فوتو: كولىك مينيسترلىگىنىڭ ءباسپاسوز قىزمەتى
جولداردىڭ بۇزىلۋىن الدىن الىپ, باقىلاۋ بارىسىندا ادامي فاكتوردى بولدىرماۋ ماقساتىمەن اۆتوماتتاندىرىلعان ولشەۋ ستانتسيالارى پاۆلودار, قاراعاندى, قوستاناي, كوكشەتاۋ, قوسشى قالالارى مەن قاراوتكەل جانە مالوتيموفەەۆكا كەنتتەرى جاعىنان قالاعا كىرەبەرىس جولداردا ورناتىلعان.
«اۆتوماتتاندىرىلعان ولشەۋ ستانتسيالارى قىركۇيەك ايىندا ىسكە قوسىلادى. قالاعا كىرەتىن بارلىق جۇك كولىگى ادامنىڭ قاتىسۋىنسىز اۆتوماتتى تۇردە ولشەنەتىن بولادى. زاڭ جۇك كوتەرگىشتىگى 12 توننادان اساتىن اۆتوموبيلدەردى ولشەۋ ستانتسيالارى ارقىلى وتۋگە مىندەتتەيدى, ال اينالما جول ارقىلى ءجۇرىپ ءوتۋ نەمەسە ولشەۋدەن باس تارتۋ سايكەسىنشە تىركەلىپ وتىرادى. بۇل رەتتە زاڭ تالاپتارىن بۇزعانى ءۇشىن اكىمشىلىك جازا قاراستىرىلعان. ولشەۋ جۇمىستارى كولىك قۇرالدارىنىڭ قوزعالىسى كەزىندە جۇزەگە اسىرىلادى», دەپ حابارلادى كولىك مينيسترلىگىنىڭ ءباسپاسوز قىزمەتى.
مينيسترلىك اتالعان شارالاردى جۇزەگە اسىرۋ ارقىلى اۆتوموبيل جولدارىنىڭ مەرزىمىنەن بۇرىن بۇزىلۋى مەن توزۋىن بولدىرماۋ, اۋىر جانە ءىرى كولەمدى كولىك قۇرالدارىنىڭ قوزعالىسىن ساپالى باقىلاۋدى قامتاماسىز ەتپەك. سونداي-اق كولىكتىك باقىلاۋدى جۇزەگە اسىرۋ كەزىندە ورىن الىپ وتىرعان سىبايلاس جەمقورلىق تاۋەكەلدەرىن بارىنشا ازايتۋ ماسەلەلەرىن شەشۋگە نيەتتى.
