ماۋلەن اشىمباەۆ پاراليمپياداشىلارمەن كەزدەسۋدە جەڭىس جولىندا تاباندىلىق تانىتىپ, ءدۇبىرلى دوداعا جولداما جەڭىپ الۋدىڭ ءوزى ۇلكەن جەتىستىك ەكەنىن ايتىپ, اتلەتتەرگە العىس ءبىلدىردى. قازاقستان بوچچا فەدەراتسياسىنىڭ پرەزيدەنتى پاراسپورتشىلاردىڭ ەرىك-جىگەرى مەن قاجىر-قايراتى جاس بۋىن ءۇشىن قاشاندا ۇلگى بولاتىنىن اتاپ ءوتتى. سونداي-اق ول قازاقستاندا ەرەكشە قاجەتتىلىگى بار ازاماتتاردى قولداۋعا باسا ءمان بەرىلىپ وتىرعانىنا نازار اۋداردى. مەملەكەت باسشىسى قاسىم-جومارت توقاەۆتىڭ تاپسىرماسىمەن بۇل باعىتتا جۇيەلى جۇمىس جۇرگىزىلىپ كەلەدى. سونىڭ اياسىندا استانادا پاراليمپيادالىق جاتتىعۋ ورتالىعى سالىندى. ەلىمىزدىڭ بارلىق وڭىرىندە ارنايى سپورت كلۋبتارى مەن مەكتەپتەر جۇمىس ىستەيدى. وسىنداي يگى ءىستىڭ ناتيجەسىندە قازىرگى تاڭدا ۇلتتىق پاراليمپيادالىق قۇراماعا مۇشە سپورتشىلار قاتارى مىڭعا جۋىقتادى. پاراليمپيادا جولدامالارىنىڭ سانى دا تۇراقتى تۇردە ارتىپ كەلەدى. ال ەلدە پاراسپورتپەن اينالىساتىن ازاماتتاردىڭ جالپى سانى 60 مىڭعا جەتتى.
«پرەزيدەنت قاسىم-جومارت توقاەۆ سىزدەرگە جىلى لەبىزى مەن سالەمىن جولدادى. قازىرگى تاڭدا مەملەكەت باسشىسى جۇرگىزىپ وتىرعان ساياسات اياسىندا پاراسپورتشىلاردى قولداۋ باعىتىندا اۋقىمدى جۇمىس اتقارىلىپ كەلەدى. پاراليمپيادا ويىندارى – جاي جارىس قانا ەمەس. بۇل جەردە قايسار رۋح, قاجىماس قايرات جانە مۇقالماس جىگەر سالتانات قۇرادى. سىزدەر تاباندىلىق پەن توزىمدىلىك تانىتۋ ارقىلى توسقاۋىلدار سانامىزدا عانا بولاتىنىن, وزىنە سەنىمدى, كوزدەگەن ماقساتقا جەتۋ جولىندا ايانباي تەر توگەتىندەر ءۇشىن ەشقانداي كەدەرگى جوق ەكەنىن دالەلدەدىڭىزدەر. ءتۇرلى سىناقتى ەڭسەرىپ, ۇلكەن ناتيجەلەرگە قول جەتكىزگەن سىزدەردىڭ ارقايسىڭىز – ءبىز ءۇشىن ناعىز چەمپيونسىزدار. ۇلتتىق قۇرامامىز پاريج پاراليمپياداسىنا 33 جولداما جەڭىپ الدى. بۇل – بۇكىل جاتتىقتىرۋشىلار شتابىنىڭ دا ەسەلى ەڭبەگىنىڭ جەمىسى. العاش رەت پاراكانوە مەن پارا ۇستەل تەننيسىنەن جولداماعا يە بولدىق. مۇنىڭ ءوزى جاتتىقتىرۋشىلاردىڭ تاباندىلىعى مەن كاسىبي بىلىكتىلىگىنىڭ ايقىن دالەلى ەكەنى ءسوزسىز. قازىر وتباسىلارىڭ جانە دوستارىڭمەن بىرگە سىزدەرگە بارشا قازاقستاندىق تىلەكشى بولىپ وتىر. بۇكىل قازاق ەلى سىزدەرگە جانكۇيەر. سوندىقتان نامىستى قولدان بەرمەي, جەڭىسكە جەتەسىزدەر دەپ سەنەمىز. بارشاڭىزعا ساتتىلىك تىلەيمىز. پاريج تورىندە كوك بايراعىمىز بيىكتە جەلبىرەسىن!», دەدى ماۋلەن اشىمباەۆ.
