قوعامدا اتوم ەلەكتر ستانساسىن سالۋ-سالماۋ تۇرعىسىنداعى پىكىر ەكىگە جارىلعانى بەلگىلى. جولداۋدا پرەزيدەنت بۇل ماسەلە ەل بولىپ رەفەرەندۋم نەگىزىندە ايقىندالاتىن ەلەۋلى قادام ەكەنىن اتاعان بولاتىن. مەملەكەتتى تۇراقتى ءارى قاۋىپسىز ەكولوگيالىق تازا ەنەرگيا كوزىمەن قامتۋ ۋاقىت سۇرانىسىنان تۋىنداعان قاجەتتىلىك ەكەنىن العا تارتقان ماماندار ەلدەگى ەنەرگو نىسانداردىڭ 65 پايىزى ەسكىرگەنىن تىلگە تيەك ەتتى. ورتالىق مۇشەلەرىنىڭ ايتۋىنشا, ستانسا سالىنباس بۇرىن, بولىنەتىن قاراجات پەن سۋ ماسەلەسىن ۇتىمدى شەشىپ الۋ قاجەت.
«حالىقتىڭ ءال-اۋقاتىن جاقسارتىپ, ونەركاسىپتى وركەندەتۋ ءۇشىن اەس ماڭىزى زور. عالىمداردىڭ ەسەپتەۋىنشە, ءبىر اتوم رەاكتورىن سالۋ ءۇشىن 12 ملرد دوللارداي قارجى كەرەك. بۇل – ءبىر. ەكىنشى ماسەلە – سۋ. اەس-ءتى بالقاش كولى جاعاسىنا سالسا, ۇتىمدى شەشىم بولار ەدى. ەنەرگەتيكاسىز ەكونوميكانىڭ ەشبىر سالاسى دامىمايدى. دامىعان ەلدەر ۇزدىكسىز قۋات بەرەتىن تەحنولوگيالاردى ءتيىمدى پايدالانىپ وتىر. ەلىمىزدە بۇل باعىتتا تابيعي رەسۋرس جەتكىلىكتى. ەنەرگيا تۇتىنۋ كولەمى كۇن وتكەن سايىن بارلىق ايماقتا ارتىپ كەلەدى. اۆياتسيانى دامىتۋ ماسەلەسى دە جولداۋدا ايتىلدى. قازاقستان اۋە كەڭىستىگى ارقىلى جىل سايىن تاسىمالداناتىن جۇك كولەمىن 4 جىلدىڭ ىشىندە 300 مىڭ تونناعا دەيىن جەتكىزۋ ءۇشىن كۇش سالۋى قاجەت. ەل اۋماعى كەڭ. ءتىپتى كەيبىر اۋدانداردا كىشىگىرىم اۋە ايلاعىن سالۋ ارتىق ەتپەيدى. تۋريستىك الەۋەت ارتادى ءارى تۇرعىندار ءۇشىن جەدەل جاردەم كومەگىنە جۇگىنۋ جەڭىلدەيدى», دەيدى «الماتى حالىقارالىق اۋەجايى» جەرگىلىكتى كاسىپوداق ۇيىمىنىڭ توراعاسى دانيار التىباەۆ.
ونەركاسىپ ورگە باسۋ ءۇشىن ەنەرگەتيكالىق تاۋەلدىلىكتەن ارىلۋ كەرەك دەگەن الماتى قالاسى كاسىپوداقتار ورتالىعىنىڭ ءتورايىمى زاۋرەش ومىرباەۆا اەس ەنەرگەتيكا سالاسىنا سەنىمدىلىك سىيلايدى دەگەن پىكىردە. مامانداردىڭ ايتۋىنشا, اتوم ەلەكتر ستانسالارى الەمنىڭ 30-دان استام ەلىندە بار. ولاردىڭ ەڭ قۋاتتىلارى وڭتۇستىك كورەيا, فرانتسيا, جاپونيا ەلدەرىندە ورنالاسقان. باۋىرلاس تۇركيا مەملەكەتى دە بۇل باعىتتا ماڭىزدى قادامعا بارىپ وتىر.
«ەلدىڭ جان-جاقتى دامۋىندا ناقتى باعىتتار ۇنەمى ايقىندالىپ وتىرۋى ءتيىس. جىل سايىنعى جولداۋ ەلدەگى قالىپتاسقان ماسەلەلەردى شەشۋگە, ستراتەگيالىق مىندەتتەردى ورىنداۋعا كوپ سەپتىگىن تيگىزەدى. ماسەلەن, اەس تاقىرىبى جىلدار بويى قوعام اراسىندا قىزۋ تالقىلانىپ كەلدى. وسى تاقىرىپتا 16 تامىز كۇنى الماتىدا جاريا تالقىلاۋ دا ءوتتى. جۇرتشىلىق ماسەلەگە ساۋاتتى كوزقاراسپەن ۇڭىلسە, وڭتايلى شەشىمگە كەلەمىز دەگەن سەنىم باسىم», دەيدى زاۋرەش ومىرباەۆا.
ەلدەگى ەڭ ۇلكەن مەگاپوليستەگى كاسىپوداقتار ورتالىعىنىڭ وكىلدەرى رەفەرەندۋمنىڭ اشىق ءارى ءادىل وتەتىنىنە سەنىم ءبىلدىردى. سونداي-اق ولار ازاماتتاردى ەل ومىرىندە تىكەلەي ماڭىزى بار شەشىم قابىلداناتىن ۇدەرىستەن شەت قالماۋعا شاقىردى.
الماتى
