فوتو:قر ونەركاسىپ جانە قۇرىلىس مينيسترلىگى
تۇرعىن ۇيلەردىڭ كىلتتەرىن تابىستاۋ راسىمىنە باتىس قازاقستان وبلىسىنىڭ اكىمى ناريمان تورەعاليەۆ قاتىسىپ, قونىس يەلەرىن قۇتتىقتادى. وبلىس اكىمىنىڭ ايتۋىنشا, تەرەكتى اۋدانىندا سالىنىپ جاتقان 130 ءۇيدىڭ 50-ءنىڭ قۇرىلىسى اياقتالعان. قالعان 80 ءۇيدىڭ قۇرىلىسى قىركۇيەك ايىنا دەيىن اياقتالادى دەپ جوسپارلانعان. بۇدان بولەك, سۋ تاسقىنىنان زارداپ شەككەن تۇرعىندار ءۇشىن بقو-نىڭ تەرەكتى اۋدانىندا 30 ءۇي ساتىپ الىنىپ, 395 وتباسىنىڭ باسپاناسىنا جوندەۋ جۇمىستارى جۇرگىزىلگەن.
تەرەكتى اۋدانى پودستەپنوە اۋىلىنىڭ تۇرعىنى لاۋرا نىسانوۆانىڭ ءۇيى سۋ تاسقىنى كەزىندە جارامسىز دەپ تانىلعان.
«ناۋرىز ايىنىڭ سوڭىندا ءۇيىمىزدى سۋ باستى. ءبىر قيىندىقتىڭ ارتىندا جەڭىلدىك تۇرادى دەگەن شىن ءسوز ەكەن. بۇگىن باسپانالى بولىپ وتىرمىز. جارىق, كەڭ 3 بولمەلى, ۇلكەن, بارلىق جاعدايى جاسالعان ۇيگە قول جەتكىزگەنىمىزگە وتە قۋانىشتىمىز. وسىنداي جاعداي جاساعان مەملەكەت باسشىسىنا العىسىمدى بىلدىرەمىن», - دەدى لاۋرا نىسانوۆا.
قر ونەركاسىپ جانە قۇرىلىس مينيسترلىگى احۋالدىق ورتالىعىنىڭ مالىمەتىنشە, باتىس قازاقستان وبلىسىندا 775 ءۇيدىڭ قۇرىلىسى جۇرگىزىلىپ جاتىر, تۇرعىن ءۇي ساتىپ الۋ جانە جوندەۋ جۇمىستارى جالعاسىن تاپتى. بۇگىنگى تاڭدا زارداپ شەككەندەرگە 130 جەكە تۇرعىن ءۇي سالىنىپ, 1128 ءۇي ساتىپ الىنعان. ال قالعان 1321 ۇيدە جوندەۋ جۇمىستارى اياقتالعانى بەلگىلى بولدى.
