باقىت اقان ۇلى اكادەميادا 2015 جىلدان بەرى قىزمەت اتقارادى. وعان دەيىن سولتۇستىك قازاقستان وبلىسىنداعى م.قوزىباەۆ ۋنيۆەرسيتەتىندە وقىتۋشى بولىپ جۇمىس ىستەگەن. وعان دەيىن ءال-فارابي اتىنداعى قازاق ۇلتتىق ۋنيۆەرسيتەتىندە تاريح جانە ءدىن ماماندىعى بويىنشا ماگيستراتۋرادا ءبىلىمىن شىڭداعان.
«جالپى ءبىلىم بەرۋ كافەدراسىندا قىزمەت ەتەمىن. 90-نان استام عىلىمي ماقالا, 2 عىلىمي مونوگرافيا جازدىم. ءبىر مونوگرافيام «مادەني مۇرا» باعدارلاماسى اياسىندا سولتۇستىك قازاقستان وبلىسىنىڭ تاريحى, ارحيتەكتۋراسى, ەسكەرتكىشتەرى, ارحەولوگياسى تاقىرىبىندا بىرنەشە عالىمنىڭ قاتىسۋىمەن جازىلدى. بۇل ەڭبەكتى جازىپ شىعۋعا ءۇش جىل ۋاقىتىمىز كەتتى. 900 بەتتەن تۇراتىن زەرتتەۋىمىز بارلىق وڭىردەگى كىتاپحانالاردا بار. 2015 جىلى سول كەزدەگى ۇلتتىق ۇلان باس قولباسشىسىنىڭ بۇيرىعىمەن اكادەميادا جاڭا كافەدرا اشىلدى. بۇعان دەيىن بۇل باسقا كافەدرا قۇرامىندا بولعان. وسى كەزەڭدە ول جەكە كافەدرا بولىپ قۇرىلدى. جاڭا شتات جاساقتالدى. بىزگە كافەدرانىڭ دەڭگەيىن كوتەرۋ جۇكتەلدى. ماقالالار جازا باستادىق. بۇل جەردە بۇرىن كۋرسانتتارمەن ەشكىم عىلىمي جۇمىس جۇرگىزبەگەن ەكەن. كۋرسانتتاردىڭ عىلىمي قاۋىمداستىعىمەن جۇمىس جۇرگىزە باستادىق. 2017 جىلى قوستانايدا ورنالاسقان ش.قابىلباەۆ اتىنداعى ءىىم اكادەمياسىندا كۋرسانتتار اراسىندا حالىقارالىق عىلىمي كونكۋرس بولدى. وعان وزگە مەملەكەتتەردەن قاتىسۋشىلار كەلدى. ەلىمىزدىڭ دە وزگە اسكەري ۆەدومستۆولارىنان ۇمىتكەرلەر قاتىستى. كونكۋرستا ءبىزدىڭ اكادەميا كۋرسانتتارى ءبىرىنشى ورىن يەلەندى. ولار اسكەرگە مەملەكەتتىك ءتىلدى ەنگىزۋ تاقىرىبىن قورعادى. كۋرسانتتار اراسىنداعى ءدىني تولەرانتتىلىق پەن قارىم-قاتىناس ماسەلەسىن كوتەردى», دەيدى اكادەميانىڭ قاتارىنان ەكى رەت ۇزدىك وقىتۋشىcى اتانعان باقىت اقان ۇلى.
