رۇقسات ەتىلگەن اڭشىلىق

31 تامىزدان 30 قاراشاعا دەيىن قاز, ۇي­رەكتى, قاسقالداقتى, 1 قىركۇيەك – 15 قا­راشا ارالىعىندا بورسىقتى, 15 قىر­كۇيەكتەن 30 قاراشاعا دەيىن قۇردى, 2 قىر­كۇيەكتەن 30 قاراشاعا دەيىن ءشىلدى, 2 قىركۇيەك – 31 جەلتوقسان ارالىعىندا جا­بايى شوشقانى, 15 قىركۇيەكتەن 31 جەلتوقسانعا دەيىن ءسىبىر ەلىگىنىڭ انالىعى مەن لاقتارىن, 1 قاراشادان 2025 جىلدىڭ 15 اقپانىنا دەيىن قويان, تۇلكى, قارساقتى اۋلاۋعا رۇقسات بەرىلەدى. ال يتپەن جانە جىرتقىش قۇستارمەن ساياتشىلىق جاسايتىندار ءۇشىن قويان, تۇلكى, قارساق اۋلاۋ كەزەڭى 15 قازاننان 2025 جىلدىڭ اقپان ايىنا دەيىن دەپ كورسەتىلگەن.

«بەكىتىلگەن كۆوتاعا سايكەس, 28 092 ۇيرەك, 2 034 قاز, 2 086 قاسقالداق, 1 179 قۇر اۋلاۋعا رۇقسات ەتىلگەن. بۇعان قوسا 130 قاراقۇيرىق, 194 بورسىق, 1 730 سۋىر, 5 212 قويان, 354 تۇلكى, 87 قارساق, 12 جا­بايى شوشقا جانە 161 ەلىك كۆوتاعا ەندى. كۇزگى-قىسقى اڭشىلىق ماۋ­سىمى وبلىس اۋماعىنداعى 38 اڭشىلىق شا­رۋاشىلىعىنىڭ 28-ىندە رۇقسات ەتىلەدى. 10 اڭشىلىق شارۋاشىلىعىندا كۆوتا بولىنبەگەندىكتەن جانە رەزەرۆتىك قور­دا تۇرعانى سەبەپتى, اڭ اۋلاۋعا تىيىم سالىنعان. سونداي-اق «قىزىلتاۋ» زوو­لوگيالىق قورىعى, باياناۋىل ۇلتتىق تا­بيعي پاركى, «ەرتىس ورمانى» رەزەرۆاتىندا, «ەرتىس وزەنىنىڭ جايىلماسى» قورىعىندا اڭشىلىق جۇرگىزۋگە قاتاڭ تىيىم سالىنعان», دەيدى پاۆلودار وبلىس­تىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى رۋسلان تولەپباەۆ.

ماماندار ەسكەرتكەندەي, اڭشىلىققا شىققان ادامدا اڭشى كۋالىگى, اڭشىلىق شارۋاشىلىعى سۋبەكتىسىنىڭ جولداماسى نەمەسە جانۋارلار دۇنيەسىن پايدالانۋعا رۇقساتتاما, قارۋ ساقتاۋعا جانە الىپ جۇرۋگە رۇقساتتاما, جىرت­قىش قۇستارمەن نەمەسە يتتەرمەن اڭ اۋلاۋ كەزىندە ولار­عا ءتيىستى تولقۇجاتتار بولۋى كەرەك. ماۋسىمدىق جولدامانىڭ ورتاشا قۇنى 14 مىڭ تەڭگەدەن باستالادى.

جانۋارلاردى زاڭسىز اۋلاعانى نەمەسە اڭشىلىق ەرەجەسىنىڭ تالاپ­تارىن بۇزعانى ءۇشىن اكىمشىلىك جانە قىل­مىستىق جاۋاپكەرشىلىك قاراستىرىلعان. قۇستار مەن قىلشىقتى جانۋارلاردىڭ ءبىر داناسى ءۇشىن كەلتىرىلگەن زالالعا 5 ايلىق ەسەپتىك كورسەتكىش, تۇياقتى جا­نۋارلارعا 7,5-تەن 750 ايلىق ەسەپ­تىك كورسەتكىشكە دەيىن ايىپپۇل كوزدەلگەن.

ال ارنايى قورعالعان اۋماقتاردا اڭشىلىق جاساعانداردىڭ ءىسى قىلمىستىق ارەكەتكە تەڭەستىرىلىپ, باس بوستاندىعىنان ايرىلادى. جۋىقتا پاۆلودارلىق قوس اڭشى ەرتىس وزەنىنىڭ جايىلماسىندا, جابايى اڭداردى اۋلاۋعا تىيىم سا­لىنعان جەردە ەلىكتى جايراتىپ تاس­تاعان. ەتىن الىپ كەتكەلى تۇرعان جەردەن ءتارتىپ ساقشىلارى قولعا ءتۇسىردى. وبلىستىق قىلمىستىق ىستەر جونىندەگى مامان­داندىرىلعان اۋدانارالىق سوتى قىل­مىستىق كودەكستىڭ 337-بابى 4-بولىگىنىڭ 1-تارماعى بويىنشا «ەرەكشە قورعالاتىن تابيعي اۋماقتا الدىن الا ءسوز بايلاسۋ ارقىلى ءبىر توپ ادامدار اتىس قارۋىن قولدانا وتىرىپ, زاڭسىز اڭشىلىق جاسادى» دەپ ايىپتالعان ەكى ازاماتقا قاتىستى قىلمىستىق ءىستى قاراي كەلىپ, ءبىرىن ءۇش, ەكىنشىسىن ءتورت جىلعا سوتتاپ جىبەردى. سوتتالۋشىلار قىلمىستىق ارەكەتتەرى ارقىلى مەملەكەتكە 2,7 ملن تەڭگەدەن استام زالال كەلتىرگەن.

پاۆلودار وبلىسى