پرەزيدەنت جولداۋىندا بەرىلگەن تاپسىرمانى ىسكە اسىرۋ اياسىندا مامانداردىڭ جالاقىسىن كەزەڭ-كەزەڭمەن 60 پايىزعا كوتەرۋ ءۇشىن قوسىمشا 1,2 ملرد تەڭگە قاراجات جۇمسالدى. بۇگىندە مامانداردىڭ ورتاشا جالاقىسى 120 مىڭ تەڭگەدەن 250–300 مىڭ تەڭگەگە دەيىن كوتەرىلدى.
مەديتسينا سالاسىندا جىلدام سالىناتىن قۇرىلىس ورىندارى بيۋدجەتكە دە ۇنەم ءارى ۇزاق ۋاقىتتى تالاپ ەتپەيدى. وسى رەتتە حالىقتى كوپ تولعاندىرعان تالدىقورعان قالاسىندا سالىناتىن ونكولوگيالىق ديسپانسەردىڭ جوباسى دايىن بولدى. قۇنى 10 ملرد تەڭگە شاماسىنداعى ۇلكەن الەۋمەتتىك جوبانى «Kazakhmys Holding» كومپانياسى ىسكە اسىرادى.
اتاپ وتسەك, مەملەكەت باسشىسى قاسىم-جومارت توقاەۆ جەتىسۋ وبلىسىنا جۇمىس ساپارى كەزىندە تالدىقورعان قالاسىنداعى ونكولوگيالىق ديسپانسەردىڭ ماتەريالدىق-تەحنيكالىق بازاسىن نىعايتۋ تۋرالى تاپسىرما بەرگەن ەدى. سوعان سايكەس وسى جىلدىڭ ماۋسىم ايىندا وبلىس اكىمدىگى, دەنساۋلىق ساقتاۋ مينيسترلىگى, «Kazakhmys Holding» ينۆەستور-كومپانياسى تالدىقورعاندا ونكولوگيالىق ورتالىق سالۋ تۋرالى ۇشجاقتى مەموراندۋمعا قول قويعان. اتالعان ۋاعدالاستىق نەگىزىندە ينۆەستور ءوز قارجىسىنا ورتالىق عيماراتىن تۇرعىزادى, دەنساۋلىق ساقتاۋ مينيسترلىگى زاماناۋي ماتەريالدىق-تەحنيكالىق بازامەن قامتاماسىز ەتەدى, ال اكىمدىك ءوز تاراپىنان ينجەنەرلىك كوممۋنيكاتسيالىق جەلىلەرىن جۇرگىزەدى جانە ءىشىنارا قۇرال-جابدىقتار الۋعا قولداۋ كورسەتەدى دەپ جوسپارلانىپ وتىر.
«ونكولوگيانى دياگنوستيكالاۋ مەن ەمدەۋ – بۇكىل الەمدەگى وزەكتى ماسەلەلەردىڭ ءبىرى. سوندىقتان دا وعان مەملەكەت تاراپىنان باسىمدىق بەرىلگەن. بۇعان دەيىن وبلىس اكىمىنىڭ باستاماسىمەن جاڭا زاماناۋي ونكولوگيالىق ورتالىق سالۋ تۋرالى ۇشجاقتى مەموراندۋمعا قول قويىلدى. بۇل جاڭا ورتالىقتا پاتسيەنتتەردى ەمدەۋ جانە دياگنوستيكالاۋدىڭ جاڭا تاسىلدەرى قولدانىلادى. ەمدەۋ بارىسىندا سىزىقتىق ۇدەتكىش, حيميوتەراپيانى ەمدەۋ ادىستەرىن پايدالاناتىن ينتەرۆەنتسيالىق حيرۋرگيا قولدانىلادى. بۇدان باسقا, سكرينينگ ورتالىعى اشىلادى, بۇل حالىققا ساپالى مەديتسينالىق قىزمەت كورسەتۋگە ءوزىنىڭ وڭ اسەرىن تيگىزەدى», دەيدى وبلىستىق دەنساۋلىق ساقتاۋ باسقارماسىنىڭ باسشىسى ارمان جانسەڭگىروۆ.
سونداي-اق جاڭا ونكولوگيالىق ورتالىقتا گەماتولوگيا, وڭالتۋ, فارماكولوگيا بولىمشەلەرى اشىلىپ, راديولوگيا, حيميوتەراپيا, مامموگينەكولوگيا بولىمشەلەرى جۇمىس ىستەيدى.
