Almaty.tv مالىمدەگەندەي, جاعا ۇستاتارلىق وقيعا ءبىر اپتا بۇرىن قالاداعى «ۋ پەتروۆى» جەكەمەنشىك بالاباقشاسىندا بولعان. ازىرگە جاعدايدىڭ قالاي بولعانىن تەك زارداپ شەككەن بالانىڭ اناسىنان بىلە الدىق. ونىڭ سوزىنشە, اۋەلى تاربيەشى ءبۇلدىرشىننىڭ قولىن جاراقاتتاپ, ارادا ءبىر كۇن وتكەندە دەنەسىن كۇيدىرگەن. قاتتى زاقىم العان ءبۇلدىرشىن ابدەن شوشىنىپ قالعان. قازىر ول مەكەمەنىڭ ماڭىنا جولاعاننان-اق جىلايدى. ونىڭ ۇستىنە, بالانىڭ كىشى دارەتكە بارا الماي قالعانى تاعى بار.
– باسقا بالالار زارداپ شەكپەسە ەكەن دەيمىن. ءبارى قىرۋار اقشا تولەپ بەرىپ وتىر. بالامدى كۇيدىرگەنىن ايتپاي, جەدەل جاردەم شاقىرماي, قورلادى. زاڭ الدىندا جاۋاپ بەرسىن! قولىن سىندىردى. ولار اقتالىپ جاتىر, ول قالاي كۇيەدى, ويلاڭىزشى؟ – دەدى اتا-انا اقجان نۇرعازيەۆا.
دارىگەرلەر ء«بۇلدىرشىنىڭ دەنەسىنىڭ 6 پايىزى كۇيگەن» دەيدى. سۇلتاننىڭ جاعدايى جاقسى, ۇيىنە جىبەرىلدى.
– 1 جاس 7 ايلىق بالانى اتا-اناسى ۇيدەن الىپ كەلدى. بوكسە جانە سانى 1-2 دارەجەلى كۇيىك شالعان. ناۋقاس ۇيىنە شىعارىلدى. جاعدايى تۇراقتى. ارى قاراي ەمىن جالعاستىرىپ, جاقپا ماي جاعۋى كەرەك, – دەدى وبلىستىق بالالار اۋرۋحاناسى ديرەكتورىنىڭ ەمدەۋ ءىسى بويىنشا ورىنباسارى ەرجان ەسبولاەۆ.
اتالعان دەرەك بويىنشا قازىر پوليتسيا دەپارتامەنتى دە تەرگەۋدى باستادى. قىلمىستىق ءىس «كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ» بابىمەن جۇرگىزىلىپ جاتىر.
– اتىراۋ قالاسىنىڭ تۇرعىنىنان بالاباقشاعا باراتىن بالاسىنان كۇيىككە ۇقساس دەنە جاراقاتى بار دەگەن ارىز كەلىپ تۇسكەن. ارىز بويىنشا كەشەندى تەرگەۋ امالدارى جۇرگىزىلىپ, تەكسەرۋ بارىسىندا وبلىستىق بالالار اۋرۋحاناسى دارىگەرلەرىنىڭ قورىتىندىسىمەن 2023 جىلى تۋعان بالانىڭ ەكىنشى دارەجەلى كۇيىك ەكەنى انىقتالدى. سوت-مەديتسينالىق ساراپتامالار تاعايىندالدى, – دەدى وبلىستىق پوليتسيا دەپارتامەنتىنىڭ ءباسپاسوز حاتشىسى مەيىرىم ەرداۋلەت.
مەكتەپكە دەيىنگى ۇيىم جۇمىسىن ءالى دە جالعاستىرىپ جاتىر. مەكەمە الەۋمەتتىك جەلىدەگى پاراقشالارىنا اتالعان جاعدايدىڭ جالعان ەكەنىن جازعان. ازىرگە ءىستىڭ قالاي بولعانى, بالانىڭ دەنەسىنە كىمنىڭ جاراقات سالعانى رەسمي دالەلدەنگەن جوق. ءىس باقىلاۋدا بولادى.
