قوعامدىق ساياسات ينستيتۋتى ەل ازاماتتارىنىڭ اەس تۋرالى پىكىرىن ءبىلدى

قوعامدىق ساياسات ينستيتۋتى 6 قازاندا وتەتىن اتوم ەلەكتر ستانتسياسىن سالۋ جونىندە رەفەرەندۋمعا وتانداستارىمىزدىڭ كوزقاراسىن زەرتتەۋگە باعىتتالعان ەكسپرەسس-ساۋالناما جۇرگىزدى. زەرتتەۋگە قازاقستاننىڭ ءارتۇرلى ايماقتارىنان 2000-نان استام تۇرعىن قاتىستى, ولاردىڭ اراسىندا جاستار, زەينەتكەرلەر, كوپبالالى وتباسىلار جانە باسقا دا الەۋمەتتىك توپ وكىلدەرى بار.

ينستيتۋت ديرەكتورى مادينا نۇرعاليەۆانىڭ ايتۋىنشا, بيىل 6 قازاندا وتەتىن رەسپۋبليكالىق رەفەرەندۋم تۋرالى جالپى العاندا رەسپوندەنتتەردىڭ 74,6%-ى حاباردار. ساۋالناماعا قاتىسۋشىلاردىڭ 57,8%-ى رەفەرەندۋمعا قاتىسۋدى جوسپارلاپ وتىر, ال 59,3%-ى قازاقستاندا اەس سالۋدى قولدايدى. دەگەنمەن, ەل تۇرعىندارىنىڭ اەس قۇرىلىسى تۋرالى پىكىرلەرى ەندى عانا قالىپتاسىپ جاتقانىن اتاپ وتكەن ءجون.

ء«بىزدىڭ زەرتتەۋىمىز حالىقتىڭ باسىم بولىگىنىڭ الداعى داۋىس بەرۋ تۋرالى حاباردار ەكەنىن جانە رەفەرەندۋمعا بەلسەندى قاتىسۋدى جوسپارلاپ وتىرعانىن كورسەتتى. ازاماتتاردىڭ جوعارى دەڭگەيدە حاباردار بولۋى جانە قاتىسۋى اتوم ەلەكتر ستانتسياسىن سالۋ ماسەلەسى ۇلكەن قىزىعۋشىلىق پەن قىزۋ تالقى تۋدىرىپ جاتقانىن بىلدىرەدى. بۇل دەرەكتەر شەشىم قابىلداۋدا ماڭىزدى ءرول اتقارادى, ويتكەنى رەفەرەندۋمنىڭ مىندەتى – بارىنشا اشىقتىقتى قامتاماسىز ەتۋ جانە ەلدىڭ ءاربىر تۇرعىنىنىڭ پىكىرىن ەسكەرۋ», دەپ اتاپ ءوتتى مادينا نۇرعاليەۆا.

ساۋالناما بارىسىندا «face-to-face» ءادىسى قولدانىلدى, قوعامدىق ساياسات ينستيتۋتىنىڭ باس ساراپشىسى مەدەت ومىرزاقوۆتىڭ ايتۋىنشا, بۇل دەرەكتەردى جيناۋدىڭ ەڭ ءدال ادىستەرىنىڭ ءبىرى سانالادى.

«دەرەكتەردى جيناۋ ە-اناليتيكا جۇيەسى نەگىزىندە قاعازسىز تۇردە جۇرگىزىلدى, ساۋالناما پروتسەسى اۆتوماتتى تۇردە تىركەلىپ وتىردى. بۇل ءادىس رەسپوندەنتپەن جەكە بەتپە-بەت سۇحباتتى بىلدىرەدى, ول بىزگە ونىڭ جاۋاپتارىمەن قاتار رەاكتسياسىن, سۇحباتتىڭ وتكىزىلۋ ۇزاقتىعىن جانە GPS-كوورديناتتارىن تىركەۋگە مۇمكىندىك بەرەدى. بۇل دەرەكتەردىڭ ساپاسىن ارتتىرىپ, ساۋالنامانىڭ دالدىگىن باقىلاۋعا كومەكتەسەدى. ءبىز سونداي-اق سۇحبات ۋاقىتىن باقىلاۋ جانە قوسىمشا سۇراقتارىن قويۋ سياقتى ءارتۇرلى تەكسەرۋ ادىستەرىن قولدانامىز», دەدى ول.

قوعامدىق ساياسات ينستيتۋتىنىڭ ساراپشىلارى ءسوز سوڭىندا مۇنداي الەۋمەتتىك زەرتتەۋلەر ەل ازاماتتارىنىڭ جاعدايدى جاقسىراق ءتۇسىنىپ, نەگىزدەلگەن شەشىمدەر قابىلداۋىنا كومەكتەسەتىنىن اتاپ ءوتتى.

ساۋالناما قر زاڭناماسىنىڭ نورمالارىن ساقتاي وتىرىپ جۇرگىزىلگەن.