اققانات

اۋىل ادامدارى قۇس ەتىنە سۇرانىستى كوبەيتۋدە وتكەن جىلى جەلتوقسان ايىندا «اقسۋ قالاسى اۋماعىنا قاراستى قىزىلجار اۋىلىنداعى قۇس فابريكاسى برويلەر تۇقىمدى تاۋىق ءوسىرىپ, قۇس ەتىن وندىرۋمەن اينالىسۋدى قولعا الماقشى» دەپ گازەتىمىزدە جازعان بولاتىنبىز. بۇل جوبا «بيزنەستىڭ جول كارتاسى-2020» جانە «اگروبيزنەس-2020» باعدارلامالارى اياسىندا وبلىس اكىمدىگى مەن ەۋرازيالىق بانكتىڭ قارجىلاي قولداۋىمەن جۇزەگە اسىرىلدى. كاسىپورىندى قايتا قالپىنا كەلتىرۋ مەن جاڭعىرتۋ ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىندا ىسكە اسىرىلۋدا. ءبىرىنشى كەزەڭدە جىلىنا 4 مىڭ توننا قۇس ەتى وندىرىلەدى. بۇل وبلىستاعى قۇس ەتىنە دەگەن سۇرانىستىڭ 70 پايىزىن وتەيدى دەدىك. ەندى مىنە, «قىزىلجار-قۇس» سەرىكتەستىگى العاشقى تاپسىرىس­تى ورىندادى. برويلەر ەتىنىڭ كيلوسى – 650 تەڭگە. جۋىق ارادا وب­لىستاعى دۇكەندەرگە دە جەتكى­زىلەدى. قازىر فابريكادا شامامەن 145 مىڭداي تاۋىق بار. سەرىكتەستىك باسشىلىعى ءوڭىر­دەگى ساۋدا جۇيەلەرىمەن قۇس ەتىن جەت­كىزۋ بويىنشا كەلىسسوزدەر جۇرگى­زۋدە. بۇدان بۇرىن اۋىلداعى قۇس فەرماسى ءبىراز قيىندىقتى باس­تان وتكەردى. بانكروتقا ۇشى­را­عان بۇرىنعى «قىزىلجار اگرو» جشس ەندى «قىزىلجار-قۇس» سەرىكتەستىگى بولىپ قايتا قۇرىلدى. فەرمادا ەڭبەك ەتكەن جۇمىسشىلاردىڭ ايتۋىنشا, 2010 جىلدارى قۇس فابريكاسىندا 320 مىڭ تاۋىق بولىپتى. جىل سايىن 14 ميلليون جۇمىرتقا الىپ وتىرعان كورىنەدى. كورشى اۋىلداردى قوسقاندا 200 تۇرعىن فابريكادا جۇمىس جاساپتى. ەندى مىنە, جۇمىسسىز قالعان اۋىلدىقتار قايتادان ءوز ورىندارىنا ورالدى. اۋىل اكىمى ەرجان تۇسىپبەكوۆتىڭ ايتۋىنشا, قۇس ەتىنەن الدىمەن اۋىل تۇرعىندارى, ارينە, فابريكانىڭ اشىلۋىن اسىعا كۇتكەن, وزدەرى وسىندا ەڭبەك ەتەتىن قىزىلجارلىقتار اۋىز تيۋدە. بارىنەن بۇرىن اۋىلدا جۇمىس بار. ايتسا-ايتقانداي, ايلىق ەڭبەكاقىلارى 50-60 مىڭ تەڭگە بولاتىن قۇس فابريكاسىندا قازىر 130 ادام ەڭبەك ەتۋدە, ال كاسىپورىن تولىق قۋاتقا كوشكەن كەزدە تاعى دا 240 ادام جۇمىسقا الىنادى. اۋىل اقساقالى تىلەۋكەن تۇرسىنباي اتا دا كەزىندە فابريكادا كوپ جىل ەڭبەك ەتىپتى. كاسىپورىننىڭ بۇرىنعىسى مەن قازىرگىسىن مۇلدە سالىستىرۋعا كەلمەيدى. جاڭا زامان ۇلگىسىندەگى مىناداي كاسىپورىندا ەڭبەك ەتكەنگە نە جەتسىن, دەيدى. سول سياقتى جوتاي شايماردانوۆ تا كاسىپورىندا 30 جىلدان استام ۋاقىت ەڭبەك ەتىپ كەلەدى ەكەن. بۇرىنعىداي ەمەس, جۇمىس ورنىمىز دا جىلى ءارى جايلى. بارلىق جاعداي جاسالعان, دەيدى اعامىز. ال, «قىزىلجار-قۇس» جشس ينۆەس­تورى داۋلەت سىزدىقوۆتىڭ ايتۋ­ىنشا, فابريكاسىن قالپىنا كەلتىرۋ جۇمىستارى 2012 جىل­دىڭ قازانىندا باستالىپتى. جوبانىڭ جالپى قۇنى 5,7 ملرد. تەڭگە. 2012-2014 جىلدارى 3,6 ملرد. تەڭگە ينۆەستيتسيا قۇيىل­عان. قۇس فابريكاسىنىڭ 9 قۇس قورا­سى, قۇس سويۋ تسەحى, ينكۋباتور, توڭازىتقىش تسەحى قايتا قالپى­نا كەلتىرىلگەن. گوللانديا, گەرمانيا جانە رەسەيدەن جاڭا جابدىقتار جەتكىزىلىپ, ورناتىلدى. برويلەر بالاپاندارىن شىعارۋ ءۇشىن ينكۋباتورلارعا 114 مىڭ جۇمىرتقا سالىنىپتى. يندۋس­تريالاندىرۋ كارتاسىنا ەنگەن جوبا ەندى ەكسپورتتىڭ الەۋەتىن ارتتىرىپ, ەڭ باستىسى – اۋىلدىڭ ينفراقۇرىلىمىن دامىتۋعا جول اشپاق. برويلەر ءادىسى ارقىلى بالاپاندار وسىرەدى. كاسىپورىننىڭ ءىشى-سىرتى جاڭارىپ, زامانعا ساي تەحنولوگيا بويىنشا قۇس ءوسىرىپ, ەت پەن جۇمىرتقانى كوبەيتپەكشى. شەتەلدەن اكەلىنگەن جابدىقتار قۇستى باپتاۋ, جەمدەۋ, عيماراتتىڭ ءىشىن جارىقتاندىرۋ, جەلدەتۋ سىندى جۇمىستارىن اتقارۋعا ءتيىمدى. جۇمىسشىلارعا ارنالعان جاتاقحانا بار, اسحانا جۇمىس جاساپ تۇر. ەندى فابريكانىڭ قاسىنان بالاپانداردى جەم-ازىقپەن قامتاماسىز ەتەتىن زاۋىت ىسكە قوسىلماقشى. جالپى, «قىزىلجار-قۇس» سەرىكتەستىگىنىڭ قۇس فابريكاسىن جاڭعىرتۋ جۇمىستارىنىڭ ەكىنشى كەزەگى ىسكە قوسىلعاندا ءوندىرىس قۋاتى جىلىنا 8 مىڭ توننا قۇس ەتىن وندىرۋگە جەتەدى. فاريدا بىقاي, «ەگەمەن قازاقستان». پاۆلودار وبلىسى, قىزىلجار اۋىلى.