ۇيىمداستىرۋشىلاردىڭ ايتۋىنشا, ءتۋرنيردىڭ باستى ماقساتى – كوشپەلىلەردىڭ كونەدەن كەلە جاتقان زياتكەرلىك ويىنىن دارىپتەۋ. سونداي-اق سايىس ەلىمىزدە ءماسليحاتتاردىڭ قۇرىلعانىنا 30 جىل تولۋىنا وراي جانە قىركۇيەك ايىندا ەلوردادا جالاۋى جەلبىرەيتىن V دۇنيەجۇزىلىك كوشپەلىلەر ويىندارىن قولداۋ ماقساتىمەن وتكىزىلگەنىن دە ايتا كەتكەن ابزال.
ءىس-شاراعا ارنايى بارىپ, فينالدىق ويىندارعا قاتىسۋشىلارعا ساتتىلىك تىلەگەن سەنات دەپۋتاتى گەننادي شيپوۆسكيح پالاتا توراعاسى ماۋلەن اشىمباەۆتىڭ قۇتتىقتاۋ حاتىن وقىپ بەردى.
«مەملەكەت باسشىسى ۇلتتىق قۇرىلتايدىڭ وتىرىسىندا ءتول قۇندىلىقتارىمىزدى دارىپتەۋ جانە تاريحي سانامىزدى جاڭعىرتۋ ماسەلەسىنە باسا ءمان بەردى. بۇل رەتتە تەرەڭنەن تامىر تارتاتىن توعىزقۇمالاق ويىنى ماڭىزدى ءرول اتقارادى. ءماسليحاتتاردىڭ 30 جىلدىعى اياسىندا پارلامەنت سەناتى مەن توعىزقۇمالاق فەدەراتسياسى بىرلەسىپ ۇيىمداستىرعان سايىس الداعى ۋاقىتتا يگى داستۇرگە اينالادى دەپ سەنەمىن. شەشۋشى كەزەڭنىڭ ساناۋلى كۇندەردەن كەيىن باستالاتىن V دۇنيەجۇزىلىك كوشپەلىلەر ويىندارىنىڭ قارساڭىندا وتكىزىلۋىنىڭ دە سيمۆوليكالىق ءمانى زور», دەلىنگەن جەدەلحاتتا.
بۇعان دەيىن ءبىر جارىم اي بويى ەلىمىزدىڭ 20 وڭىرىندە, ونىڭ ىشىندە شالعاي ەلدى مەكەندەردە دە ىرىكتەۋ تۋرنيرلەرى وتكىزىلگەن ەدى. وبلىستارداعى ويىنشىلاردىڭ دەڭگەيىن ارتتىرۋ ماقساتىمەن شەبەرلىك ساباقتارى دا ۇيىمداستىرىلدى.
تارتىستى وتكەن سايىستىڭ ناتيجەسىندە باتىس قازاقستان وبلىسىنان كەلگەن قاتىسۋشىلار (دۋمان شانوۆ, ءادىلحان ناۋرىزباي, اياجان بىرجانقىزى, ساياجان بىرجانقىزى) جەڭىمپاز اتاندى. ەكىنشى ورىن – قىزىلوردا قالاسىنىڭ كومانداسىنا (بەرىك التىنبەك ۇلى, جاندوس دوسجان, ديدار سارسەن, رايكۇل ەشمۇراتوۆا) بۇيىردى. ال ۇزدىك ۇشتىكتى پاۆلودار قالاسىنىڭ ويىنشىلارى (ارىستانبەك جانبەك, جانىبەك جۇماباەۆ, مەيىر نۇرجان, لاريسا رۋبلەۆا) تۇيىندەدى.
