فوتو: اشىق دەرەككوزدەن
پرەزيدەنتتىڭ ۇلت ساۋلىعىنا بايلانىستى سوزدەرى ويعا قونىمدى بولدى دەپ ەسەپتەيمىن. ايتالىق, مەملەكەت باسشىسى بىلىكتى مەديتسينا ماماندارىنىڭ تاپشىلىعى ءالى دە وزەكتىلىگى جويىلماعان ماسەلەلەردىڭ قاتارىندا ەكەنىنە ەرەكشە نازار اۋداردى. مەملەكەتتەن تاعايىندالاتىن گرانت مەديتسينانى جۇرەك قالاۋىمەن تاڭداپ, ءبىلىمى وزات, العىر جاستارعا بەرىلۋى قاجەت.
بۇل باعىتتاعى جۇمىستى استانا مەديتسينا ۋنيۆەرسيتەتى مىقتاپ قولعا العانىن ايتا كەتەيىن. ماسەلەن, بيىل جاڭا وقۋ جىلىندا دەنساۋلىق ساقتاۋ ءمينيسترى اقمارال ءالنازاروۆانىڭ تىكەلەي قولداۋىمەن ءبىلىم شاڭىراعى 4 ستۋدەنتتەر ءۇيىن پايدالانۋعا بەردى. مۇنىڭ ءبارى – شاكىرتتەرىمىزگە ساپالى ءبىلىم بەرىپ, جايلى ورتا قالىپتاستىرۋ باعىتىندا اتقارىلعان جۇمىس. تۇتاستاي العاندا, بيىل استانا مەديتسينا ۋنيۆەرسيتەتىندە ءتيىستى جوندەۋ جۇمىستارىمەن 30 مىڭنان اسا شارشى مەتر اۋماق قامتىلدى. مۇنداي اۋقىمدى جاڭعىرتۋ بۇرىن-سوڭدى بولماعانىن اتاپ وتكەن ءجون. ايتالىق, سارىارقا كوشەسىندەگى وقۋ كورپۋسى كۇردەلى جوندەۋدەن وتكىزىلىپ, جاڭارعان اكت زالى, زاماناۋي كىتاپحانا جانە «سoworking» ورتالىعى جاستاردىڭ يگىلىگىنە بەرىلدى. بۇعان قوسا ستۋدەنتتەر جاتاقحاناسىنىڭ 2 بلوگىنىڭ جوندەۋ جۇمىستارى اياقتالۋعا جاقىن. وقۋ جىلىنىڭ بارىسىندا 1 بلوكتە جۇرگىزىلىپ جاتقان جاڭعىرتۋ جۇمىستارى سوڭىنا جەتەدى دەپ كوزدەلگەن.
زامان اعىمىنا ساي سۇرانىسقا يە وقۋ باعدارلامالارى ءساتتى ىسكە قوسىلدى. ناقتى ايتساق, ۋنيۆەرسيتەتتە باكالاۆريات, ينتەرناتۋرا, رەزيدەنتۋرا, ماگيستراتۋرا جانە دوكتورانتۋرا بويىنشا جالپى سانى 10 مىڭنان اسا ادام, ونىڭ ىشىندە الەمنىڭ 20 ەلىنەن مىڭنان ارتىق شەتەلدىك ستۋدەنت ءبىلىم الىپ, 65 جوعارى جانە جوعارى وقۋ ورنىنان كەيىنگى ءبىلىم بەرۋ باعدارلاماسى تابىستى ىسكە اسىپ جاتىر.
كەيىنگى 2 جىلدا نەوناتولوگيا, پەدياتريا, حيرۋرگيا, اكۋشەرلىك جانە گينەكولوگيا, تەراپيا, رەانيماتسيا, ۋلترادىبىستى دياگنوستيكا جانە كىشى ماماندىقتار بەيىندەرى بويىنشا اۋماعىن 2 مىڭ شارشى مەترگە دەيىن كەڭەيتە وتىرىپ, 400-دەن اسا جابدىق ورناتۋ ارقىلى سيمۋلياتسيالىق ورتالىقتى تولىق جاڭعىرتىپ, حالىقارالىق ينستيتۋتسيونالدى اككرەديتتەۋ جۇرگىزىلدى.
ۋنيۆەرسيتەت دەنساۋلىق ساقتاۋ كادرلارىن دايارلاۋدىڭ بارلىق دەڭگەيىندە ءبىلىم باعدارلامالارىنىڭ سانىن ۇلعايتۋ, ونىڭ ىشىندە وتاندىق جانە شەتەلدىك جوعارى وقۋ ورىندارىمەن بىرلەسكەن ەكى ديپلومدىق باعدارلامالاردى ىسكە قوسۋ ارقىلى وقۋ ۇدەرىسىن جەتىلدىرۋدى جالعاستىرادى. عىلىمي ينفراقۇرىلىمدى دامىتۋ ءۇشىن جاڭا عزي اشۋ, سونداي-اق ۇجىمدىق زەرتحانانى قۇرۋ جانە ءۆيۆاريدى جاڭعىرتۋ, كوممەرتسيالاندىرۋ كەڭسەسىن قۇرۋ, بيىل اشىلعان ەنداۋمەنت-قوردى ءتيىمدى دامىتۋ, سونداي-اق بارلىق بيزنەس-ۇدەرىستى تولىق رەينجينيرينگ پەن تسيفرلاندىرۋدى اياقتاۋ كوزدەلگەن.
بۇگىندە ستاتسيونارلى جانە امبۋلاتورلىق-ەمحانالىق كومەك كورسەتۋ ءۇشىن 20-دان اسا مامانداندىرىلعان بولىمشەنى قاراستىراتىن, جالپى اۋدانى 200 مىڭ شارشى مەترگە جۋىق, 800 ورىنعا شاقتالعان ۋنيۆەرسيتەتتىك كلينيكانى سالۋ پىسىقتالىپ جاتىر.
ءبىزدىڭ كوزدەگەنىمىز – ەمدەلۋشىگە, ياعني ادامعا باعدارلانعان مەديتسينالىق قىزمەتتى جولعا قويۋ جانە سول قىزمەتتى دامىتاتىن مىقتى دارىگەردى دايارلاپ شىعارۋ.
كامالجان نادىروۆ,
استانا مەديتسينا ۋنيۆەرسيتەتىنىڭ باسقارما توراعاسى-رەكتور
