ەرتىس – بايان ءوڭىرىنىڭ سپورتشىلارى دۇنيەجۇزىلىك كوشپەلىلەر ويىنىنا بىلەك سىبانىپ دايىن وتىر. سپورتشىلار اسىق اتۋ, وردو (اسىق اتۋعا ۇقساس ويىن), قۇراش (قىرعىز كۇرەسى), ابا (تۇرىك كۇرەس ءتۇرى) جانە وۆاري بويىنشا سىنعا تۇسەدى. اتاپ ايتقاندا, سەرىك اقتاەۆ پەن ەرنۇر مەرەشەۆ وۆاريدەن, جومارت نۇرلانوۆ پەن كەرىم جازدىقباي اسىق اتۋدان, سايات قيزات وردودان, ابا بويىنشا مۇحتار دالەلحان ۇلى, قۇراشتان التىناي نۇرحانوۆا جارىس جولىنا قوسىلادى.
توعىزقۇمالاقتان 3 دۇركىن الەم چەمپيونى, قازاقستاننىڭ ەڭبەك سىڭىرگەن سپورت شەبەرى سەرىك اقتاەۆ وتاندىق ويىنشىلاردىڭ وۆاريدەن ولجا سالاتىن مۇمكىندىگى زور دەپ ەسەپتەيدى.
– ءوۆاريدى 2008 جىلدان بەرى ويناپ كەلەمىن. وۆاري توعىزقۇمالاق تەكتەس ويىندارعا جاتادى. ويىن تاقتاسىندا 12 وتاۋ, 2 قازان, 48 تاس بولادى. نەگىزگى ماقساتى – 25 تاس جيناپ, قارسىلاستى ۇتۋ. 24 تاستان شىقسا, تەڭ ويىن بولادى. قارسىلاستا ءجۇرىس تاۋسىلعان كەزدە ونى جۇرۋگە ماجبۇرلەۋ تاكتيكالارى دا قاراستىرىلعان. بۇل ويىن افريكا ەلدەرىنەن شىققان. بيىلعى جارىسقا الەمنىڭ ۇزدىك وۆاري ويىنشىلارى قاتىسادى, – دەيدى سپورتشى.
س.اقتاەۆ كەيىنگى 16 جىلدا وۆاريدەن الەمدىك دەڭگەيدە وتكەن 24 حالىقارالىق جارىسقا قاتىسىپ, سونىڭ تەڭ جارتىسىندا جەڭىمپاز اتانعان. ال وزگەسىندە ۇزدىك ۇشتىكتەن تومەندەپ كورمەپتى. قازىرگى ماقساتى – 8-13 قىركۇيەك كۇندەرى استانا قالاسىندا وتەتىن دۇنيەجۇزىلىك كوشپەلىلەر ويىندارىندا ۇلتتىق قۇراما كومانداسى قاتارىندا بارىنشا ءتاۋىر ويىن ورنەگىن كورسەتۋ.
ال قايىرباەۆ اتىنداعى ۇلتتىق كلۋبتىڭ ديرەكتورى دارحان جولامانوۆ ءوڭىرىمىزدىڭ سپورتشىلارى بابىندا ەكەنىن ايتادى.
پاۆلودار وبلىسى