حالىقارالىق بوچچا سپورت فەدەراتسياسىنىڭ پرەزيدەنتى دجون مورگانمەن كەزدەسۋدە ماۋلەن اشىمباەۆ حالىقارالىق جانە قازاقستاندىق بوچچا فەدەراتسيالارىنىڭ ىنتىماقتاستىعىن نىعايتۋ بولاشاعىنا توقتالدى. سونداي-اق سۇحبات كەزىندە كەلەسى جىلى استانادا وتەتىن بوچچادان حالىقارالىق جارىستاردىڭ ماڭىزى ءسوز بولدى. بۇل دودالار ىرىكتەۋ سايىسى ەكەنىن اتاپ وتكەن ءجون. سوندىقتان وعان قاتىسقان سپورتشىلاردىڭ ناتيجەلەرى الەمدىك رەيتينگتە كورسەتىلەدى.
ء«بىزدىڭ حالىقارالىق بوچچا سپورت فەدەراتسياسىمەن ىنتىماقتاستىعىمىز قازاقستاندا اتالعان پاراليمپيادالىق سپورتتى دامىتۋ جولىندا ايرىقشا ماڭىزعا يە. وسى رەتتە استانادا World Boccia Challenger 2025 چەمپيوناتىن وتكىزۋگە قولداۋ كورسەتكەنى ءۇشىن حالىقارالىق بوچچا سپورت فەدەراتسياسىنا العىسىمىزدى بىلدىرەمىز. مۇنداي جارىس ءبىزدىڭ ەلدە عانا ەمەس, سونداي-اق ورتالىق ازيادا بوچچانى دامىتۋعا جانە ينكليۋزيا قۇندىلىقتارىن دارىپتەۋگە ىقپال ەتەتىنى انىق», دەدى ماۋلەن اشىمباەۆ.
سونىمەن قاتار سەنات توراعاسى بوچچامەن شۇعىلداناتىن وتاندىق سپورتشىلاردىڭ جەتىستىكتەرىن تىلگە تيەك ەتىپ, فەدەراتسيانىڭ الداعى جىلعا ارنالعان جوسپارىنا توقتالدى. اتاپ ايتقاندا, قازاقستان بوچچا فەدەراتسياسىنىڭ 2021 جىلى قۇرىلعانى, قازىرگى تاڭدا 10 وڭىرلىك فيليال جۇمىس ىستەيتىنى ءسوز بولدى. بۇگىندە بوچچادان ۇلتتىق قۇرامادا 41 سپورتشى بار. ولار – حالىقارالىق جارىستاردا ءساتتى ونەر كورسەتىپ جۇرگەن اتلەتتەر.
دجون مورگان قازاقستان فەدەراتسياسى اتقارىپ وتىرعان اۋقىمدى جۇمىستىڭ تيىمدىلىگىنە نازار اۋدارىپ, ىنتىماقتاستىقتى ودان ءارى نىعايتۋعا دايىن ەكەنىن جەتكىزدى.
سونداي-اق وسى كۇنى ماۋلەن اشىمباەۆ ازيا پاراليمپيادا كوميتەتىنىڭ پرەزيدەنتى مادجيد راشيدپەن كەزدەستى. تاراپتار بىرلەسكەن جوبالاردى ىسكە اسىرۋ ماسەلەلەرىن تالقىلاپ, ورتالىق ازيا وڭىرىندە پاراليمپيادالىق قوزعالىستى دامىتۋعا قاتىستى پىكىر الماستى.
پاريج پاراليمپياداسىندا قازاقستان ۇلتتىق قۇراماسىنان العاش بولىپ پاراتاەكۆوندوشى ميلانا كراساۆتسەۆا جارىس جولىنا شىقتى. ول ك44 سايىسى بويىنشا 52 كيلو سالماق دارەجەسىندە سىنعا ءتۇسىپ, 1/8 فينالدا دومينيكاندىق سپورتشىنى جەڭدى. قازاقستاندىق دەلەگاتسيا وتانداسىمىزدىڭ جەكپە-جەگىنە ارنايى بارىپ, قولداۋ كورسەتتى.
بۇدان باسقا, ماۋلەن اشىمباەۆ دۇنيەجۇزىلىك تاەكۆوندو فەدەراتسياسىنىڭ پرەزيدەنتى چۋنگ ۆون چومەن كەزدەستى.
