فوتو: prokuratura.govkz
تەرگەۋ بارىسىندا انىقتالعانداي, 2019-2022 جىلدار ارالىعىندا كۇدىكتى تاراز قالاسىنداعى بانك فيليالىنىڭ قىزمەتكەرى بولا وتىرىپ, بانك كليەنتتەرىنىڭ اتىنان ولارعا نەسيە راسىمدەگەن. ءارى قاراي بانك كليەنتتەرىنىڭ شوتتارىنا قول جەتكىزگەن كۇدىكتى نەسيە قاراجاتىن دوستارىنىڭ ەسەپشوتىنا اۋدارىپ, كەيىن ونى قولما-قول اقشاعا اينالدىرعانى بەلگىلى بولدى.
«قىلمىستىق ارەكەتتەر ناتيجەسىندە بانك كليەنتتەرىنە 60 ملن تەڭگە كولەمىندە زالال كەلتىرىلگەن. قىلمىس جاساعاننان كەيىن ول جاسىرىنىپ, حالىقارالىق ىزدەۋگە جاريالانعان. بيىلعى جىلدىڭ ءساۋىر ايىندا فيگۋرانت كراسنودار ولكەسىنىڭ اۋماعىندا ۇستالدى», دەلىنگەن حابارلامادا.
قازىرگى تاڭدا كۇدىكتى ۋاقىتشا ۇستاۋ يزولياتورىنا قامالعان. كۇدىكتىگە بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
ايتا كەتەيىك, وسى جىلى قىلمىستىق ارەكەتتەرى 350-دەن استام جابىرلەنۋشىگە جالپى سوماسى 7 ميلليارد تەڭگەگە جۋىق شىعىن كەلتىرگەن الاياقتىق جاساعانى ءۇشىن ىزدەۋدە جۇرگەن 11 ادام رەسەيدەن قازاقستانعا ەكستراديتسيالاندى.
