سۋرەتتەردى تۇسىرگەن – ەرلان ومار, «EQ»
قازاق كۇرەسىنەن بالۋاندار 16 سالماقتا (8 ەر, 8 ايەل) بەلدەسۋگە شىعادى. «Qazaq kuresi» اسسوتسياتسياسىنىڭ باس ديرەكتورى دامير بەكبوسىنوۆ بالۋاندار جانكۇيەر ءۇمىتىن اقتايتىنىنا سەنىم ءبىلدىردى.
ء«دۇبىرلى دودادا بالۋاندارىمىز بارىن سالادى دەپ ۇمىتتەنەمىز. وقۋ-جاتتىعۋ جيىنى بىرنەشە مارتە ۇيىمداستىرىلدى. مەملەكەت تاراپىنان بارلىق جاعداي جاسالىپ, قۇراما مۇشەلەرى الاڭسىز ازىرلىك جۇرگىزدى. دۇنيەجۇزىلىك كوشپەلىلەر ويىندارىندا قازاق كۇرەسىنەن سىنعا تۇسەتىن ەرلەر مەن ايەلدەر قۇراماسىن ىرىكتەۋ تەك قازاقستان چەمپيوناتىمەن شەكتەلگەن جوق, باسقا دا ايتۋلى دودالاردا جارقىراپ كورىنگەن ۇزدىكتەرگە سەنىم ارتىپ وتىرمىز. 2022 جىلى تۇركيانىڭ يزنيك قالاسىندا وتكەن كوشپەلىلەر ويىندارىندا ءتول كۇرەسىمىزدەن چەمپيون اتانعان بالۋاندار دا – قاتارىمىزدا. ودان بولەك, «قازاقستان بارىسى» سىندى رەسپۋبليكالىق, حالىقارالىق تۋرنيرلەردە دارالانعان دارابوزدار دا بەلدەسۋگە تۇسەدى. كۇرەس تۇرلەرىنەن ەلۋگە تارتا مەملەكەتتەن بالۋاندار قاتىسادى دەگەن جوسپار بار. قارسىلاستىڭ قاي-قايسىسى دا وسال ەمەس. اسىرەسە وزبەكستان, گرۋزيا, موڭعوليا, رەسەي ەلدەرىنەن كەلەتىن قۇرامالاردىڭ ساپىندا دزيۋدو كۇرەسىنەن گران پري, گراند سلام سىندى داقپىرتى دا, داڭقى دا الەم چەمپيوناتىنان كەم سوقپايتىن دودالارعا توپ جارعان ۇزدىكتەر دە قاتىسۋعا ىقىلاس تانىتىپ وتىر. ۇلتتىق قۇراما مۇشەلەرى بىرنەشە كۇن بۇرىن استانا قالاسىنا كەلىپ, اۋا رايىنا بوي ۇيرەتىپ, سايىس وتەتىن جاقسىلىق ۇشكەمپىروۆ اتىنداعى جەكپە-جەك سارايىنىڭ اۋراسىن سەزىنىپ, قورىتىندى وقۋ-جاتتىعۋ جيىنىنا قاتىسىپ جاتىر. قازاق كۇرەسىنەن بالۋاندارىمىز توعىز سالماقتا چەمپيون اتانۋدان ءۇمىتتى. ارينە, وزگە سالماقتا دا جەڭىسكە جەتسە, مارتەبەمىز بيىكتەي تۇسەتىنى انىق. بىراق قاشاندا «ارىق سويلەپ, سەمىز شىققان» ورىندى», دەدى د.بەكبوسىنوۆ.
قازاق كۇرەسىنەن ۇلتتىق قۇراما بالۋاندارى 16 سالماق بويىنشا ساراپقا سالىناتىن مەدالدار جيىنتىعىندا 9 التىن ولجالاۋ مىندەتتەمەسىن ارقالاپ وتىر. باس باپكەر عاني كەلدىقۇلوۆ قۇراما مۇشەلەرىن جاساقتاۋدا باسەكەلەستىكتىڭ جوعارى بولعانىن اتاپ ءوتتى.
«قازاق كۇرەسى ءتول ونەرىمىز بولعاندىقتان, ەلىمىزدە كەڭ قانات جايىپ, شۇعىلدانۋشىلاردىڭ دا قاتارى ارتىپ كەلەدى. سول سەبەپتى دە دۇنيەجۇزىلىك كوشپەلىلەر ويىندارىنا قاتىساتىن قۇراما مۇشەلەرىن جاساقتاۋدا تاڭداۋ وڭاي بولمادى. ءتىپتى كەيبىر سالماق دارەجەسىندە بىرنەشە بالۋاندى ءوزارا بەلدەستىرىپ تە الەۋەتىن سىناپ كوردىك. ەتنوسپورت وليمپياداسى دەپ تە ايتىلاتىن كوشپەلىلەر ويىندارىندا ەلىمىز بالۋانداردان تولايىم جەڭىس كۇتەدى. قارسىلاستار دا استاناعا ەل كورىپ, جەر شالۋ ءۇشىن كەلمەيتىنى بەلگىلى. دەسە دە ءتول كۇرەسىمىزدەن ولجا سالۋدا ايانىپ قالمايمىز», دەدى ع.كەلدىقۇلوۆ.
