سۋرەتتى تۇسىرگەن – ەرلان ومار, «EQ»
اڭگىمەنىڭ اشىعىن ايتايىق, ءبىزدىڭ اۋىلدا قوپارگۇل دەگەن قىز بولدى. سىنىپتاستارىنىڭ قويعان اتى عوي, نەگىزى, ەسىمى ءاپ-ءايبات. ءوزى دە سۇيكىمدى قىز ەدى. ونى كىم قوپارگۇل اتاندىرىپ جىبەرگەنىن بىلمەيمىن. قۋشىكەش بىرەۋ بايقاۋسىزدا سولاي دەپ قالسا كەرەك, كەيىن بۇل اتى ۇمىتىلىپ كەتتى, الايدا مەنىڭ ەسىمدە قالىپ قويدى. سول قوپارگۇلدىڭ اتاسى قالىپقا سىيمايتىن جان دەسەتىن. اقساقالدىڭ ءوزىن كورگەم جوق, بىراق ۇلكەندەردەن ەستىگەن ءبىر اڭگىمەسىن بىلەم. نەتكەن اڭگىمە دەسەڭىزشى؟
الگى شالدىڭ الدىنا بەتتەپ ەشكىم كەلە بەرمەيتىن كورىنەدى. سىرتتى بىلمەيمىن, اۋىل ىشىندە سولاي ەكەن. بىراق قازاق بالاسى قاشان ۇلكەننىڭ جولىن كەسىپ, جاعاسىنان العانداي. سودان ءبىر كۇنى وسى اقساقالىمىزدى كورشى كوشەدەگى تۇرعىلاسى قوناققا شاقىرىپتى. دايىندالىپ, اۋىلدىڭ سورپا بەتىنە شىعار جاقسىلارىن قوناق قىلسا كەرەك ءۇي يەسى. الدە اۋىل ءىشىنىڭ ۇيرەنشىكتى «ومىرتقا», «شەكەسىنىڭ» ءبىرى مە, ايتەۋىر «ايتەكەڭدىكى شاقىرىپتى» دەيدى, بولدى, باسقا اڭگىمە جوق ەدى عوي ۇلكەندەردە.
الگى بىربەتكەي اقساقالىمىز شاقىرعان ايتەكەڭدىكىنە بارسا, ءبىر شال قىدىڭداپ ءتيىسىپ قويمايتىن كورىنەدى. و شەتىنەن ءبىر, بۇ شەتىنەن ەكى شىعىپ, مازاسىن العان. «قىزىپ» العان بولسا كەرەك. داستارقان باسىندا دا ءبىر-ەكى رەت سوزبەن سۇيكەپ وتسە دە, بىربەتكەي اقساقالىمىز ۇندەمەي ەتىن جەپ, سورپاسىن سوراپتاپ وتىرا بەرىپتى. ەت پەن سورپادان سوڭ بەلگىلى, ءسال اڭگىمە-دۇكەن, سوسىن شاي داستارقان بار. ول ەكى ارالىقتا دا الگى اۋمەسەر باياعى «اۋەنىنە» باسسا دا, ءبىزدىڭ شال ۇندەمەي شىداپتى. سوسىن ەل كەتكەن سوڭ, ءۇي يەسى ايتەكەڭدى شاقىرىپتى. قاسىنا وتىرۋعا ەندى ىڭعايلانا بەرگەندە, «شاقىرعانداعى ماقساتىڭ انانى ءىشتىرىپ, مەنى ساباتۋ بولدى عوي, جازاڭ – وسى», دەپ قامشىمەن باسقا ءبىر سالىپ, شىعىپ كەتىپتى. ءۇي يەسى باسى سالبىراعان كۇيى قالىپتى ورنىندا. قارسىلىق ءبىلدىرىپ, ءلام-ميم دەمەگەن. جاستاۋ كەزىمدە وسى اڭگىمەنى تۇسىنە الماي, ىشتەي بىربەتكەي, قىڭىر شالدى كىنالايتىنمىن. ءۇي يەسىن ەمەس, قولى قىشىسا, مازاسىن العان قىزۋ شالدى نەگە ساباماعان دەپ. سويتسەم, ءمانى باسقادا سياقتى. ۇيىڭە شاقىرىپ, ارنايى قوناق قىلعان ەكەنسىڭ, جاۋاپكەرشىلىك موينىڭدا. تەلى-تەنتەكتى قۇرمەتتەپ, باسقالاردىڭ باسىنا شىعارىپ قويعانى – ءۇي يەسىنىڭ كىناسى. قامشى تيگەندە, قارسىلاسپاعان ول دا قاسيەتسىز بولماي تۇر. اقساقالداردىڭ ءاربىر ارەكەتىندە وسىنداي ءمان جاتاتىن. باعامداي الساق, ارينە.
