بۇل كەزدە ۇيدە قوجايىننان باسقا 12 جاستاعى جيەنى دە بولعان ەكەن. سوعان قاراعاندا قاراقشىلار ۇيدە قارسىلىق كورسەتەتىن ەشكىمنىڭ بولمايتىنىن الدىن الا بىلگەن سىڭايلى. قىلمىسكەرلەر ەكەۋىن كۇش كورسەتىپ, قورقىتىپ-ۇركىتىپ, ۇرىپ-سوققان. كەيىن بايلاپ تاستاپ, اۋزى-باستارىن سكوتچپەن جاپسىرىپ, ءۇيدىڭ استان-كەستەنىن شىعارىپ, اقشا مەن باعالى زاتتاردى ىزدەيدى. ولاردىڭ قولىنا التىن-كۇمىستەن جاسالعان بىرنەشە اسىل بۇيىم, اقشا تۇسەدى. قاراقشىلار قولدارىنا تۇسكەن ەكى جاڭا ۇيالى تەلەفوندى دا قالتالارىنا سالىپ الادى. الدىن الا ەسەپتەۋگە قاراعاندا ۇرلانعان دۇنيەلەر مەن اقشانى قوسقاندا كۇدىكتىلەر 640 مىڭ تەڭگەنىڭ زاتىن قولدى قىلىپ, تايىپ تۇرعان.
پوليتسيانىڭ مالىمەتىنە قاراعاندا, 41 جاستاعى ءۇي يەسى ەمەس 12 جاستاعى ونىڭ جيەنى قايسارلىق كورسەتكەن. ول قاراقشىلار كەتكەن بويدا تىسىمەن سكوتچتى قيىپ, قولى مەن اياعىن بوساتادى. ءسويتىپ, ناعاشىسىنىڭ دا قول-اياعىن بۇعاۋدان بوساتادى. جەتكىنشەك مۇنىمەن دە تىنباي ەسى شىعىپ كەتكەن ناعاشىسىن ۇيگە قالدىرىپ, ءوزى جاقىن جەردە تۇراتىن ۋچاسكەلىك ينسپەكتوردىڭ ۇيىنە بارىپ, بولعان جايتتى جەتكىزەدى. اۋداندىق پوليتسيا بولىمىنە دابىل تۇنگى 12-لەر شاماسىندا تۇسكەن. بۇل قىلمىس بولعاننان ءۇش ساعاتتاي ۋاقىت وتكەن كەز. قىلمىستىڭ ءىزىن سۋىتپاي كوتەرىلگەن پوليتسيا بارلىق كەلگەن-كەتكەن كولىكتەردى تىزىمگە الىپ, كۇدىكتى دەگەن, ەسەپتە جۇرگەن ادامداردىڭ ءبارىنىڭ قايدا بولعانىن انىقتاي باستاعان. قىلمىستى دالەلدەيتىن ايعاق زاتتاردىڭ ءتىزىمى دە جولداعى پوليتسيا پاترۋلدەرىنە بەرىلەدى. اقىرى پوليتسيا كۇدىكتىلەردى انىقتاپ, ولاردىڭ سوڭىنا تۇسكەن. وبلىستىق جانە تايىنشا اۋداندىق كريمينالدىق پوليتسيا باسقارماسىنىڭ جەدەل قىزمەتكەرلەرى قاراقشىلار مىنگەن كولىكتى استانا قالاسىنىڭ اۋماعىندا سول ءتۇنى توقتاتقان.
«جەدەل جۇرگىزىلگەن جەدەل تەكسەرىس ناتيجەسىندە قاراقشىلىققا كۇدىكتىلەر – سولتۇستىك قازاقستان مەن اقمولا وبلىستارىنىڭ 30 بەن 38 جاس ارالىعىنداعى تۇرعىندارى ۇستالدى. قازىر ولاردىڭ ۇشەۋى قاماۋدا وتىر. ال بىرەۋى ازىرگە بوستاندىقتا. ولاردان ايعاق زاتتار تاركىلەنىپ, بۇل وقيعاعا قاتىستى قىلمىستىق ءىس قوزعالدى», دەيدى وبلىستىق پد كريمينالدىق پوليتسيا باسقارماسىنىڭ باسشىسى, پولكوۆنيك يۆان تەرزيدي. قىلمىستارى دالەلدەنسە, قاراقشىلار قىلمىستىق كودەكستىڭ 192-بابىمەن 7-دەن 12 جىلعا دەيىن باس بوستاندىعىنان ايىرىلۋى مۇمكىن.
سولتۇستىك قازاقستان وبلىسى,
تايىنشا اۋدانى
