فوتو: تۇرار قازانعاپوۆ
جەلىدە تاراعان اۋديو-حابارلامالاردا قاۋىپتى ادام باس-اياعىنا دەيىن قارا كيىم كيگەنى ايتىلعان:
«تاياۋ كۇندەرى «ماسلودەلو» اۋماعىندا توتەنشە جاعداي بولدى. وندا جالعىز كەتىپ بارا جاتقان ايەلدى ۇرىپ-سوعىپ, قاسىنداعى بالاسىن ۇرلاپ كەتپەك بولعان. مەن مۇنى «ماسلودەلودا» كولىك جۇرگىزشىسى بولىپ ىستەيتىن تانىسىمنان ەستىدىم. وقىس وقيعانى بايقاعان ەر ادامدار كومەككە كەلىپ, بالانى قۇتقارىپ قالعان, ال ايەلدىڭ بەت-ءجۇزى جارالانعان. سوندىقتان اتا-انالار بالالارىڭىزدى قورعاپ, باقىلاپ جۇرىڭىزدەر. ولار اشىق تۇردە بالالاردى ۇرلاۋعا كىرىسكەن», دەلىنگەن.
ەكىنشى تۇرعىن جولداعان حابارلامادا:
«ول ايەل كەشكە جولداسىن جۇمىستان كۇتىپ الماق بولىپ شىققان ەكەن. قورقىنىشتى ادام ايەلدى جۇلدىزدان «ماسلودەلوعا» دەيىن اڭدىپ بارىپتى. جۇرتشىلىقتان تاسا جەردە ايەلدى ۇرىپ-سوعىپ, بالاسىن تارتىپ الماق بولعان. ولارعا اقشا دا, باسقا دا ەمەس بالالار كەرەك. پوليتسيا وقيعا ورنىنا كەلگەندە ونىڭ بۇرىننان قولعا تۇسىرە الماي جۇرگەن «مانياك» ەكەنىن ايتتى», دەلىنگەن.
الايدا الماتى قالالىق پوليتسيا دەپارتامەنتى بۇل اقپاراتتى جوققا شىعاردى.
«ايەلدىڭ دەنساۋلىعىنا زيان كەلتىرۋ فاكتىسى بويىنشا قىلمىستىق ءىس قوزعالدى. ءىستىڭ وبەكتيۆتى ءمان-جايى انىقتالىپ جاتىر. سونىمەن بىرگە مانياك بالالاردى اڭدىپ جۇرگەنى تۋرالى اقپارات شىندىققا جاناسپايدى. الماتى قالالىق پوليتسياسى جالعان اقپارات تاراتپاۋدى جانە جالعان دەرەكتەردىڭ قايتالانۋىنا ىقپال ەتپەۋدى تالاپ ەتەدى. بۇل ارەكەتتەر قىلمىستىق جاۋاپكەرشىلىككە تارتىلادى», دەلىنگەن قالالىق پوليتسيا تاراتقان حابارلامادا.
