سۋرەتتى تۇسىرگەن – اۆتور
باياناۋىلداعى مۋزەيدە قاناعاڭنىڭ جەكە زاتتارى مەن ءومىر قاتپارلارىنان سىر شەرتەتىن فوتوجادىگەرلەر عالىمنىڭ قيلى تاعدىرىنان ءبىراز جايدى ۇقتىرعانداي. سونىڭ ىشىندە عۇلامانىڭ بالا شاعىندا پايدالانعان ەرتوقىمىنا كوزىمىز ءتۇستى. بۇل كونە جادىگەردى وسىدان 12 جىل بۇرىن مۇسا شورمان اۋلىنىڭ (ساتباەۆ تۋعان اۋىل) تۇرعىنى تاستەمىر شاشەنوۆ ەسىمدى ازامات تاپسىرىپتى. تايعا ەرتتەلەتىن شاقتالعان ەرتوقىم اعاشتان شابىلعان, بىرنەشە بولىكتەن تۇرادى. الدىڭعى بولىگىندە تازا كۇمىستەن زەرلەنگەن جاپسىرماسى بار.
مۋزەيدىڭ بۇقارالىق جۇمىس جونىندەگى مامانى سانسىزباي ساپارعاليەۆتىڭ ايتۋىنشا, قانىش يمانتاي ۇلى قازىرگى مۇسا شورمان اۋلىنان 7-8 شاقىرىم جەردەگى ايرىق دەگەن جايلاۋدا دۇنيەگە كەلگەن. بۇل اۋىلدىڭ جانىندا, اششىسۋ وزەنىنىڭ ارعى بەتىندە كەزىندە شورمان اۋلەتىنىڭ قىستاۋى بولعان
«ەل اۋزىندا «ساكەن اعاي» اتانىپ كەتكەن سادۋاقاس شورمانوۆ اقكەلىن بولىسىندا مەكتەپ سالدىرعانى ءمالىم. مەكتەپ كەزىندە شورمانوۆتاردىڭ اعاش ۇيلەرى ورنالاسقان اۋماقتا, قازىرگى مۇسا شورمانوۆتىڭ كەسەنەسىنە جاقىن جەردە بولعان. سوندا بالا قانىش كۇن سايىن تايىنا ءمىنىپ, مەكتەپكە كەلەدى ەكەن. مەكتەپتىڭ ءوزى قاراعايدان قيىپ سالىنعان. الگى جەردە ودان بولەك, شورمان اۋلەتىنە تيەسىلى شامامەن 6 قىستاۋ-ءۇي بولعان. وكىنىشكە قاراي, 1928 جىلى باياناۋىلدا كامپەسكە قىزىپ تۇرعان ۋاقىتتا بولشەۆيكتەر قىستاۋ مەن ءبىلىم ۇياسىن تىپ-تيپىل ەتىپ بۇزىپ تاستايدى. ال بورەنەلەردىڭ بارلىعىن قاراعاندى وبلىسىنداعى سەمىزبۇعىعا تاسىپ جەتكىزىپ, جاتاقحانا تۇرعىزىپتى», دەپ اڭگىمەلەدى س.ساپارعاليەۆ.
بۇگىندە شورمانوۆتاردىڭ قىستاۋى مەن مەكتەپ ورنى ماڭايى قورشالىپ, اسپان استى مۋزەيىنە اينالعان.
پاۆلودار وبلىسى,
باياناۋىل اۋدانى,
مۇسا شورمان اۋىلى