ۇستاز بەن شاكىرتتەرىنىڭ جەتىستىكتەرى مۇنىمەن توقتالىپ قالعان جوق. 2022 جىلى ءىىم-ءنىڭ ۆەدومستۆوارالىق كونكۋرسىنا قاتىسىپ ءبىرىنشى ورىن العانى تاعى بار. تاقىرىبى – «كوروناۆيرۋس پاندەمياسىنا بايلانىستى جاريالانعان توتەنشە جاعداي كەزىندە ونلاين ساباق وتكىزۋ». ناقتىراق ايتقاندا, كۋرسانتتار مەن وقىتۋشىلار اراسىنداعى ينتەرنەت بايلانىسى كەزىندەگى قاۋىپسىزدىك ماسەلەسىن جان-جاقتى كوتەرىپ, وقۋ ۇدەرىسىن جالعاستىرۋ جولدارى زەردەلەندى. باقىت اقان ۇلىنىڭ ايتۋىنشا, سول كەزدە ۇزدىك اتانعان كۋرسانتتار بۇگىندە اسكەر قاتارىندا لاۋازىمدى قىزمەتتەر اتقارىپ ءجۇر. قۋانتاتىنى سول, ساربازداردى عىلىم سالاسىنا باۋليتىن ءداستۇر جالعاسىپ كەلەدى. وقىتۋشىلار ءبىرىنشى كۋرسقا كەلگەن كۋرسانتتار اراسىنان عىلىم-بىلىمگە جاقىن بىرنەشە بالانى ىرىكتەپ, ولارعا عىلىمي ىزدەنىستىڭ العىشارتتارى مەن ماقالا جازۋدىڭ قىر-سىرىن ۇيرەتەدى. وسىدان بىرنەشە اي بۇرىن اكادەميا كۋرسانتتارى الماتىدا وتكەن حالىقارالىق عىلىمي جۇمىس بايقاۋىنان ولجالى ورالدى. بۇل جولى ولار سۋ تاسقىنى مىسالىنداعى وقۋ ءۇردىسى جايىندا جوبا قورعاپ شىقتى. اكادەميادا كۋرسانتتاردان بولەك, وقىتۋشىلار قۇرامى دا ۇدايى ءبىلىمىن جەتىلدىرىپ وتىرادى.
«بىلتىر ءبىزدىڭ كافەدرادان ءۇش ادام تاشكەنت قالاسىنداعى قوعامدىق قاۋىپسىزدىك ۋنيۆەرسيتەتىنە دوكتارانتۋراعا وقۋعا تۇستىك. بيىل ءبىرىنشى كۋرس ءبىتىرىپ جاتىرمىز. وقۋ دەمالىسىن الىپ, ەمتيحان كەزدەرىندە بارىپ كەلەتىن مۇمكىندىگىمىز بار. قازىر عىلىمي جەتەكشىلەرىمىزبەن تانىسىپ, ءوزىمىز زەرتتەيتىن تاقىرىپتاردى ايقىندادىق. دوكتورلىق جۇمىسىمنىڭ تاقىرىبى – «قازاقستان مەن وزبەكستاننىڭ اسكەري جوعارى وقۋ ورىندارى اراسىندا اكادەميالىق اۋىسىم جۇمىستارىن ۇيىمداستىرۋ». ماسەلەن, ازاماتتىق ورتاداعى جوعارى وقۋ ورىندارىندا ءبىلىم الاتىن ستۋدەنتتەر شەتەلدىك ءبىلىم وردالارىنا اكادەميالىق اۋىسىممەن بارا الادى. ياعني سول جاقتا كەمىندە ءبىر سەمەستر ءبىلىم الىپ, تاجىريبە الماسادى. وسىنداي مۇمكىندىكتەردىڭ اسكەري ءبىلىم وردالارىندا دا بولعانىن قالايمىن. بۇل باكالاۆردان بولەك, ماگيستراتۋرادا ءبىلىم الاتىن وفيتسەرلەر ءۇشىن ماڭىزدى سانالادى», دەيدى ب.اقان ۇلى.
قىزمەتىنە شىن بەرىلگەن وقىتۋشى وتباسىلىق ءومىرىن دە نازاردان تىس قالدىرماعان. بالالارىنىڭ دا ءبىلىمدى, ەلگەزەك ازامات بولىپ ءوسۋى ءۇشىن لايىقتى تاربيە بەرىپ ءجۇر. «اكە كورگەن وق جونار» دەمەكشى, بۇگىندە كەيىپكەرىمىزدىڭ ۇلكەن بالاسى ىستانبۇل مەملەكەتتىك ۋنيۆەرسيتەتىندە حالىقارالىق قۇقىق جانە ساۋدا ماماندىعى بويىنشا 4-كۋرستا ءبىلىم الىپ جاتىر. ال ەكىنشى ۇلى مەكتەپتە ۇزدىك وقيدى. ءۇيدىڭ كەنجەسى ءبىر جاستا. قاۋىرت قىزمەتتە جۇرسە دە اسكەري عىلىمنىڭ دامۋىنا ۇلەس قوسىپ, وتباسى الدىنداعى جاۋاپكەرشىلىكتىڭ جۇگىن ۇمىتپاعان ۇلاندىقتىڭ وتان الدىنداعى مىندەتىنە دە ءمىنسىز بولارىنا كۇمان جوق.
