«بيىلعى قاتىسۋشىلار قاتارىن كورىپ, كوڭىلىم تولىپ تۇر. بۇرىن مۇنشالىق كوپ بولمايتىن. ۇلتتىق سالت-ءداستۇردى ناسيحاتتاۋدا بۇل بايقاۋدىڭ ورنى بولەك», دەيدى وبلىستىق ارداگەرلەر كەڭەسىنىڭ توراعاسى ساعىندىق قوجامسەيىتوۆ.
ارينە, ءار وتباسىنىڭ وزىندىك ەرەكشەلىگى بار. جارىسقاندا جۇيرىكتەن جۇيرىك وزاتىنىن بابالارىمىز بۇرىننان-اق ايتىپ كەتكەن.
بايقاۋدىڭ وبلىستىق دەڭگەيىندە «ۇلگىلى وتباسى» اتالىمىنا جەزقازعان قالاسىنىڭ تۇرعىنى حامزاحان ايتمۇحانوۆتىڭ وتباسى لايىق بولدى. اتالعان وتباسىنىڭ شاڭىراق كوتەرگەندەرىنە وتكەن جىلى جارتى عاسىر تولعان ەكەن.
«بەرەكەلى شاڭىراق» اتالىمىن يەلەنگەن ەرلان سىزدىقوۆتىڭ وتباسى ساتباەۆ قالاسىندا تۇرادى. بۇل شاڭىراقتىڭ بالالارى ونەرگە, سپورتقا جاقىن. ولاردىڭ كەيبىرى رەسپۋبليكالىق جارىستاردىڭ جەڭىمپازى اتانىپ, وبلىستىڭ اتاعىن اسپانداتىپ ءجۇر.
بايقاۋ بارىسىندا «بەلسەندى وتباسى» اتالىمىن قاراجال قالاسىنان قاتىسقان ناۋكەنوۆتەر جەڭىپ السا, «ونەرلى وتباسى» اتالىمىنا جاڭاارقالىق ايتجانوۆتار وتباسى لايىق دەپ تانىلدى.
ۇلىتاۋ اۋدانىنان كەلگەن قىدىرپاتشاەۆتار اۋلەتى «مەرەيلى وتباسى» ۇلتتىق كونكۋرسىنىڭ لاۋرەاتى» اتاعىنا يە بولىپ, استانا قالاسىندا وتەتىن رەسپۋبليكالىق ماراپاتتاۋعا قاتىساتىن بولدى.
ۇلىتاۋ وبلىسى
