بقو پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەنىندەي, وقيعا 24 تامىز كۇنى تاڭعى ۋاقىتتا كازتالوۆ اۋدانى جالپاقتال اۋىلى تۇسىندا بولدى.
«انىقتالعانىنداي, „گاز-3102“ اۆتوكولىگىنىڭ جۇرگىزۋشىسى رۋلگە يە بولا الماي, جول شەتىندە تۇرعان „كاماز“ اۆتوكولىگىمەن تۇيىسكەن. سالدارىنان 4 ادام مەرت بولىپ, ءۇش ادام اۋرۋحاناعا جاتقىزىلسا, ونىڭ ەكەۋى — بالالار. جول وقيعاسى بويىنشا سوتقا دەيىنگى تەرگەۋ امالدارى جۇرگىزىلۋدە. جول اپاتى سالدارىنان „گاز-3102“ اۆتوولىگىندە جولاۋشى ەسەبىندە بولعان پوليتسيا قىزمەتكەرى مەن ونىڭ زايىبى كوز جۇمدى. بقو پوليتسيا دەپارتامەنتىنىڭ باسشىلىعى مەن جەكە قۇرامى مارقۇمداردىڭ وتباسىلارى مەن تۋما-تۋىسقاندارىنا كوڭىل ايتادى», دەپ حابارلادى ۆەدومستۆودان.
بقو دەنساۋلىق ساقتاۋ باسقارماسى ءباسپاسوز قىزمەتىنىڭ ناقتىلاۋىنشا, 1982 جىلعى ەكى ەر ادام جانە 1985 جىلعى ايەل وقيعا ورنىندا قايتىس بولعان. 1983 جىلعى ايەل اۋرۋحانادا كوز جۇمدى. قازىرگى ۋاقىتتا اۋرۋحانادا جاتقان 2016 جىلعى ۇل بالانىڭ جاعدايى وتە اۋىر. 2014 جىلعى ءجاسوسپىرىم مەن 1981 جىلعى ەر ادامنىڭ جاعدايى تۇراقتى دارەجەدە اۋىر. دارىگەرلەر تاراپىنان بارلىق قاجەتتى مەديتسينالىق كومەك كورسەتىلۋدە.
