اتالعان جارىستا ەلىمىزدىڭ گرەك-ريم كۇرەسى شەبەرلەرى قوس كۇمىس مەدالدى جەڭىپ العانى جايىندا ءبىز بۇعان دەيىن دە جازدىق. ول جۇلدەلەردى الپامىس بولات ۇلى (55 كگ) مەن ەركەبۇلان ءاناپيا (80 كگ) ولجالادى.
جاسوسپىرىمدەر كومانداسىنىڭ اعا جاتتىقتىرۋشىسى المات كەبىسباەۆ بۇل بىرىنشىلىكتى بىلاي دەپ قورىتىندىلادى: «جارىس جولىنا شىققان 10 بالۋانننىڭ تەڭ جارتىسى جارتىلاي فينالعا دەيىن جەتسە, ەكەۋى كۇمىس مەدالدى موينىندا جارقىراتتى. سول سەبەپتى دە اممانداعى ونەرىمىز جاقسى دەگەن باعاعا لايىق دەپ ويلايمىن. ارينە, بۇدان دا ءتاۋىر ناتيجە كورسەتۋگە بولار ەدى. بىراق بۇيىرعانى – سول. مەنىڭ بالعىن بالۋاندارمەن جۇمىس ىستەپ جۇرگەنىمە ءۇش جىلدىڭ ءجۇزى بولدى. كومانداعا دارىگەرلەر مەن ماسساجيست سەكىلدى ماماندىق يەلەرى جەتىسپەيدى. جالپى, جاس ورەندەر ەرەسەكتەردەن كەم ەڭبەكتەنبەيدى. ولار دا كۇن سايىن ەكى رەت جاتتىعىپ, كوپ تەر توگەدى. ودان كەيىن اعزانى قايتا قالپىنا كەلتىرۋ جۇمىستارى ءتيىستى دەڭگەيىندە جۇرگىزىلمەيدى. باستى پروبلەما – وسى. سوعان قاراماستان شاكىرتتەرىم الەمدىك دودادا جەڭىس تۇعىرىنا كوتەرىلۋ ءۇشىن بارىن سالىپ, كوپشىلىك كوڭىلىنەن شىعاتىنداي ونەر كورسەتتى».
قىزدار كۇرەسىنەن وتكەن جارىستا ءۇش قولا مەدالدى ەنشىلەدىك. شەشۋشى سىندا اننا ستراتان (57 كگ) گرەكيالىق مەني ءمانيدى, ۇلدانا تىلەۋحان (65 كگ) بەيتاراپ سپورتشى رەتىندە قاتىسقان رەسەيلىك اناستاسيا كومانوۆانى جانە مەدينا قۋانىشبەك (46 كگ) ۋكراينالىق ەۆگەنيا درۋزەنكونى قاپى قالدىردى.
كەيىنگى كۇندەرى داۋلەت نيازبەكوۆ جەتەكشىلىك ەتەتىن ەركىن كۇرەس شەبەرلەرى سايىسقا ءتۇستى. پارسى شىعاناعىنا ساپار شەككەن ورەندەرىمىزدىڭ اراسىنان ەدىگە قاسىمبەك ەڭ جاقسى ناتيجە كورسەتتى. 110 كگ سالماقتا كۇش سىناسقان بالۋان باستاپقى باسەكەلەردە ۇندىستاندىق سينگح دجاسپوران مەن جاپونيالىق يۋكي ياموموتانى جەڭسە, جارتىلاي فينالدا يراندىق ابدولفازل مۇحامماد نەجادتتان ايلاسىن اسىردى. فينالدا ەدىگە امەريكالىق مايكل دجوزەف موككومەن ايقاستى. بۇل تارتىستا اقش-تان كەلگەن ءاپايتوستىڭ اسىعى الشىسىنان ءتۇستى. وسىلايشا, ءبىزدىڭ جىگىت قاتارىنان ەكىنشى الەم بىرىنشىلىگىندە كۇمىس مەدالدى يەلەندى.
65 كگ سالماق دارەجەسىندەگى باقداۋلەت اكىمجان جارتىلاي فينالدا قىرعىزستاندىق رۋستامجان قاحاروۆكە جارىتىپ قارسىلىق كورسەتە المادى. ەسەسىنە ىلە-شالا گرۋزيالىق راتي رەۆازاشۆيليدىڭ تاس-تالقانىن شىعارعان ول قولا مەدالدى ەنشىلەدى. وكىنىشكە قاراي, وزگە ورەندەرىمىز بۇل جارىستا سەنىم ۇدەسىنەن شىعا المادى.
