭ مۋلتيديستسيپلينارلىق توبىنىڭ (مدت) وتىرىسىندا وسى جاعداي تالقىلانىپ, ناۋقاسقا ەكىجاقتى كروسسەكتوميا, لاپاروتوميا, قوسالقىلارى بار جالپى گيستەرەكتوميا مەن ومەنەكتومياعا قوسا, وڭتايلى تسيتورەدۋكتسيا كولەمىندە حيرۋرگيالىق ەمدەۋ جولى ۇسىنىلدى. ناۋقاس كۇردەلى وپەراتسيا جاساۋعا, قان قۇيۋعا كەلىسىمىن بەرىپ, «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق گينەكولوگيالىق-ونكولوگيالىق ينستيتۋتىنا جاتقىزىلدى», دەدى.
ال ىسىكتى گيستولوگيالىق زەرتتەۋدەن وتكىزگەن كەزدە, ناتيجەسى ناۋقاستا انالىق بەزدىڭ قاتەرلى ىسىگىن انىقتاپ بەرگەن.
«وپەراتسيا ءۇش ساتى بويىنشا ءساتتى ءوتتى. ءبىرىنشى كەزەڭدە ەكىجاقتى كروسسەكتوميا جاسالدى, ويتكەنى ناۋقاستا اياعىنداعى كىشى جانە ۇلكەن كوكتامىرلارىندا كىنارات بولدى. ەكىنشى كەزەڭدە لاپاروتوميا, ياعني وڭ جاق انالىق بەزدىڭ اسا كولەمدى ىسىگى الىنىپ, قوسالقىلارى بار جالپى گيستەرەكتوميا, سونداي-اق ۇلكەن شاجىرقايدىڭ بولىكتەرى الىنىپ, وسىلايشا وڭتايلى وپەراتسيا جۇزەگە استى. انالىق بەز ىسىگىنىڭ ۇلكەندىگىنە بايلانىستى ءىشتىڭ الدىڭعى جاعى قاتتى سوزىلىپ كەتكەندىكتەن, ءۇشىنشى كەزەڭدە ابدومينوپلاستيكا جاساۋ قاجەت بولدى», دەيدى دارىگەرلەر.
ايتقانداي, قازورعزي ونكو-حيرۋرگتەرى ءدال وسىنداي الىپ ىسىكپەن ءبىرىنشى رەت بەتپە-بەت كەلىپ وتىر.
«ينستيتۋتىمىزدا ۇدايى وسىعان ۇقساس كلينيكالىق جاعدايلارعا كۋا بولىپ جاتامىز. دەگەنمەن بۇل ناۋقاستا انىقتالعان انالىق بەز ىسىگىنىڭ مولشەرى تاجىريبەمىزدە عانا ەمەس, اقش, ۇلىبريتانيا, تمد ەلدەرى مەن وكەانياداعى جەتەكشى ونكولوگيالىق مەكەمەلەردەگى ارىپتەستەرىمىزدىڭ تاجىريبە تۇرعىسىنان قاراعاندا دا, شىندىعىندا ەرەكشە وقيعا بولدى. بۇرىن ءدال وسىنداي كولەمدەگى ءىرى ىسىك تىركەلمەگەن ەكەن. الىنىپ تاستالعان ىسىكتىڭ سالماعى شامامەن 30-35 كيلو بولىپ, تىعىزدىعىمەن ەرەكشەلەندى», دەيدى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ باسقارما توراعاسى ديليارا قايداروۆا.
قازىرگى تاڭدا ناۋقاستىڭ احۋالى جاقسى, وزدىگىنەن قوزعالىپ, ءجۇرىپ-تۇرا الادى. مەديتسينالىق ۇجىمعا دەگەن ريزاشىلىعىندا شەك جوق, بىلىكتى دارىگەرلەردىڭ كەزىككەنىنە قۋانادى.
الماتى