ەكى جىل بۇرىن تۇركيادا وتكەن IV دۇنيەجۇزىلىك كوشپەلىلەر ويىندارىندا سپورتشىلارىمىز وسى قازاق كۇرەسىنەن وراسان تابىسقا كەنەلگەن ەدى. سول سىندا قارسىلاستارىن ايقىن ۇتىپ, چەمپيون اتانعان زارينا ساريپوۆا دا استانا تورىندە سايىسقا تۇسەدى.
«دۇنيەجۇزىلىك كوشپەلىلەر ويىندارىنىڭ ەكى دۇركىن جەڭىمپازى اتانسام دەيمىن. ارينە, ءوز ەلىمىزدە, جانكۇيەرلەردىڭ القاۋىمەن وتەتىن الاماندا التىن مەدال يەلەنۋ – ءبارىنىڭ ارمانى. قارسىلاستاردىڭ قاي-قايسىسى دا وسال ەمەس. باپكەرلەردىڭ تىڭعىلىقتى دايىندىق جۇرگىزۋىنىڭ ناتيجەسىندە بابىمىزعا ەنىپ, قورىتىندى جاتتىعۋ جيىنىن وتكىزىپ جاتىرمىز», دەدى چەمپيوندىق اتاقتان باستى ۇمىتكەردىڭ ءبىرى بالۋان قىز.
قىرعىزدىڭ الىش بەلبەۋ كۇرەسىنەن دە بالۋاندارىمىز سايىسقا تۇسەدى. وسى سپورت تۇرىنەن ۇلتتىق قۇرامانىڭ باس باپكەرى سەكەن قاليەۆ 12 سالماق دارەجەسىندە كۇرەسەتىن شاكىرتتەرى كەمىندە 2 التىن مەدال ولجالاۋعا قاۋقارلى ەكەنىن جەتكىزدى.
«دۇنيەجۇزىلىك كوشپەلىلەر ويىندارىن قىرعىزدار 2014 جىلدان باستاپ ۇيىمداستىرىپ, الەمدىك دەڭگەيگە كوتەردى. وزدەرىنىڭ الىش بەلبەۋ كۇرەسىنەن جەڭىستى وڭايلىقپەن بەرمەيدى. داڭقى جوعارى دوداعا قاتىساتىن بالۋانداردى ەل بىرىنشىلىگىندە ىرىكتەپ الدىق. قىزدار باسەكەسىندە 6, ەرلەر سىنىندا 6 بالۋانعا سەنىم ارتىپ وتىرمىز. وقۋ-جاتتىعۋ جيىنى دا جۇيەلى جۇرگىزىلىپ, سپورتشىلاردىڭ فيزيكالىق الەۋەتىن ارتتىرۋعا باسا كوڭىل ءبولىندى. قازىر ەندى دودا الدىنداعى قورىتىندى جيىندا تاكتيكالىق دايىندىققا دا كۇش سالىپ كەلەمىز. قۇراما ساپىندا الىش كۇرەسىنەن ازيا چەمپيوناتىندا جەڭىسكە جەتكەن, دۇنيەجۇزىلىك كوشپەلىلەر ويىندارىندا التىن مەدال يەلەنگەن ساڭلاقتارىمىز دا بار. سول بيىگىمىزدەن تومەندەمەۋ ءۇشىن تىنباي ەڭبەكتەنەمىز», دەدى باپكەر.
تۇرىكتىڭ اشىرتمالى ابا كۇرەسىنەن سىنعا تۇسەتىن بالۋاننىڭ ءبىرى مارات نىعماتۋللاەۆ باۋىرلاس حالىقتىڭ ءتول سپورتىنىڭ ارتىقشىلىعى كوپ ەكەنىن ايتادى.
«2022 جىلى وتكەن كوشپەلىلەر ويىندارىندا ەكى كۇرەس تۇرىنەن بەلدەسۋگە ءتۇستىم. 60 كگ سالماقتا قازاق كۇرەسىنەن چەمپيون اتاندىم. ال تۇرىكتىڭ كۇرەسىنەن باعىم جانبادى. سەبەبى تاجىريبەمىز تىم تولىمسىز بولدى. قازاق كۇرەسىنەن ايىرماشىلىعى دا كوپ, ەرەجەسى دە وزگەشە. تورەشى تيىنمەن جەرەبە تاستايدى. كىمگە تۇسەدى, سول الدىمەن قارمانادى. باسا ءمان بەرەتىن جايت, بەلبەۋدەن ۇستاعان قولىڭ بوساماۋى كەرەك. ەگەر كۇرەس كەزىندە قولىڭ قارسىلاستىڭ بەلبەۋىنەن سۋسىپ كەتسە, جەڭىلىس جازىلادى. ەكى جىلدان بەرى كادىمگىدەي توسەلىپ, قىر-سىرىن دا يگەرىپ قالدىم. بۇل كۇرەس تۇرىنەن تۇرىك بالۋاندارى كوشباسشى سانالادى. بىراق ءبارىن كىلەمدەگى بەلدەسۋ انىقتايدى», دەدى بىلىكتى بالۋان.