اۋىلداعى حالىق دەگەننەن شىعادى, اۋەلگى سالەمىن «مال-جان امان با؟» دەپ باستايتىن اعايىننىڭ ءبىر ماسەلەسى ۆەتەرينارلىق پۋنكتتەر ەكەنى بۇعان دەيىن ايتىلعان. وسى ماقساتتا كەيىنگى جىلدارى مال ەمدەۋگە ارنالعان زاماناۋي مەكەمەلەر ىرگە جايا باستادى. وڭىردە بىلتىردان بەرى جەرگىلىكتى بيۋدجەت قاراجاتىنا 50-گە تارتا بلوكتى-ءمودۋلدى ۆەتەرينارلىق پۋنكت سالىنعان. ماتەريالدىق بازانى نىعايتۋ جاعىنان بۇل – رەسپۋبليكا كولەمىندەگى ۇزدىك كورسەتكىشتەردىڭ ءبىرى.
ءوڭىر اكىمى ءباسپاسوز قىزمەتىنىڭ مالىمەتىنشە, وتكەن جىلى بلوكتى-ءمودۋلدى كونسترۋكتسيادان 24 ۆەتپۋنكت تۇرعىزىلسا, بيىل 23 ۆەتپۋنكت سالىنىپ, پايدالانۋعا بەرىلەدى. مۇنداي قۇرىلىس قىسقا مەرزىم ىشىندە – شامامەن 3-4 ايدا تۇرعىزىلادى. جوبالىق-سمەتالىق قۇجاتتى قاجەت ەتپەيدى. قۇرىلىستىڭ قۇنى ەداۋىر ارزان. بۇعان قوسا ۆەتەريناريا مەكەمەلەرىنىڭ ماتەريالدىق-تەحنيكالىق بازاسىن جاقسارتۋ ماقساتىندا 26 اۆتوكولىك, 517 ارنايى ۆەتەريناريالىق قۇرالدار, 113 كومپيۋتەر جيىنتىعى جانە 117 دانا يسج بازاسىنا ارنالعان پلانشەت ساتىپ الىنىپ, ارنايى ماماندارعا بەرىلگەن.
بۇدان بولەك, كەيىنگى ەكى جىلدا ۆەتەرينارلىق شارالاردى ۇيىمداستىرۋ ءۇشىن وبلىستىق بيۋدجەتتەن 8,1 ملرد تەڭگە بولىنگەن. وسىنداي تۇراقتى قولداۋلار جۇمىس ساپاسىنا ءوزىنىڭ وڭ اسەرىن تيگىزىپ وتىر. ماسەلەن, جەتىسۋ وبلىستىق ۆەتەريناريا باسقارماسىنىڭ باسشىسى نۇرلان جاماۋباەۆتىڭ ايتۋىنشا, وتكەن 6 ايدا 426,5 مىڭ ءىرى قارا, 1 ملن 286 مىڭ باس ۇساق مال برۋتسەللەزگە قارسى تەكسەرۋدەن وتكىزىلگەن.
«مال شارۋاشىلىعى – وبلىس ەكونوميكاسىنىڭ نەگىزگى باسىم باعىتتارىنىڭ ءبىرى. وعان قوسا ەت پەن ءسۇت ساپاسى حالىقتىڭ دەنساۋلىعىنا تىكەلەي اسەر ەتەتىن فاكتور. سوندىقتان مال مەن قۇستىڭ جاعدايىن تۇراقتى باقىلاپ وتىرامىز. بۇل رەتتە اسا قاۋىپتى اۋرۋلاردىڭ الدىن الۋ باعىتىنداعى ۆاكتسينالاۋدىڭ 6 ايلىق جوسپارى لايىقتى دەڭگەيدە ورىندالدى», دەيدى ن.جاماۋباەۆ.
جالپى, وبلىس بويىنشا اۋدان, قالالاردا 10 ۆەتەرينارلىق ستانسا مەن 118 ۆەتپۋنكت بار. وندا 1 100 مامان ەڭبەك ەتەدى. ۆەتەرينارلار اۋىل شارۋاشىلىعى جانۋارلارى مەن قۇستاردىڭ اسا قاۋىپتى اۋرۋلارىنىڭ 16 ءتۇرى بويىنشا ۆەتەرينارلىق-پروفيلاكتيكالىق ءىس-شارالار اتقارادى. الداعى ۋاقىتتا قوسىمشا وسى سالاعا ارنالعان بلوكتى-ءمودۋلدى نىساندار سالىنادى.
جەتىسۋ وبلىسى
