اتىراۋدا ءبىر كاسىپتى ديناستياعا اينالدىرعان وتباسىلار كوپ. سونىڭ قاتارىندا مۇنايلى ءوڭىر جۇرتشىلىعىنا كەڭىنەن تانىس باساروللا حارەسوۆتىڭ جانۇياسى بار. قازىر ءۇش بۋىنعا ۇلاسقان دارىگەرلەر ديناستياسىندا بۇل كاسىپتى ەكى ۋرولوگ, فتيزياتور, وكۋليست, نەۆروپاتولوگ, ستوماتولوگ, جالپى تاجىريبە دارىگەرى جالعاستىرىپ كەلەدى. ولاردىڭ جالپى ەڭبەك ءوتىلى – 155 جىل.
باساروللا حارەسوۆتىڭ ماماندىعى – ۋرولوگ. اقتوبە مەديتسينا ينستيتۋتىن 1969 جىلى بىتىرگەن سوڭ ەڭبەك جولىن وبلىستىق اۋرۋحانادا باستاعان. جاس مامان وسى اۋرۋحانادا دارىگەرلىك تاجىريبەسىن شىڭداپ, الدىڭعى بۋىننىڭ اقىل-كەڭەسىن, ءتالىمىن الۋدان جالىقپادى. ءسويتىپ, 1972-1973 جىلدارى باس دəرىگەردىڭ ەمدەۋ ءىسى جونىندەگى ورىنباسارى بولدى. ءتورت جىلدا ءوز ءىسىنىڭ بىلگىرى اتانىپ, ۇجىمدا ماقتاۋلى دارىگەرگە اينالعان وعان وبلىستىق قان قۇيۋ ستانساسىن باسقارۋ مىندەتى جۇكتەلدى.
ءوز ءىسىن جەتىك بىلەتىن دارىگەر 1986 جىلى وبلىستىق اۋرۋحاناعا قايتا ورالدى. ۇيىمداستىرۋ قابىلەتى دە, ىسكەرلىگى دە جەتىلگەن باساروللا حارەسوۆ تاعى دا باس دəرىگەردىڭ ەمدەۋ ءىسى جونىندەگى ورىنباسارى لاۋازىمىن اتقاردى. ال 1993-2006 جىلدارى ۋرولوگيا ءبولىمىنىڭ مەڭگەرۋشىسى بولدى. كەيىن ۋرولوگ-ورديناتور رەتىندە ناۋقاستاردى ەمدەپ, جاس بۋىندى وسى ماماندىقتىڭ قىر-سىرىنا ۇيرەتتى. ۇزاق جىلعى جەمىستى ەڭبەگى ءۇشىن كسرو دەنساۋلىق ساقتاۋ ءىسىنىڭ ۇزدىگى اتاندى.
ونىڭ ومىرلىك جارى بازارگۇل مىرزاعاليەۆانىڭ ماماندىعى – فتيزياتر. وكپەسىنە داق تۇسكەن جانداردى ەمدەۋگە بارىنشا اتسالىسىپ, ماماندىعىنا ادالدىعىنان اينىماعان جان.
ء«بىز دە بالالارىمىزدىڭ دارىگەرلىك كاسىبىمىزدى جالعاستىرعانىن قالادىق. ويتكەنى اق حالات كيگەن دارىگەردىڭ جانى اپپاق, جۇرەگى تازا بولادى. ادامزات ءۇشىن ەڭ قادىرلى ماماندىق – دارىگەر. سوندىقتان بالالارىمىزعا بۇل ماماندىقتىڭ ماڭىزىن ۇعىندىرا الدىق دەپ ويلايمىن. سونىڭ ناتيجەسىندەي, ءتورت بالامىزدىڭ ەكەۋى دارىگەر ماماندىعىن تاڭدادى. ءبىزدىڭ دارىگەرلىك كاسىبىمىز ءۇشىنشى بۋىنعا جالعاستى. قازىر اۋلەتىمىزدە جەتى دارىگەر بار», دەيدى ب.حارەسوۆ.
اكە-شەشەسىنىڭ دارىگەرلىك جولىن جالعاستىرعان الىبەك باساروللا ۇلى 8-سىنىپتان سوڭ اتىراۋ مەديتسينالىق ۋچيليششەسىندە وقىعان. جازعى دەمالىستا جەدەل جاردەم ستانساسىندا سانيتار بولىپ جۇمىس ىستەگەن ەكەن. ال قىزى ۆەنەرا وكۋليست بولۋدى ماقسات ەتىپتى. ادامنىڭ كوز جانارىن ساقتاۋعا ۇلەس قوسۋ ءۇشىن جوعارى ءبىلىم العان. قازىر جوعارى ساناتتى دارىگەر وبلىستىق وفتالمولوگيا اۋرۋحاناسىنداعى بىلىكتى ماماننىڭ بىرىنە اينالعان.
«جوعارى ءبىلىم الۋعا م.وسپانوۆ اتىنداعى باتىس قازاقستان مەديتسينالىق اكادەمياسىنا وقۋعا ءتۇستىم. ماماندىعىم – ۋرولوگ. قازىر اكەمنىڭ جولىن جالعاستىرىپ, وبلىستىق اۋرۋحانادا جۇمىس ىستەيمىن», دەيدى الىبەك باساروللا ۇلى.
وسى اۋلەتتىڭ كەلىنى گۇلسىم قازماعامبەتوۆا دا دارىگەر ماماندىعىن تاڭداعان. ول دا اقتوبەدەگى مەديتسينالىق اكادەميانى بىتىرگەن. قازىر وبلىستىق بالالار اۋرۋحاناسىندا نەۆروپاتولوگ بولىپ جۇمىس ىستەپ ءجۇر. كۇيەۋى الىبەك باساروللا ۇلى ەكەۋى التى بالا تاربيەلەپ وتىر.
دارىگەرلەر ديناستياسىنىڭ ءۇشىنشى بۋىنىن بالجان Əلىبەكقىزى مەن نۇرجان نۇرلان ۇلى جالعاستىرىپ كەلەدى. بالجان ستوماتولوگيا سالاسىن مەڭگەرگەن. ال نۇرجان – جالپى تəجىريبە دəرىگەرى.
اتىراۋ وبلىسى
