ماڭعىستاۋ وبلىسىنىڭ اكىمى نۇرداۋلەت قيلىباي «وتپان» جوباسىنا ەنگەن شالعاي اۋىلداردا ورنالاسقان مەكتەپتەردىڭ جاعدايىمەن تانىستى. ءوڭىر باسشىسى الدىمەن تۇپقاراعان اۋدانىنداعى شاحتا مەكتەبىنە باردى. جوباعا 700-گە جۋىق وقۋشى مەن 80-نەن استام مۇعالىم قاتىسىپ جاتىر, شامامەن 17-19 وقۋ سىنىبى مەن زەرتحاناسىن جاڭعىرتۋ جوسپارلانعان. سونىمەن قاتار نۇرداۋلەت قيلىباي ماڭعىستاۋ اۋدانى وندى اۋىلىنداعى ءابىش كەكىلباەۆ اتىنداعى مەكتەپتىڭ جاڭا وقۋ جىلىنا دايىندىعىمەن تانىستى. مۇندا «وتپان» جوباسىنا 270-كە جۋىق وقۋشى مەن 40-تان استام مۇعالىم قاتىسىپ, شامامەن 16 وقۋ سىنىبى مەن زەرتحاناسىن جاڭعىرتۋ جوسپارلانعان. ايتا كەتۋ كەرەك, جاڭا وقۋ جىلى قارساڭىندا باستاۋ العان بىرەگەي جوباعا بەينەۋ, مۇنايلى, ماڭعىستاۋ, تۇپقاراعان, قاراقيا اۋداندارى, جاڭاوزەن مەن اقتاۋ قالاسىنان بارلىعى 50 مەكتەپ قاتىسادى. اتالعان مەكتەپتەردە ماتەريالدىق بازانى جاڭارتۋ, مۇعالىمدەردىڭ بىلىكتىلىگىن ارتتىرۋ, سونداي-اق اۋداندار مەن وبلىستىڭ ادىستەمەلىك ورتالىقتارىن دامىتۋ باعدارلاماسى ىسكە قوسىلدى.
جوبا شەڭبەرىندە وسى 50 مەكتەپتە ءبىلىم الاتىن 60 مىڭنان استام وقۋشىلاردى قامتۋ, 7 مىڭعا جۋىق مۇعالىم, مەكتەپ اكىمشىلىگى, پسيحولوگتەر, ادىسكەرلەر, ءبىلىم ءبولىمىنىڭ ماماندارىن وقىتۋ قاراستىرىلعان.
باستاپقى كەزەڭدە مەكتەپ عيماراتتارىنىڭ جاي-كۇيىنە تالداۋ جۇرگىزىلىپ, ناتيجەسىندە, سىنىپتاردىڭ ماتەريالدىق جانە تەحنيكالىق بازاسىن جاڭارتۋ بويىنشا جۇمىستار ۇيىمداستىرىلدى. ەكىنشى كەزەكتە مۇعالىمدەردىڭ كاسىبي قاجەتتىلىكتەرى انىقتالدى, سوعان وراي ۇستازداردىڭ بىلىكتىلىگىن ارتتىرۋ نازاربەۆ زياتكەرلىك مەكتەپتەرى مەن ءبىلىم-يننوۆاتسيا ليتسەيلەرى ۇستازدارى باستاعان ءبىر توپ ترەنەر مەن ساراپشى دايارلاعان ارنايى وقۋ باعدارلاماسى ارقىلى جۇزەگە اسادى. كەلەسى باعىتى – مەكتەپتەردە قۇرىلعان پەداگوگتەر مەن وقۋشىلاردى ءارى قاراي قولداۋ جۇمىستارى. جوبانى وبلىستىق ءبىلىم باسقارماسى مەن ءبىلىم سالاسىن تۇراقتى دامىتۋ قورى جۇزەگە اسىرىپ وتىر.
– وبلىستاعى ۇستازداردىڭ بىلىكتىلىگىن ارتتىرۋ بويىنشا جۇمىس ماۋسىم ايىندا باستالدى. سەمينارلار مەن ترەنينگتەر 13 پاننەن, پەداگوگيكا مەن پسيحولوگيا, باستاۋىش سىنىپ سەكىلدى باعىتتار بويىنشا جۇرگىزىلىپ جاتىر. «وتپان» جوباسى اياسىندا شىعىنداردىڭ باسىم بولىگى كاسىپكەرلەردىڭ دەمەۋشىلىك كومەگى ارقىلى وتەلەتىنىن اتاپ ايتۋ كەرەك. ءاربىر قاتىسۋشى مەكتەپتىڭ ماتەريالدى-تەحنيكالىق بازاسىن جاڭارتۋىنا جانە مۇعالىمدەردىڭ كاسىبي بىلىكتىلىگىن ارتتىرۋعا دەمەۋشىلەر تاراپىنان 170 ملن تەنگە شاماسىندا قاراجات بەرىلەدى. وعان قوسا مەكتەپتەگى جوندەۋ جۇمىسىنا وبلىستىق اكىمدىك تاراپىنان 1,5 ملرد تەڭگە ءبولىنىپ وتىر, – دەدى ماڭعىستاۋ وبلىسى ءبىلىم باسقارماسىنىڭ باسشىسى دينارا جۇماشەۆا.
جوبانى ىسكە اسىرۋ مەرزىمى ەكى جىل, قوسىمشا تاعى ءبىر جىل اياسىندا پەداگوگتەردى قولداۋ جۇمىسى كوزدەلگەن.
ماڭعىستاۋ وبلىسى
