فوتو: www.gov.kz
مەملەكەت باسشىسىنىڭ ايتۋىنشا, ەلىمىز ەۋرازيا قۇرلىعىنىڭ ءدال ورتاسىندا ورنالاسۋى بىزگە الەمدىك باسەكەدە زور مۇمكىندىك بەرەتىن ارتىقشىلىق. سوندىقتان كولىك ينفراقۇرىلىمىنا سالىنىپ جاتقان ءاربىر ينۆەستيتسيا ءوزىن-ءوزى اقتايتىنى ءسوزسىز.
ء«بىز كەيىنگى ۇرپاققا جوعارى ساپالى اۆتو جانە تەمىرجولداردى قالدىرۋىمىز كەرەك. سونداي-اق ءتيىمدى جۇمىس ىستەيتىن اۋە حابتارىن, تەمىرجول بەكەتتەرى مەن تەڭىز پورتتارىن سالۋىمىز قاجەت. بۇل رەتتە بىرقاتار كەشەندى ماسەلەنى شەشكەن ءجون», دەدى ەل پرەزيدەنتى.
سونداي-اق ق.توقەۆ تەمىرجول سالاسىندا رەفورما جاساۋ ءۇشىن تاريف جۇيەسى قايتا قارالۋى كەرەك ەكەنىن اتاپ ءوتتى. ونىڭ ايتۋىنشا, جاڭا تاريفتەر تەمىرجول جەلىسىن قالىپتى جاعدايدا ساقتاۋعا جانە ونىڭ تاسىمال قابىلەتىن ارتتىرۋعا مۇمكىندىك بەرەدى.
«قازاقستان تەمىر جولى» كومپانياسى ءۇش ءىرى ينفراقۇرىلىمدىق جوبانى قولعا الدى, ياعني تەمىرجول سالىپ جاتىر. ونىڭ جالپى ۇزىندىعى مىڭ شاقىرىمنان اسادى. بۇل جوبالار بەكىتىلگەن مەرزىمدە جانە وتە ساپالى ىسكە اسىرىلۋعا ءتيىس», دەدى ول.
سونىمەن قاتار اۆتوكولىك جولدارىنىڭ جاي-كۇيى – وزەكتى ماسەلەلەردىڭ ءبىرى. بيىل ەلىمىزدە 12 مىڭ شاقىرىمعا جۋىق جول سالىنىپ, جوندەلىپ جاتىر. قازاقستاندا مۇنداي اۋقىمدى جۇمىس بۇرىن-سوڭدى بولماعان. استانا-الماتى, اقتوبە-اتىراۋ-استراحان, تالدىقورعان-وسكەمەن باعىتىنداعى كۇرە جولداردى قايتا جاڭعىرتۋ جۇمىستارى اياقتالىپ قالدى.
«2,5 مىڭ شاقىرىمعا سوزىلاتىن وبلىسارالىق جانە اۋدانارالىق جولداردى ورتا دەڭگەيدە جوندەۋگە ارنالعان باعدارلامانىڭ ءمان-ماڭىزى زور. ءدال وسى جولدارمەن جۇرت وتە ءجيى جۇرەدى. سوندىقتان باعدارلامانىڭ اۋقىمىن كەڭەيتىپ, وعان كەمىندە 10 مىڭ شاقىرىم جولدى قامتۋدى تاپسىرامىن. ارينە, مۇندا ساننان گورى ساپا ماڭىزدىراق. سول ءۇشىن يننوۆاتسيالىق زاماناۋي ءادىس-تاسىلدەردى كەڭىنەن قولدانعان ابزال. بۇل جۇمىسقا قوعامدىق باقىلاۋدى كۇشەيتۋ ءۇشىن بىرىڭعاي تسيفرلىق پلاتفورمانى ىسكە قوسقان ءجون. وندا بارلىق جولدى, سونىڭ ىشىندە, قالا اۋماعىنداعى جولداردى سالۋعا جانە جوندەۋگە قاتىستى اقپارات بولۋى كەرەك», دەدى ەل پرەزيدەنتى.
