سۋرەتتى تۇسىرگەن – جانگەلدى ابدىعالىم
جىلىتۋ ماۋسىمىنا دايىندىقتى ءوڭىر باسشىسى ەرماعانبەت بولەكپاەۆ شاحتينسك جەو-نا بىرنەشە رەت بارىپ, جوندەۋ جۇمىستارىنىڭ ساپاسىن تەكسەرىپ, ستانسا باسشىلىعىمەن, مەردىگەرلەرمەن ءجيى كەڭەس وتكىزىپ, قاداعالاۋىندا ۇستاپ وتىر.
– قازىر ءۇش قازاندىق اگرەگاتىندا مونتاجداۋ, بولشەكتەۋ جۇمىستارى جۇرگىزىلىپ جاتىر. ەكى تۋربواگرەگاتتا اعىن بولىگى بويىنشا جۇمىستار اياقتالدى. گەنەراتورلار بويىنشا جوندەۋ جۇمىستارى اياقتالىپ جاتىر. قازاندىقتارعا كەلەتىن بولساق, ەكەۋى دايىن, قازىر مونتاجداۋعا دايىندىق ءجۇرىپ جاتىر, الداعى ۋاقىتتا تاعى ۇشەۋى ورناتىلادى. بۇل جۇمىستار قىستا جىلۋ ەنەرگياسىنىڭ ساپالى بولىنۋىنە سەپتىگىن تيگىزەدى. جۇمىس كەستە بويىنشا ۋاقىتىمەن جۇرگىزىلىپ كەلە جاتىر, – دەيدى «شاحتينستەپلوەنەرگو» جشس-نىڭ تەحنيكالىق ديرەكتورى ابىلاي سەيدۋالى.
قازىرگى كەزدە ءۇش قازاندىق پەن ەكى تۋربوگەنەراتوردى جوندەۋ جۇمىستارى ءجۇرىپ جاتىر. ءبىرىنشى قازاندىقتاعى جۇمىس 1 قىركۇيەككە دەيىن, №4 قازاندىقتاعى جۇمىس 15 قىركۇيەككە دەيىن, №3 قازاندىق الداعى جىلۋ بەرۋ ماۋسىمى باستالعانعا دەيىن اياقتالادى دەپ وتىر مەردىگەر ۇيىم.
مۇنىمەن قوسا كاسىپورىندا ماگيسترالدىق جانە توقساندىق قۇبىرلاردى اۋىستىرۋ جۇمىستارى قىزۋ. جوسپارلانعان 7 ۋچاسكەنىڭ 6 ۋچاسكەسى, ياعني مولودەجنايا كوشەسىنەن يندۋستريالنايا كوشەسىمەن قيىلىسۋ اۋماعىندا, №5 پاۆيلونعا قاراي, مولودەجنايا كوشەسى بويىنشا ورتالىق-3 شاعىن اۋدانىنا قاراي, جەڭىستىڭ 40 جىلدىعى بويىنشا پاركوۆايا كوشەسىندەگى 43ا ۇيگە قاراي, تك-1ا-دان ججس قاراي, قازاقستان كوشەسىندەگى 124 ۇيدەن جەڭىستىڭ 40 جىلدىعى كوشەسىندەگى 62 ۇيگە قاراي, «شاحمارت» ساۋدا ۇيىنەن جەڭىستىڭ 40 جىلدىعى كوشەسىندەگى تك-327-گە دەيىن جوندەۋ جۇمىسى جۇرگىزىلگەن.
جىلۋ جەلىلەرىنىڭ ۋچاسكەلەرى بويىنشا «شاحمارت» دۇكەنى اۋماعىندا قۇبىرلاردى مونتاجداۋ جۇمىسى ءساتتى جۇرگىزىلدى. قازىر تروتۋاردى قالپىنا كەلتىرىپ, اۋماق اباتتاندىرىلىپ جاتىر. «كروكۋس» دۇكەنى اۋماعىندا قۇبىرلاردى بولشەكتەپ, بىردەن مونتاجداۋ جۇمىستارىنا كىرىستى.
شاحتينسك قالاسىندا وسى جازدا جالپى 3,7 شاقىرىم جىلۋ جەلىلەرىن اۋىستىرۋ جوسپارلانعان بولاتىن. جۇمىستىڭ نەگىزگى كولەمى ورىندالدى. سونىمەن قاتار 2 شاقىرىم قۇبىردىڭ جىلۋ وقشاۋلاعىشى قالپىنا كەلتىرىلەدى.
شاحتينسك قالاسىنىڭ جىلۋ ەلەكتر ورتالىعىندا جوندەۋ جۇمىستارى كەشەنى 70 پايىزعا, شاحان كەنتىنىڭ قازاندىعىن جوندەۋ جۇمىستارى 85 پايىزعا ورىندالعان. جاۋاپتى مەردىگەرلەر جوندەۋ جۇمىستارى جىلۋ بەرۋ ماۋسىمى باستالعانعا دەيىن اياقتالادى دەپ سەندىردى. وعان قوسا وسى اپتادا كومىر جەتكىزۋ بويىنشا تەندەر قورىتىندىلانادى.
وتكەن اپتادا جوعارىداعى جۇمىستاردى باقىلاپ قايتقان وبلىس اكىمى قالا باسشىلىعى مەن جەو-عا جىلۋ بەرۋ ماۋسىمىنا دايىندىقتاعى جاۋاپكەرشىلىكتى سەزىنۋ كەرەگىن جەتكىزدى.
– ءسىز قىسقا دايىندىق ءۇشىن جەكە جاۋاپ بەرەسىز. قارجىلاندىرۋ بار, بارلىق ماسەلەنى ۋاقتىلى شەشىڭىز. ناقتى ناتيجەلەردى كۇتەمىز. قالا تۇرعىندارىنىڭ ۇيىندەگى جايلىلىق جىلۋ كوزىنىڭ تۇراقتى جۇمىسىنا بايلانىستى, – دەدى ءوڭىر باسشىسى.
قىستىڭ قامىن قازىر ويلاعان ولاردىڭ بۇل جولعى قىسقا دايىندىعى قاۋىرت. جۇمىستىڭ كەستەدەن كەشىكپەۋىمەن قوسا, ساپاسى دا قاتاڭ باقىلاۋدا دەيدى. دەگەنمەن جەر قارايعاننان بەرگى جۇيەلى جۇمىستان سوڭ شاحتينسك تۇرعىندارى توڭباۋعا ءتيىس. ونى الداعى قىس ايقىندايدى.
قاراعاندى وبلىسى,
شاحتينسك قالاسى
